2015年5月31日 星期日

2014古都瀟瀟@花漾溫泉

冒住只有5-6度的晚上氣溫,穿梭於竹海密林間、欣賞完嵐山花燈路的燈祭後,都係三步併作兩步雞咁腳撤退返去下榻的花傳抄溫泉旅館,因為實在太掛住那暖笠笠大浴池和非常期待的夕膳了!



這間花傳抄就在阪急嵐山站對面,一晚連夕食朝食兩餐人均¥18800(約HKD$1200)。這晚的夕食設頭圍(5:30pm)和尾圍(8:30pm),不過由於花燈路燈祭的亮燈時間只限5:30-9:30pm,所以幾乎大部份住客都book尾圍。上圖是夕食的菜單。



溫泉旅館的夕食一向都幾大堆頭,上圖是先來的前菜5小碟,大多是開胃的醃菜漬物之類,基爾特別喜歡上面喱條醃咸魚仔,完全不咸且帶小小甜味,肚裏很多魚籽,食落有點似食紅色魚柳乾那種零食(後來在錦市場見到,買了一袋回家)。



基爾賞完燈回到旅館其實已經過了8點,本來諗住先浸一陣溫泉才去食晚飯,最後為免太趕就打消了念頭,還是先醫肚緊要吧!



花傳抄這處食飯地方也有個挺詩意的名字,叫做「北山遊水」,裏面全部間成獨立小廳房,明星來到都唔怕畀狗仔隊偷影到。上圖是其中一款熱食,記憶中好似是黑豚肉,似打私家邊爐幾有趣好玩。



強肴方面(主菜)有得「剔紙仔」,感覺幾似日式放題選擇很多,初時又唔知道份量剔了每樣4份,好彩經侍應提點原來一份已夠4人食了。上圖是大量野菜和大蝦天婦羅(單單天婦羅就有7種:薩摩芋揚、海老天、烏賊天、茄子天、小芋天和甘長唐辛子天,「甘長唐辛子」是一種長條形的甜青椒,聽聞是關西的特產);此外仲有「燒物」的鱒之味噌漬。不過基爾覺得最特別是右面的金胡麻豆腐,很香芝麻味,食落滑嫩似布甸……



咁鬼多菜式真係單單食餸已經飽晒,但其實仲有滋賀縣產御飯以及拌飯的蟹柳和生薑香之物以及赤出汁(豆味噌湯),食食下仲開始飯氣攻心打瞌睡,連相都唔影啦!只影了甜品:草莓併羊羹仲有布甸,基爾向來怕食羊羹加上勁飽所以拿拿林拎畀人地食。



食到飽一飽本來想去浸溫泉,不過聽人話食飽即刻去浸對身體唔好,咁就先在旅館入面四圍hea蕩一陣當散步先啦!除了幾間手信店其實也沒什麼地方好逛,不過基爾特別好奇那5間獨立迷你包廂式的湯屋:竹庭之湯、霧之湯、絹之湯、茜之湯、夢想之湯(每個湯好似話有獨立造景和草藥)。上圖是湯屋外的休息室。



基爾見包廂湯屋外多數是一雙一對的情侶(或夫妻)在輪候,咁又係喎……如果情侶去大浴池就必須分開男湯女湯浸,相比起獨立湯屋就可享受零距離蜜蜜浸,肯定sweet好多吧(聽旅館職員話11:00pm後少人好多唔駛排隊)!不過基爾都係無謂同D戲水鴛侶爭排隊了,回房裏換定浴袍之後就乖乖行返去男湯大浴池那邊,剝光豬之後入到去竟然發現室內和室外露天浴池都完全唔見人影,變了私家包場咁正,真係梳乎過浸迷你獨立湯屋啦!

78 則留言:

  1. 見到你的美食太誘人……hk$1200唔貴,皆因日圓跌左……

    回覆刪除
    回覆
    1. 係呀依家100円更跌至6.3港元,更加抵^^

      刪除
  2. 日本食物餐飲完全啱口味,而且美味,
    住宿一定舒適清潔,好放心!

    回覆刪除
    回覆
    1. 除非係住大城市的商務酒店,否則日本食住一般都ok嘅

      刪除
  3. 食物很精緻呀。 自己泡都好,衛生D呀。

    回覆刪除
    回覆
    1. 溫泉旅館一般食住都ok~~~~
      其實浸完後我多數會再沖一次身,感覺好似自在啲:P

      刪除
  4. 情侶去大浴池就必須分開男湯女湯浸>> 咁要嚟奧地利啦,唔使分開咁慘.
    發現室內和室外露天浴池都完全唔見人影>> 基爾係咪好失望呢?

    回覆刪除
    回覆
    1. 番鬼溫泉多數著泳衣泳褲浸丫嘛,所以男女老幼都可以「共冶一爐」啦XXXD
      唔會失望喎,可以好好享受一下獨處的寧靜咪仲好!!!!

      刪除
  5. 總是覺得日本菜式細細碟, 感覺好難填飽個肚...
    咁夜咁凍仲要剝光豬, 邊個去浸呢??!!.....其實一個包場浸仲爽,都算幾難得的機會~~

    回覆刪除
    回覆
    1. "咁夜咁凍仲要剝光豬, 邊個去浸呢??"...咪喺!
      Gael 兄可能有"自虐狂"hahahahaha....

      刪除
    2. Sam哥感覺唔似咁大食喎~~~~雖然係細碟但因為其實都幾多碟,所以一定夠晒飽㗎!!!!食食吓仲會有點眼瞓XXD
      其實浸果度唔會太凍,可能有暖氣,水池冒上來的水蒸氣也幾勁,同埋落水之後完全唔會有凍的感覺,即使係戶外溫泉.
      所以盡量揀啲少人時段,上次去立山室堂都係

      刪除
    3. Kaka似乎聯想得太多吧:P

      刪除
  6. 咁又係......人人都獨立湯浸,造就你一人包場,爽啦~

    回覆刪除
    回覆
    1. 如果係好似你同大爺咁一齊去,又真係獨立迷你包廂式湯屋果隻正啲嘅^^
      我一支公其實浸乜都無所謂,費事阻住啲情侶去享受二人世界啦:P

      刪除
  7. 我好老土...未試過去日本浸溫泉的~
    係呢~~~~個夕食好吸引~~~~

    回覆刪除
    回覆
    1. 咁你今次去要試下啦^^
      喱間個夕食真係幾好味,同埋份量好勁,食完勁飽XXD

      刪除
    2. 其實都係無呀~~~因為無安排呢個環節~~~~~我要繼續做老土怪喇~
      我見到都超多野食~~~~~~唔知我會唔會飽呢~

      刪除
    3. 無所謂啦可能你會有更多其他新鮮玩意,一樣精彩^^
      夏天去京阪神一定又有好多好嘢食,又可以狂食抹茶雪糕XXD

      刪除
    4. 你覺得浸完有無好攰咁架?我淨係係台灣浸過一次...浸完好攰~
      係呀!!!!!!我要去食抹茶野~~~

      刪除
    5. 我又無特別攰感覺喎,不過浸完係瞓得好啲嘅^^
      要啦,好正呀

      刪除
    6. 係啦~促進血液循環新陳代謝嘛~人都訓得好d~~~(但係我地哥次係浸完行街~~真係有d變態~~~)
      其實我覺得除左綠茶之外~~京都d牛奶雪糕都好正~

      刪除
    7. Kakaka....每人習慣唔同嘅,行街relax都唔錯丫!!不過台灣係興著衫浸定係除晒浸?
      仲有佢地都興食「手羽」,不過我又唔覺太特別....

      刪除
  8. 我想起個笑話, 平時見佢地浸溫泉個塊毛巾, 我有朋友話用黎遮住塊面, 費事有人認得佢 XD

    回覆刪除
    回覆
    1. Kakakakaka......唔知係咪女士會比較介意啲,男湯果邊又唔係特別尷尬喎,反正啲人都唔識嘅,同埋浸落水之後乜都睇唔到,像去了泳池而已XXD

      刪除
  9. 嘩, 食物個賣相好靚呀, 睇到好肚餓添 ^^

    回覆刪除
  10. 哈…返尼先睇基太郎啦…

    回覆刪除
    回覆
    1. 今次係咪玩晒成個德國呀?!!!會唔會過埋去維也納?^^

      刪除
    2. 乜你成曰掛住維也納呀!今次同朋友去…冇計劃去個度喎!

      刪除
    3. 縱走德國(打橫切),加捷克布拉格。

      刪除
    4. 正到痺^^
      你好似去了幾次布拉格喎

      刪除
    5. 第二次咋!回程機票呢度平呀嘛!又近德國,朋友未去過喎。

      刪除
    6. 布拉格依家有直飛啦咩?!!@@

      刪除
    7. 要轉機呀!直飛邊會平俾你呀!

      刪除
  11. 回覆
    1. 日本嘢食單單視覺上已是一種享受吧^^

      刪除
  12. 啲晚餐好豐富呀,我就唔敢浸溫泉,怕醜麻,哈哈哈!

    回覆刪除
    回覆
    1. 喱間有獨立迷你包廂湯屋,你不妨考慮同DD去浸下啦,享受下二人世界^^

      刪除
    2. 多三個星期DD同仔仔去東京玩,應該冇時間去浸溫泉@@

      刪除
    3. 你唔一齊去咩?可以影多啲靚相啦^^

      刪除
  13. 回覆
    1. 通常溫泉旅館個夕食都幾豐富,浸完後去食一流^^

      刪除
  14. 這一餐真是好豐富!
    包場湯浴,好勁~~~~~~

    回覆刪除
    回覆
    1. 無需出錢又可包場,才是絕!
      哈哈哈 ......

      刪除
    2. 咁啱無人啫,我無鎖住道門唔畀人入㗎kakakaka....

      刪除
  15. 食物擺設好精緻 , 每樣少少可以試多幾款 , 呢餐真不錯呀 !

    回覆刪除
    回覆
    1. 無錯呀,其實份量少D都好,可以試多幾樣,否則食一樣就飽晒:P

      刪除
  16. 回覆
    1. 也不完全係~~~~心靈總是欠缺了一點點......
      XXXD

      刪除
  17. 晚餐超豐富喎, 仲有得玩剔紙仔, 肯定飽到瞓唔著啦!!!

    回覆刪除
    回覆
    1. 係呀真係有點過癮,突然有點似去茶樓剔點心又或者食日式放題那種熟悉感覺kakakakaka......

      刪除
  18. 我鍾意浸大浴池多D,地方大舒服D!

    回覆刪除
    回覆
    1. 都係㗎,怕人多可以揀啲少人時段囉
      獨立湯屋好似有點似在浴室自己浸浴缸:P

      刪除
  19. 看來這晚餐很豐富呢! 天氣冷很適合浸溫泉!

    回覆刪除
    回覆
    1. 無錯呀,浸溫泉都係去日本的主菜之一吧

      刪除
  20. 浸完温泉很舒服,去到日本我不會錯過的!

    回覆刪除
  21. 好正呀, 18000 YEN 算豪華 LEVEL WO!

    回覆刪除
    回覆
    1. 我覺得食方面都幾多樣化同埋份量幾多,個溫泉ok靚,住果間房就一般:P

      刪除
  22. 呢餐太豐富啦! 日本人永遠都係用心製作既~
    包場浸溫泉喎基爾~

    回覆刪除
    回覆
    1. 日本人做野始終有點質素保證吧,應該不會太過份,如果有黑心食品一定係驚天大新聞,佢地好注重個招牌商譽....
      對呀,喱間旅館有二人世界獨立湯屋添架,會唔會遲啲考慮同銀嫂去浸下?

      刪除
  23. Gael,日本温泉酒店的夕食真係好正.

    回覆刪除
  24. 食物擺設得好精緻,睇得又食得~色香味俱全!

    回覆刪除
    回覆
    1. 係咪讚緊我影得靚kakakakaka.....

      刪除
  25. 正呀, 包場 !
    溫泉旅館真係次次都要住番回先過癮 ~

    回覆刪除
    回覆
    1. 對呀通常至少都住一間啦一場去到.....^^

      刪除
  26. 希望他們有洗碗碟機,我成日都諗,洗咁多碟真係人都癲,哈哈!

    回覆刪除
    回覆
    1. 日式韓式都係勁多碗碟~~~@@
      不過我諗或許是半人半機械幫手吧!!!
      似乎你有一點感同身受喎,叫大豆幫下手丫嘛hahaha...

      刪除
  27. 日本的溫泉旅館真是好正,勁RELAX

    回覆刪除
    回覆
    1. 所以點都要住一晚半晚咁多囉^^

      刪除