2017年10月25日 星期三

珍郵庫@旗袍

眾所周知依家果位本市首長係愛穿旗袍出名,唔知係咪咁所以郵署今年都要賀一賀佢坐正,出返一套以旗袍為主題的首日封!



話咁快又來到2017年尾,餘下新發行的首日封除了上面這套旗袍之外,就只剩11月中出的竹刻,其實喱兩套都幾靚好值得一訂。另外,2018年度的首日封也開始接受預訂了,有興趣的就趕快去郵局拎返張簡介和預訂表格,基爾覺得明年底的粵劇和金庸人物兩套也是超靚,屬必訂之選!



講返今次喱套旗袍郵票,設計本身都頗具東方韻美。上圖可見首日封左邊的傳統織花紐扣字樣和裁剪紙樣圖案的特別郵戳都很有特色,$10小型張上的旗袍形郵票也是香港首創。唔知有冇人細個時玩過剪紙果種換衫時裝紙公仔,這款小型張的設計就很有那種懷舊玩具的味道了!



Close-up再睇真D郵票!唔睇封背個簡介都唔知,原來旗袍設計的歷史已有近一世紀,主要承襲了清朝旗人長袍的特式。先看上面3款:$1.7是1920年代的旗袍,看清末民初劇集經常會見很多女角色會穿這款長衫,裙襬和衣袖都比較寬闊平直保守;中間$2.2金黃色的是1930年代款式,開始凸顯窄身修長線條,裙身兩側開叉較高方便走路,30年代不少上海明星歌星老照片都會穿這款;$2.9深藍色是1940年代流行款式,裙身明顯縮短,也可能因二戰關係,衣料也較平實,裝飾較少……



再看餘下3款:$3.1綠色的是1950年代流行款式,袍身纖窄裙襬收窄衣領加高,是當年白領麗人最端莊得體的上班服裝;$3.7紫色的是1960年代款式,同樣是短身、修腰、貼身剪裁,營造葫蘆身形效果,是當年女性體態美的標準,難怪不少粵語長片中的女星都穿這樣;最後$5紅色的是1970年代款式,由於西式衣裙興起令旗袍漸受冷落,但在一些宴會或選美場合仍會被視為禮服穿著,時至今日還有部份歷史悠久的女校仍會保留民初時代承傳下來的長衫校服設計。

旗袍
發行日期:2017年10月17日

86 則留言:

  1. 旗袍真係好蝦人著, 唔係人人都著到

    回覆刪除
    回覆
    1. 都係㗎,身形一定要好fit,有少少肚腩都現形XXD

      刪除
  2. 1920s咁鬆身嘅都係旗袍?

    回覆刪除
  3. 我睇新聞報導有介紹,我都鍾意這批郵票,很有香港特色。我都有兩條旗袍,一條唐裝衫架。

    回覆刪除
    回覆
    1. 通常係咪去飲果陣先著?我諗平時返工應不會穿吧,相信穿上身要成日提醒自己挺胸收腹先可以保持體態穿得靚.....

      刪除
  4. 講起首長,突然諗到郵政署會唔會整番幾套領導人頭像的郵票?
    哈哈,我又諗整咗之後可能要炒魷…又或冇人買!

    回覆刪除
  5. 旗袍,是絶美華麗大方的服裝,而且手工考究。
    我細個時玩過剪紙果種換衫時裝紙公仔啦!不過是童裝。

    回覆刪除
    回覆
    1. 粵語片時代係幾興嘅,東方女士總會有一套傍身,出席大場合時可以穿吧!!
      我諗依家應該無人知時裝紙公仔係乜啦XXXD

      刪除
  6. 旗袍係幾靚,不過着出街好似太誇咁 :P

    回覆刪除
    回覆
    1. 去飲果陣應該都有人著嘅,同埋去選美囉XXD

      刪除
  7. 我其實都偏愛旗袍,着住出席各種喜慶場合都適合同大方得體... 可惜個身形無着旗袍嘅條件... 哈哈

    回覆刪除
    回覆
    1. 番鬼可能覺得東方女士穿上旗袍特別有民族風美態.....
      如果剪裁適合我諗都唔驚嘅,況且你勤做運動相信一定會有條件^^

      刪除
  8. 好靚!旗袍珍郵應該一早要出啦!

    回覆刪除
    回覆
    1. 咁可能想趁返首長登基的時機啩....XXD

      刪除
  9. 嘩嘩嘩,終於等到啦。hahahah
    旗袍好靚, nope, not me!

    回覆刪除
    回覆
    1. wakakakaka....都唔駛等好耐啫:P
      唔係喎,第時飲新抱茶女婿茶果陣MD應該都要著一著㗎喎係咪^^

      刪除
  10. $10小型張quite special with the holes punched following the 旗袍

    回覆刪除
    回覆
    1. 對,唔知會唔會真係有人捨得搣出來用來寄信?
      如果貼在信封面寄去外國會好有特色呢!

      刪除
  11. 今次有好多人自製明信片做極限片/原圖咭,佢地摵出$10/$20貼在片上。

    回覆刪除
    回覆
    1. oic~~~~咁收到果個都幾開心喎.....
      另外今次仲有出小版張,一大張有齊晒6款郵票都幾靚㗎,不過我就無訂了:P

      刪除
  12. 可惜明年金庸小說和粵劇冇出同郵票一樣嘅已附郵資咭。金庸小說嘅已附郵資咭只係當活動漫畫30張打一個武俠招式。要自己做極限片有啲難度。

    回覆刪除
    回覆
    1. 我通常都只係買郵票和首日封而已,其他明信卡郵資卡套摺果啲我就好少買,因為實在無地方擺咁多囉XXD
      活動漫畫喱個idea真係幾正喎,我諗一定有好多捧場客啦!

      刪除
  13. 其實哩套郵票幾靚幾特別,唔知而家仲有冇賣?!!…

    回覆刪除
    回覆
    1. 森兄可以去附近郵局問下,因為才剛出不久可能仲有存貨吧^^

      刪除
    2. 唔該gael兄, 或者去問問睇下仲有冇…

      刪除
  14. 渣頸就命o既唔好預我啦,飛得唔舒服o架嘛,睇人表演仲好過。
    人著衫,唔要衫著人。靚字其實好沉重!

    回覆刪除
    回覆
    1. 你又講得啱喎,夢通常都係自由自在不受約束㗎啦...XXD
      好期待看看JJ穿衣的taste!!^0^

      刪除
  15. 呢套唔錯喎~幾有特色~我覺得今年哥d郵票都做得唔錯!!
    下年有咩特別野出呀??

    回覆刪除
    回覆
    1. 今年都有幾套唔錯呀,例如之前講過的饒宗頤/購物街/花卉植物同埋颱風都幾有特色嘅!!所以都洗咗唔少錢....:P
      下年就無訂咁多啦慳錢啲,金庸同粵劇睇個sample係幾靚嘅,不過都在年尾先出!

      刪除
    2. 購物街我都幾鐘意~仲有五感我都幾鐘意呀~幾得意呀~
      咁快得睇架喇..又幾快手喎~~~~但會唔會無左每個月新出既哥種期待感?

      刪除
    3. 佢通常年尾就有出明年的訂購表格,上面有啲sample睇下嘅,其實咁都幾好,核突果啲就唔駛花錢丫嘛XXXD

      刪除
    4. 但又係左少女哥種若隱若現既驚喜~~
      夠變態無~

      刪除
  16. 中國旗袍很美,而且最能表現東方女仕優美的身段。

    回覆刪除
    回覆
    1. 你會唔會都有一套傍身?.....^^

      刪除
    2. 有一套唔難,但要有優美的身段就........哈哈.....

      刪除
    3. 各花入各眼啦,自然就是美wakakaka....

      刪除
  17. 旗袍很美,但好蝦人著!
    愛穿旗袍的公眾人物,我一定會想起利夫人。
    而相信電影「花樣年華」中的多款旗袍,最叫人印象深刻。

    回覆刪除
    回覆
    1. 阿摩看來最懂欣賞這種古典美^^
      絕對係icon人物,一年一度台慶唔知會唔會又亮一亮相?
      這套電影的美指服指都應記多功.....

      刪除
  18. 咁旗袍之前呢?嫦娥裝?😝

    回覆刪除
  19. 旗袍要著得靚,好講女性的體態能否配合呢。

    回覆刪除
    回覆
    1. 其實可以掉轉頭咁講:好的體態即使穿背心短褲也可以很美^^

      刪除
  20. 這套旗袍郵票~好有60-70年代女士美感!~直得收藏.

    回覆刪除
  21. 郵票用旗袍很特別又靚 , 現在街上難得一見有人穿了 .

    回覆刪除
    回覆
    1. 又係喎,平時都唔多見,間中有大間酒樓知客會穿吧

      刪除
  22. 以旗袍為主題嘅郵票,好特色又彰顯著傳統裁縫手藝,唔知有冇另外一套係男仕嘅唐裝呢

    回覆刪除
    回覆
    1. 對,我諗裁縫師傅也不多了.......
      Good idea~~~~~下次要出男裝啦!!^^

      刪除
    2. 睇完你篇旗袍郵票誌,今日路經郵局又中伏

      刪除
  23. 超喜歡!要買!希望仲有!

    回覆刪除
  24. 哈...一睇到旗袍就聯想到以前酒樓知客,仲要開到超高义.....
    但近年無乜喇

    回覆刪除
    回覆
    1. 我諗依家都好少啦,始終換洗唔太方便又無咁襟成本又貴啩,酒樓削開支都係一切從簡算吧啦!!

      刪除
  25. 差點走寶!設計得好有心思,有時代進程。

    回覆刪除
  26. 旗袍為滿州旗人的服裝,曾經盛極一時。今年9月東北沈陽故宮舉行了一個旗袍表演,有傳統的和創新的。

    回覆刪除
    回覆
    1. 滿人穿旗袍係咪更加正宗,原汁原味^^
      瀋陽故宮我也沒去過,相信好值得一遊.....

      刪除
    2. 我也沒有去過東北,這個消息和圖片都是九月在網上看到的。

      刪除
    3. OIC....我諗如果依家喱個時份去應該風景都好靚,可以去看雪^^
      不過要頂得住零下十幾度的嚴寒:P

      刪除
    4. 上周天氣報導國內新疆在零下-30度;今天瀋陽零下-7度,往年零下-十多廿度是常事。當地全城室內有暖氣供應,沒大問題。

      刪除
    5. 零下30幾度真係不敢想像係凍到點,但應該都係已經麻木咗XXD
      我比較怕暖氣,感覺悶焗又superdry:P

      刪除
  27. 這套郵票註明了旗袍的年代,十分專業有特色,值得收藏。

    回覆刪除
    回覆
    1. 係啊都幾有趣味,可以見到旗袍百年來的演進

      刪除
  28. 好靚呀, 旗袍真係好難著得好睇...以肥人咁矮既身形...應該...haha

    回覆刪除
    回覆
    1. 依家有個大衣櫃,咁可以有大把位買返啲靚衫啦wakakakaka....

      刪除