2015年3月3日 星期二

乙未羊年新春食不停

話咁快又過了農曆新年,今年基爾帶住大感冒過年,所以乜地方都唔敢去,尤其係人多擠逼的花市和賀歲煙花通通都無去,多數時間只在家閉關養病。



話雖如此,但新年的幾餐團年飯開年飯始終係要食吧!不過今年團年飯為了遷就家人時間,所以比較遲食,結果茶樓爆滿就放棄食中餐了。其實之前冬至時也試過「逆市而行」食Pizza Hut,發現原來大時大節去食西餐會比較易搵位,菜式也不會只限幾款套餐而且開天殺價貴到無鄰,例如這個青口set dinner都只係$500有找非常抵食呢!



另外之前閒日有一晚約了前公司舊同事團年聚舊,地點選了銅鑼灣時代廣場食通天的鍾廚,7人叫了8-9道菜人均才$160,又真係抵食,味道也不俗,至少不覺太重味精,當中那味益生菌炒豆苗相當清淡且幾有綽頭(但沒有益力多味)。席間當然仲要八卦打聽一下舊公司的人事情報update返D資訊先得啦!



至於開年飯無辦法逃避要在家中開大餐,不過為免基爾媽煮得太勞累,基爾一早已經出錢又出力、舉腳提議買個大盆菜就算數,結果揀了稻香這個$800大元有找,年初二仲要乖乖大清早步行30分鐘去隔籬村人肉速遞回家(勁重!)



雖則話已經算大大減省了煮的麻煩,但餐後的執台、洗碗、拖地等一大堆「善後工程」始終不能幸免,每年初二的例行勞累工事結果仍是要忙足一整日,雖說基爾是熟手技工,但明年仍會盡全力說服基爾媽索性出街食開年飯乾手淨腳算了!

鍾廚 Chung's Kitchen
銅鑼灣勿地臣街1號時代廣場食通天12樓1201舖

66 則留言:

  1. 我都怕人多逼,幸好家人都一致,5會在大時大節食飯。

    回覆刪除
    回覆
    1. 我都覺得係呀,大時節出街食一次,等如平日兩多餐都唔只㗎^^
      平日食又可以多啲選擇,唔駛要食啲「指定餐」

      刪除
  2. 近年我對必勝客異常失望

    回覆刪除
    回覆
    1. 依家做外賣pizza多咗好多競爭對手

      刪除
  3. 餐後拖地? 你食到一地都係? 定係流晒口水落地?

    回覆刪除
    回覆
    1. 多人踩過撻地驚污糟,流感高峰期都係要小心啲,盡量保特清潔安心啲

      刪除
  4. 益生菌炒豆苗好得意,係咪酸酸甜甜咁呢~

    回覆刪除
    回覆
    1. 初頭都以為有益力多味,但原來無乜XXD

      刪除
  5. 陰公,休息多啲啦!
    個盆菜好抵食喎^^

    回覆刪除
    回覆
    1. 多謝~~^^
      早排幾乎晚晚無覺好瞓,依家要瞓返多啲:P
      係呀,稻香喱個我覺得幾貨真價實

      刪除
    2. 試下用靈芝片煮冰糖半小時,當水飲,可化痰^^

      刪除
    3. 謝謝^^
      之前也飲過黑糖薑茶,今晚回家就飲中藥了

      刪除
    4. 薑茶係熱㗎,需要看看你係寒咳或熱咳

      刪除
    5. 我其實都唔係好知熱定寒:P
      不過睇完中醫,就話寒熱暫時都不要食@@
      飲咗一劑茶,好似真係好了一點

      刪除
  6. 過時過節抱恙最掃興...咁你現在好返未呀??
    做節過後的執拾幾頭痛,個個係大人都好啲,若然有細路就...
    我哋屋企人唔會有可能在Pizza Hut做節...除非X'mas~~
    盆菜都幾多靚料!! 純睇相都夠五,六個成人食...

    回覆刪除
    回覆
    1. 未~~~明天會去睇下中醫清尾:P
      有細路呀!!
      X'mas都有做節咁犀利hahahaha
      夠七八人食架啦,好足料

      刪除
  7. I also bought 大盆菜 but for 團年. Simple and taste quite good.

    回覆刪除
    回覆
    1. 係呀,其實都幾方便,至少可以慳返啲時間唔駛煮咁多味

      刪除
  8. 以這個價錢嚟講這盆菜好抵呀 !

    回覆刪除
    回覆
    1. 我見依家唔少人在家做節都愛買盆菜,所以都越多越多茶樓和快餐店都做喱門生意呢

      刪除
  9. 過年大感冒,都好慘!
    人均才$160,是超級抵食!
    每年初二的例行勞動,都是一年一次,家人開心都值得囉!

    回覆刪除
    回覆
    1. 而且仲要好忍得口,好多朱古力,年糕,油角煎堆又或者蛋卷曲奇餅通通都唔食得住~~~><
      係呀我都覺得幾抵食,所以應該會再去encore一下
      我個心入面都係咁諗,但真正到落手落腳去做時,又係另一回事,尤其係病住咁做就更辛苦呢:P

      刪除
  10. 過年有祝你身體健康喎,唔夠咩!祝多幾次:身體健康 身體健康 身體健康 ....................................................
    仲食咁多野,唔駛戒口!逗埋好多利是喇!

    回覆刪除
    回覆
    1. 多謝晒,JJ過新年果然特別慷慨~~~我也回禮:祝你也長年龍馬精神大吉大利桃花大旺XXXD
      要戒口呀,好多好嘢都唔食得住呀
      爭你果封囉XXD

      刪除
  11. 咁慘新年病了呀?我都唔好得你好多呀......我新年時塊面d皮膚超衰...然後又食滯左喎....
    係呀~咁食法係岩架~正如情人節呀聖誕節呀要食番打邊爐就實有位一樣道理~

    回覆刪除
    回覆
    1. 係呀要戒口,食少好多好嘢:P
      你塊面真係搞好耐喎,仲未好咩?去到日本要食清啲啦^^
      對,喱個朔市而行策略其實都幾好,至少唔駛等位太耐,又多啲選擇,大時節去茶樓一定要被迫食指定餐,又要夠鐘交台,好鬼煩

      刪除
    2. 我新年都好慘呀咩都唔食得~~~
      點會呀去日本食完先番黎再醫啦~~唔理架喇~~無理由俾錢去戒口架嘛~~~~~~其實好番好多~
      係呀夠鐘交枱哥下我明白佢想做多轉...但佢出唔到野俾我食呢!!

      刪除
    3. 咁都係~~~~~一於返來先再醫kakakaka....
      好返就ok啦!!!
      催人交枱最無癮,況且係畀貴價錢,service卻比平日還要差

      刪除
  12. 現在部份酒樓幾款套餐而且開天殺價貴到無鄰,又或限時候交枱,我都覺得無癮,中秋節都試過叫盤菜,但盤菜不會經常吃。
    祝早日康復!

    回覆刪除
    回覆
    1. 多謝,希望睇完中醫可以清咗啲痰!!!西醫睇咗幾次都仲係未清得晒><
      限時交台真係最唔值得,因為其實已經畀咗貴價錢,但服務仲衰過平時,又要食指定貴價餐,所以非常唔抵!!
      盤菜當然不宜常吃,因為其實都肥膩呢

      刪除
  13. 我而家都係咁中節食西餐,西節食中餐,慳錢又好食呀!

    回覆刪除
    回覆
    1. 係呀依家好多人都用喱個逆市策略,方便好多唔駛同人逼!!!
      希望隔籬個商場第時起好會多啲選擇啦^^

      刪除
  14. 大感冒仲食熱氣野!我的年三十晚飯吃印度菜,而且只是同兩個朋友,因為今年過年沒有「回鄉」到S市。

    回覆刪除
    回覆
    1. 係咪叫做以毒攻毒kakakakaka...
      你似乎越來越愛上印度^^ 兩個朋友===>咁有冇小馬份?
      咦~~~~現在你不是住S市了?

      刪除
    2. 印度菜我已經好耐無食,所以至有D miss。哈,你竟然記得小馬!無佢份呀,同小馬要講法文,其他朋友搭唔到爹。不過下個禮拜法國電影節佢有兩張免費飛,於是又益我嘞,哈哈!我不嬲都唔係住S市架啦,「基地」響果處啫......

      刪除
    3. 咁你果邊多唔多印度菜餐廳?
      當然記得啦^^
      你果邊咁快法國電影節,香港通常要等到五月呢~~~會睇咩戲?
      原來如此,可能係我會錯意:P

      刪除
  15. 祝早沾勿藥!
    家母近年也接受外出做節,實在省卻不少功夫!

    回覆刪除
    回覆
    1. 謝謝阿摩~~~~不過可能真係年紀大咗,身體抵抗力好似真係差咗:P
      其實煮大棚人飯對老人家而言真係幾辛苦,所以出外做節是不錯選擇呢

      刪除
  16. 有好多好野食bor :D
    我屋企好少一家人出去食飯(應該係冇先岩),次次都係麻煩媽媽煮咋,唔似你可以四圍食 XD

    回覆刪除
    回覆
    1. 其實我都好想試下九州的拉面㗎\(^0^)/
      咁黎緊婦女節就索性唔好煮,請埋阿媽阿妹出街食慶祝下囉^^

      刪除
  17. 稻香盆菜睇落都唔錯喎~~有咁多鮑魚好抵食

    回覆刪除
    回覆
    1. 都幾足料,至少由面對底嘅餸料都啱食,盆底唔會有太多無謂嘢XXXD
      都幾多鮑魚,但唔係太大隻,細過豉油碟:P

      刪除
  18. 回覆
    1. 係呀都ok架,結果食唔晒仲可以食多三餐XXD

      刪除
  19. 一家人在屋企食飯都特別難得,值得紀念。希望你早日康復哂,我過年去了台灣,很舒服,像重新認識一樣

    回覆刪除
    回覆
    1. 很期待看你重新認識台灣的旅行照^^
      是去賞花?

      刪除
  20. 新年樓樓病,傳聞會成年都病架! Wakakaka~~~
    有時大時大節就係比借口D食市來賺錢,有時「逆市而行」都唔錯架! 好似情人節聖誕節我都係自己煮,慳埋唔少~

    回覆刪除
    回覆
    1. 所以要學銀哥咁鍛煉好身體先得啦~~^^
      情人節自己煮===>唔怪得可以咁快冧掂銀嫂啦kakakakaka

      刪除
  21. 養完病大擦一餐, 好應該.
    黑糖薑茶一流, 我每逢肚子不舒服都飲一杯, 馬上爽晒.

    回覆刪除
    回覆
    1. 承你貴言~~~~好期待好返之後大擦一餐^0^
      原來還可以醫肚痛,唔怪得近排人們去台灣都要買包做手信!!!

      刪除
  22. Gael,我常常幫襯時代廣場的鍾廚.

    回覆刪除
    回覆
    1. 你也覺不錯吧!
      我去果日係閒日所以菜式選擇較少,聽友人話周五周六周日會多一點

      刪除
  23. 遅來的祝福:祝基哥日日精神,天天喜樂安康!
    看來年底都要去稻香定番個盆菜,很引人垂涎喔。

    回覆刪除
    回覆
    1. 大家咁話,身體健康最緊要^^
      係呀都算幾足料,貨真價實的呢

      刪除
  24. 稻香盆菜,我都有試過,味道唔錯架.掂架!
    最緊要唔晒係屋企煮到咁辛苦嗎!

    回覆刪除
    回覆
    1. 係呀我覺得幾足料,至少同佢張poster相差不是太遠kakakaka

      刪除
  25. 新年期間長洲食店都要加三服務,飲汽水都一像樣!

    回覆刪除
  26. 而家應該好番曬喇!!??
    咳…你仲食咁多肥膩嘢 ? 要戒口架!
    天氣凍果時戴番條頸巾/著番件有領嘅衫黎保護頸部嘅氣管可能無咁易病架!:P

    回覆刪除
    回覆
    1. 好返好多,不過又有皮膚敏感><
      所以仍然是要戒口!!!!
      天氣最凍果陣有帶頸巾㗎,不過一落到地鐵站超熱除都除唔切:P
      依家咁熱就唔駛頸巾啦^^

      刪除
    2. 喺咪啲藥令到你有敏感呀!
      定喺D暗病復發嚟呀!
      kakakaka…

      刪除
    3. 咁我係咪唔應該同你講咁多野呀?費事畀你野到XXXXXD

      刪除
    4. 睇嚟...D菌真喺好勁喎!食藥食到儍咗呀你…語無倫次咁架...你…
      家陣喺你話有病呀!我唔應該同你講咁多野至真呀!費事畀你野到至真呀!哼!!:P

      刪除
  27. 個排 d 菌好勁, 我都好小心, 免得病左潛唔到水 !
    你好番晒未呢 ?!

    回覆刪除
    回覆
    1. 係呀病事少,無得潛事大kakakakaka...
      好返D啦,thx^^

      刪除