2016年2月22日 星期一

意廊@沙田

以往造冬或團年如果不想煮就多數去酒樓食,不過喱類大時大節通常冇得訂位之餘仲要被迫叫熱推套餐,所以基爾一家繼舊年去Pizza Hut造冬之後,今年食團年飯又有新創意……



以往基爾間中都有來幫襯喱間位於河畔的酒店,因為佢個lunch buffet間唔中會有五五折,百幾蚊位菜式選擇算多所以都幾抵食,閒日去客量不多非常清靜。不過今次團年飯就移師地下的意廊。



顧名思義這就是間意大利菜餐廳,年廿九晚來到不太多人(可訂座)。基爾覺得佢個4人自選套餐非常抵食,連加一都係約$1000。特別喜歡佢個自助頭盤及沙律吧有好多款沙律菜、芝士、麵包餅乾和果乾,仲有不斷添加的煙三文魚,正過Pizza Hut以前果個salad bar好多,要重點一提係佢果兩支無花果和士多啤梨黑醋,真係超…級…正!



除了頭盤沙律可自取之外,其餘都是4人份量,包括soup of the day(記憶中係忌廉湯),至於pasta方面就選了上面喱個香蒜白酒忌廉藍青口闊條麵(另外還可選煙肉忌廉汁意粉或紅酒燴牛肉雜菜貝殼粉),基爾覺得D青口仔實在太細隻唔係好夠攝牙罅,但肉質尚算ok。



跟住仲有個snack platter,除了fish finger(配他他醫)幾好味之外,仲有黑椒蜜糖雞翼、炸蟹肉餅以及意式烤豬肋骨。佢個ribs個醬幾好味,仲有個tartar sauce幾乎畀我點晒,直豎拇指!



套餐不可少的仲有個12-inch pizza,結果選了上面喱個巴馬火腿牛油果批(另外還可選煙三文魚批和Quattro Formaggi批,不過因為出面salad bar有無限量芝士和煙三文魚供應,所以還是選了Parma Ham),其實基爾都幾鍾意食喱類薄批,好脆好香口,但基爾媽唔識欣賞猛話唔夠芝士,又話鍾意食PH果D厚批多D。



至於entree只有兩個選擇,分別是燒春雞及上面喱個意式烤羊鞍(配薯仔及炒時蔬),基爾覺得個羊鞍唔算太羶喎,是可以接受的程度……平時也有食開枝竹羊腩煲的基爾媽反而覺得這羊鞍有點羶。



最後仲有甜品和coffee or tea,蛋糕一般而已沒太大特色,如果有cheese cake更佳,反而杯cappuccino幾好飲唔太甜。



講完團年飯順帶又講埋開年飯,今年繼續encore了稻香盆菜,年初二晨早基爾去晨運發財跑順便去隔籬村拎盆菜,同去年一樣相當足料,$888的價錢仍算是合理吧!不過舊年一次過落晒兩樽醬汁實在太咸了,今年汲取了經驗先落大半樽,唔夠先酌量再加會好一點。



之前講過刨蓮藕絲整蓮藕餅,今次再整埋籮蔔糕,之前睇肥媽食平D教刨籮蔔絲,可以留返個籮蔔椗來搾手就唔駛驚刨傷隻手,基爾試過又真係幾好刨喎!睇烹飪節目真係經常可以學到新知識。



餡料方面除了慣常的臘腸和蔥花之外仲有蝦米,不過今年蝦米好貴,索性升級用蝦乾,然而蝦乾太大條,要先一剪開三。其實整糕過程和製成品本來都有影,但唔知點解D相後來發現爛了打不開……



年初三赤口與舊同學食開年飯(由團年飯約到變開年飯),因為有好多食肆仲未開,一波三折後終於決定去食新世紀的Outback,之前睇blog友講先知佢開了在6樓,初三去到門口逼滿人,幸好多數係對面茶樓D等位客。



睇完menu後,初頭諗住叫兩個lunch set之後再散叫其他小食,不過waiter哥哥話散叫份量同個套餐係差不多,叫套餐會抵食D云云,咁又係喎套餐只係$78-88,以美式餐廳來說係非常非常抵食,而且份量都幾大,最後叫了牛柳粒串燒、香芒燒雞肉沙律和燒肉醬味豬肋骨3個餐,食到飽一飽人均才$100,以新年檔期計平過去茶樓啦!

p.s.有冇發現Outback食果餐又係冇乜影相!唔知點解個電話又神神地,D相又係爛晒開唔返,究竟係咪時候要考慮換新手機呢?下次都係帶返架相機傍身穩陣D。

意廊 Avanti Pizzeria
沙田大涌橋路34-36號麗豪酒店地下

69 則留言:

  1. 回覆
    1. 我都覺得呀,PH果啲厚芝批一角已經飽晒

      刪除
  2. 初三個張相好得人驚,好似人頭湧湧咁喎

    回覆刪除
    回覆
    1. 出面果間茶樓真係多人得誇張呀

      刪除
  3. 呢間酒店自助餐我都吃過幾次,佢哋隔幾年就有客人食物中毒入面院新聞,希望佢哋製作好些,一改負聞。

    回覆刪除
    回覆
    1. 乜咁大劑?!!會否就因為咁而以實惠價錢來挽回顧客信心??

      刪除
    2. 咁我又唔知喎,森兄會唔會親身去做個人體實驗kakakakaka....

      刪除
    3. 新年流流中招就唔好啦!!哈哈哈~~講笑講笑!!
      除非有Gael兄請食就唔同講法!!!

      刪除
    4. 可能我多數係去lunch buffet所以無生蠔供應,中招機會不高吧,反正我也不愛食生蠔所以就無乜所謂了!
      森兄真係夠朋友喎竟然敢以身犯險kakakakakaka.....

      刪除
  4. 自己整蓮藕餅,籮蔔糕最正!

    回覆刪除
  5. 回覆
    1. 我覺得幾足料喎,價錢算係合理了....
      之前聽過大X樂果啲係平啲但材料差好多云云

      刪除
  6. 我哋今年做節飯在附近酒家,貪佢人少少而且就腳~~
    你識整蘿蔔糕?!!乜嘢係晨運發財跑?!!

    回覆刪除
    回覆
    1. 在家附近最好啦唔駛舟車勞頓丫嘛
      識呀,唔難,不過一年都係只整一兩次而已
      朝早無野做去跑個圈運動下啫

      刪除
  7. 我鍾意佢哋嘅sweet potato fries .

    回覆刪除
  8. 係邊個揸主意食西洋野過冬? ^^

    回覆刪除
  9. Pizza Hut、意大利菜造冬?好有創意。
    意大利菜4人連加一祇是$1000,超抵!
    祝元宵節快樂!

    回覆刪除
    回覆
    1. 我覺得OK喎唔多人又唔駛被逼食指定套餐
      大時大節喱個價錢係算抵食啦
      也祝你元宵甜蜜快樂^^

      刪除
    2. 嘩,好計!可以一年吃一個國家的菜,有新意又節省金錢又不用同人。哈哈哈

      刪除
    3. 好明顯係懶咗,少咗你啲推動力kakakakakaka......

      刪除
    4. 我不是推手,是粉絲,哈哈哈

      刪除
    5. 咪玩我啦,我是你粉絲才對kakakakaka.....

      刪除
  10. 謝謝分享! 祝賀, 新十五元宵佳節愉快! 闔家人月兩團圓啊!

    回覆刪除
  11. 我家都很另類架,不喜歡大時大節出外食,係唔想同人逼,食得唔舒服。

    回覆刪除
    回覆
    1. 對呀,所以中式節日食西菜,西式節日食中餐最好kakakaka....

      刪除
  12. 睇你啲blog要好忍得. 近半年重了差不多十磅,條條褲着唔落, 皆因eat out太密.

    回覆刪除
    回覆
    1. 咁Peter哥要去行多啲山運動多啲消耗返先得啦^^

      刪除
  13. 我家開年飯,也選了吃自助餐!
    甚麼時候可以試試基爾哥哥的廚藝?

    回覆刪除
    回覆
    1. 自助餐開年飯也是不錯的選擇呢...
      等我苦練下先^^

      刪除
  14. 依...個盤菜幾好WO, 肥人下年都訂番個拎返娘家食先~
    西餐食團年都幾好WO...又唔洗同人迫又唔使被迫叫餐!

    回覆刪除
    回覆
    1. 材料都幾豐富,6至8人都夠食呀
      喱個方法唔錯呢^^

      刪除
  15. D老人家仙遊後,我家族改為家庭聚會,唔會揀大時大節食飯了,以免被人掠到一頸血

    回覆刪除
    回覆
    1. 依家大時大節去茶樓食飯無得訂位之餘又人多太麻煩,菜式選擇又有限制,仲有畀貴啲,真係唔多抵....

      刪除
  16. Sky 就覺得帶返架相機傍身好D^^

    回覆刪除
    回覆
    1. 你又講得幾啱,不過我好多時都唔記得:P

      刪除
  17. 作爲沙田友,我之前時不時都會去意廊
    之前恒生信用卡仲有85折添呀!好抵食~

    回覆刪除
    回覆
    1. 係呀我覺得唔錯,大時節無特別加價之餘,環境也坐得舒服^^
      卡有discount更食得開心啦kakakaka....

      刪除
  18. 我都鍾意反其道而行, 因為怕同人迫
    基爾兄好勁呀, 我覺得男士識煮嘢食已經好好, 基爾兄仲要識整傳統糕點, 我要俾10個like!
    冇製成品睇有d可惜, 可能真係換電話嘅時候
    我鍾意Outback個黑糖麵包

    回覆刪除
    回覆
    1. 大時大節如果要出街食,喱個都係良策^^
      學定少少基本功傍身都係好事來的,至少唔怕會餓親kakakaka...
      過年反正有空,先有機會學下整喱類傳統糕點,平時都好少整:P
      係啦個電話都唔知搞乜,好有性格會間中罷工XXXD
      原來有黑糖包,走漏眼@@

      刪除
  19. 基爾大大新年食好多好野bor,有冇重左呢?
    係時候換電話啦~

    回覆刪除
  20. 4人自選套餐,連加一每人都係約$250,啲煙三文魚仲有得不斷添加添,真喺超抵食喎!!
    巴馬火腿牛油果批...正!

    回覆刪除
  21. 好多美食 , 大節日改吃其他地方食物不用吃特定套餐非常好 , 可惜我家中老人家節日愛吃傳統餸菜 . 

    回覆刪除
    回覆
    1. 咁就無法啦唯有提早做節或者預早book位啦^^

      刪除
  22. 以前香港過年度度都唔開, 現在可好了

    回覆刪除
    回覆
    1. 依家好好多,舖租貴唔可以休咁多日kakakaka....

      刪除
  23. 河畔咪喺富豪呀?
    我有朋友識經理,buffet可以用員工價,但以我來講太遠,好少去。
    lunch通常都好抵。
    扒類少食,太多肉我消化唔到,
    你果然入氣blogger,我look你啲留言都成分鐘。

    回覆刪除
    回覆
    1. 路霸哥,是呀!
      喱間個lunch係無生蠔長腳蟹果啲貴嘢,反正我不太食海鮮就沒所謂了,價錢也平了一舉兩得.....lunch好過夜晚食buffet,多啲時間消化唔怕頂住胃瞓XXXD
      我都鍾意佢個salad bar,好多菜又有果醋黑醋,好正
      其實係錯覺而已,只係我太懶少咗update,積積埋埋就多咗留言啫:P

      刪除
  24. 意廊曾經係我愛店,不過熟悉嘅大廚同waiter哥哥走咗之後就少去咗~

    回覆刪除
    回覆
    1. 之前我又無來過,唔知同之前大唔大分別呢?

      刪除
  25. 巴馬火腿牛油果批~因為牛油果清新味道應該幾正下!

    回覆刪除
    回覆
    1. 可能牛油果味道本身偏淡,我又唔係好食得出:P

      刪除
  26. 原來Gael都係厨神喎!👍👍👍

    回覆刪除