2015年9月3日 星期四

2014古都瀟瀟@京都御苑

在二条城行到三點幾夠晒皮,睇地圖見京都御苑只係行多兩三個街口,咁唔好浪費時間行埋過去睇下啦!



買飛入二条城時特登問一問售票處職員可唔可以買埋京都御苑的門票(因為前年去名古屋時,發現買動物園和水族館的連票有特價;去東京的上野動物園出示passport也有discount),職員解釋一大輪,基爾只隱約聽到參觀御苑係要提早網上預約門票,無即場飛賣。



不過既然一場來到,而且只係行多兩三個街口,咁基爾一於照去摸下門釘啦(心存僥倖睇下有冇得博大霧入去)。去到睇睇門口個案內圖才知京都御苑係超大的,外圍係公眾開放的御苑,只有裏面的舊皇宮京都御所(天皇宮殿)、大宮御所(皇太后寢宮)、仙洞御所(太上皇寢宮)要預約。上圖左係御苑裏的拾翠亭和閑院宮邸蹟。



即使唔入皇宮,只在御花園行一陣,其實都有幾處清幽的大宅別苑可逛。由丸大町通這邊入去御苑,就有幾處古蹟睇,例如上圖這處閑院宮邸蹟就是昔日居於皇宮附近的親王故居大宅;至於上面提過的拾翠亭,就是九条家之遺構其中一部份。



昔日京都御苑附近有不少王公親貴富商的大宅,這是因為自桓武天皇於794年遷都平安京(現今京都)後,歷代天皇幾乎都住在這裏,現存的京都御所可追溯至1331年的光嚴天皇。上圖是閑院宮邸蹟裏的庭園和屋內的陳設,裏面的家具很有點60-70年代日劇的家居佈置feel。



1869年明治天皇正式遷都江戶城(即現時東京皇居)後,京都的皇室貴冑亦一同東遷,原本御苑範圍裏的皇室富戶大宅其後經歲月洗禮而日漸荒廢破落,大正和昭和年間陸續被清拆,只留下數座保存較佳的大宅苑,上圖的閑院宮邸蹟是其中之一,外貌看來有點似古雅的溫泉旅館。



睇完百年豪宅之後,再返出去御花園閒蕩,雖然係閒日下午時份,但原來都有唔少附近的市民來跑步和踩單車,事實上御花園真係又大又空曠,如果有單車租一定會方便得多,可以慳少少腳骨力和時間。上圖這類超大的百年老樹,在園內隨處可見。



上圖左是西園寺邸蹟;右圖是清水谷家之椋,就種在皇宮西南角,樹幹圓周達4米,據聞已經有逾300年歷史……



這棵老樹現時也好像老人家一樣,龐大的樹冠橫枝都需要巨型支架作「拐杖」,幸好它生長在京都,如果在香港就一定會畀人話危害路人要被鋸走。上圖左是皇宮圍牆,一直走就見到入口的清所門;左下則是宜秋門,現時不作開放。



京都御所正門就是這座清所門,門口有守衛檢查訪客的預約文件,基爾無上網預約所以就無得入去參觀了,網上睇過有台灣遊客入去參觀的網誌,裏面也有不少御殿亭台池塘花園的建築(與二条城裏大同小異),一年中也有部份日子開放參觀,如果嫌上網預約麻煩,也可選擇這些日子去(註:今年秋季賞紅葉開放日10月30-11月3日)。



冬天來京都比較快日落,下午4點幾5點已近黃昏,差不多時間要搭火車返大阪會合友人。京都御苑外圍也有不少上圖這類古老的御門,穿過這座「時光門」又可重回現代世界汽車來往如鯽的大馬路……

59 則留言:

  1. 回覆
    1. 好野吖!執走哂D人喎。kaka.........

      刪除
    2. 你哋當影相嗰個gael兄唔係人咩?!!.....XXXD

      刪除
    3. 要用放大鏡...先睇到基爾哥啲細細個人啲相架!!kakakaka.....

      刪除
    4. 乜呢輯相唔係:走進大人國 咩?kaka...

      刪除
    5. 王子:有呀,至少相中影到有皇宮大門口的securityXXD

      刪除
    6. JJ:執走哂D人要好高技巧架喎,我未夠班.....
      咩大人國呀?唔明???

      刪除
    7. 森:咁我又冇selfie冇入鏡佢地咪唔當我存在囉XXD

      刪除
    8. Kaka:細細個咪仲好,至少唔驚畀人偷囉XXXD

      刪除
    9. 基太郎走進大人國後,粒芝麻都遮哂你,好難揾到你啦!

      刪除
    10. 咁做細有做細嘅著數嘅wakakakaka...

      刪除
  2. 令我諗起新宿都有個新宿御苑!!係咪就係解皇宮既花園??
    咁可能全日本有好多個喎可?
    你去哥時咁正既~~~~一個人都無~~~影到靚相~

    回覆刪除
    回覆
    1. 新宿都有御苑架咩?未去過呀我~~~~
      係皇宮既花園,以前天皇住在京都幾百年嘛,明治時代先搬家去東京!
      咁可能全日本有好多個====>都唔出奇呀,皇帝梗係通常好多頭住家,又有好多別墅花園之類啦!!
      可能係平日下午,加上又唔係賞櫻或賞紅葉旺季,我諗遊客也不多吧

      刪除
    2. 好似有呀因為有時行GOOGLE map呢我會見到~~~(但唔知我有無記錯~~~)
      咁又係呀~~~~有d避暑既~有d避寒既~~~~真係要多幾個皇宮~~~
      不過你去哥幾日都唔錯地好天就係一個事實~~正~~

      刪除
    3. 喱日就好好天,但之前果日去清水寺就勁大雨:P

      刪除
  3. 香港可以有這樣的一處地方,讓人靜靜散步,那就好了!

    回覆刪除
    回覆
    1. 其實大埔公園和龍尾那邊如果平日下午去也不錯的,夠靜^^

      刪除
  4. 成個園好似俾你包場, 無其他遊客

    回覆刪除
    回覆
    1. 平日下午唔多人都唔出奇呀,可能啲團主要係上午來....

      刪除
  5. 現在樹横枝都要「拐杖」!

    回覆刪除
    回覆
    1. 要呀,因為横枝和樹冠實在太大了

      刪除
  6. 京都御苑可能唔係遊客熱點,加上是冬天,所以人少,又早收。

    回覆刪除
    回覆
    1. 應該唔算係,至少唔見有大媽團來kakakaka....

      刪除
  7. 這地方感覺很寧靜, 仿似時空停頓了~~

    回覆刪除
  8. 好寧靜的京都御苑....基爾哥,點解你唔post啲有你細細個人亮相啲相嘅??

    回覆刪除
    回覆
    1. 費事畀人偷咗拎去信和賣kakakakakakaXXXD

      刪除
    2. 啊!原来就喺你唔post啲有你大大個人亮相啲相...嚟畀人偷,
      攪到而家信和賣晒啲韓星型男相!kakakaka...

      刪除
    3. 信和依家仲有明星相賣架咩?kakaka.....

      刪除
    4. 真喺唔知!
      極有可能...就喺你...攪到人哋執笠...kakakaka....

      刪除
    5. 咁第時偷你啲靚靚風景相畀佢地賣下,當係幫補啦wakakakakakaXXXXD

      刪除
    6. 你真喺呀...唉!
      啲韓星型男相...啲妹妹仔先鍾意架!!wakakakakakaXXXXD

      刪除
    7. 都唔一定嘅~~~~砌圖通常都係用風景靚相^0^

      刪除
  9. 我覺得京都御苑是值得去參觀的。

    回覆刪除
    回覆
    1. 我覺得好值得去睇,不過要預約就麻煩啲,佢主要係因為要安排導賞員帶你行,其實我覺得自己遊逛都可以,不一定要導賞....
      御苑外圍如果有單車租更佳,方便好多

      刪除
    2. 您的日文一定好好!(若然我識日文,一定會自由行。)

      刪除
    3. 日文水平應該同你差不多吧XXD

      刪除
  10. 我有時都係咁,咦!喺附近喎去埋先,攪到好鬼攰。

    回覆刪除
    回覆
    1. 銀團長好多時都係靠喱份好奇心,多咗好多新奇有趣野寫畀我地睇,攰都抵啦^0^

      刪除
  11. 我就欣賞佢地啲古樹和植物認真保育了!

    回覆刪除
    回覆
    1. 這要視乎國民素質和對大自然的尊重及價值觀而定了.....

      刪除
  12. 御苑外圍都好多野睇,入面可能更精彩,哈哈~

    回覆刪除
    回覆
    1. 我睇台灣遊客blog有介紹入面啲亭台樓閣,如果唔怕煩咪上網預約入場券囉^^

      刪除
  13. 回覆
    1. 唔多,因為大多早已落了,只剩幾棵小樹而已

      刪除
  14. 百年老樹香港難得一見 , 但這裡隨處可見 , 他們對保護自然環境做得很好 .

    回覆刪除
    回覆
    1. 香港郊區會比較多,市區就好少有大樹,因為人本身都已經唔夠地方住,何況係老樹:P

      刪除
  15. 其實, 京都都真係好多古色古香的建築, 慢慢行都可以玩好幾日.
    暫時我未夠修行, 都係去下郊區先 ~

    回覆刪除
    回覆
    1. 如果櫻花季節去會幾靚,不過酒店就要預早book囉,因為通常都好full.....

      刪除