舊金山居閑話@食早餐

年初七「人日」食了生日蛋糕未？如果未就先來同基爾食個醒神早餐先。吓！食早餐有乜野好講？連食早餐都可以寫一篇blog咁勁？唔信……咁等基爾示範畀你睇！

平時返工返學的blog友，唔知一般會係在家食早餐？還是去7仔M記買返公司食呢？又或者在茶餐廳快餐店食飽先再返工返學？基爾由細到大個人向來都係比較me-more，為免遲到都會比較早起身，由以前讀書到依家返工都慣了先在家食了早餐才出門……



咁去到異鄉唔駛返工，就更之然多數在家慢慢hea嘆早餐了吧！而且因為時間充裕所以仲要升埋呢添，可以玩埋自製麵包。老實說基爾在老家沒有買麵包機，因為落街買磅方包排包之類實在太輕易了，但在異鄉要早餐食新鮮出爐麵包又唔係咁容易周街有便利店麵包店可買到。



簡單而言只要隔晚將麵粉、酵母、鮮奶、牛油、鹽糖（視乎個人口味可以加提子乾或合桃之類）放入機裏，set定時間掣第二朝就有得食。上面第二果張榮幸邀得基爾媽特別客串示範用切包架，不過角度問題睇唔清，網上再搵張清楚少少，唔會切到成舊麵包扁晒，幾好用。另外上面這種ham都幾好食，唔清楚老家D超市有冇得賣？



另外，異鄉地方大，廚房和煮食爐頭自然都係XXL，一大清早如果同時要快快手煲水、煮麥皮、煎蛋又煮麵再淥埋個水餃都無問題，不過先決條件當然係要一位能幹的top chef才行。好似基爾喱類掛P牌的攀車邊小廚，都係頂籠顧兩個爐就算啦！



早餐除了食粥食麥皮食麵包夾煎蛋火腿之外（仲有煎餃子、淥水餃和焗muffin），當然不可少仲有搽花生醬或者上面這種基爾在老家時沒有食過的杏仁醬，食落其實同花生醬分別不大，但聽聞話係健康少少喎！所以都買了上面這種個別包裝的拎返老家食。



順帶又講下Trader Joe's果間超市，感覺有少少似美版的價真棧之類（當然也是XXL版），裏面都好多款朱古力、餅乾、果仁、各式花生醬果醬之類賣，而且價錢又幾平喎。上面喱排朱古力話係cold brew coffee兼caramel夾心，只係幾蚊一大排咁就買來試下。冰滴咖啡基爾本身都未飲過，食落隻朱古力都幾濃咖啡味，至於個焦糖咖啡夾心幾特別，唔似拖肥咁杰又冇酒心咁稀，係中間的黏稠度，幾有趣未食過！