2018年5月10日 星期四

士林台灣麵@元朗

暫時將幅為食地圖又搬一搬返來老家先,之前提過去元朗新田的購物城運吉,無獨有偶今次也是以元朗作為覓食據點。



山長水遠搭巴士來到又新街,係咪絕大部份人會先去幫一幫襯果間甜品店?不過今次基爾無去喎,難度係驚忍唔到口食得太多甜野會變肥仔嘜,到時著唔落金山買返來果D靚衫咪弊加科!



既然係咁就封一封口先(暫時架咋)!見行行下又行到去千色店,一於去行多陣街當係消耗下D卡路里,陣間去食野就唔駛咁就住就住,驚積聚熱量啦(自我催眠中)……



行千色店其實都係齋睇無乜野好買,唯獨係超市果part發現了筍野,之前聽同事講啡色罐果隻韓國午餐肉好食,見佢咁橋有買一送一discount喎,即係$35有兩罐,咁抵唔駛諗即入貨。回家後已試食,覺得真係無一般午餐肉咁咸而且不油膩,幾好食值得一試!



行完千色店之後都成點幾兩點,係時候移師去隔籬街的目標地帶,結果好輕易就搵到喱間好旺場的士林台灣麵,等位等了近半粒鐘先有得坐,梗係拿拿林叫野食啦!結果叫了一個酸辣香酥排骨麵($49)和一碟香酥雞扒飯(配肉燥$49)仲加多杯珍珠奶茶($18),另外還叫多一客香酥排骨($43),以3人份量計相當夠飽。



豬扒和雞扒都有乒乓球板咁大塊很足料,不過基爾對酥炸類食品有少少顧忌,都係淺酌輕嘗適可而止吧!據聞老闆曾在台灣學藝超過廿年,肉燥食得出很有點台灣風味呢!

士林台灣麵 Shilin Taiwan Shop
元朗西菁街9號富盛大廈地下

45 則留言:

  1. 我和雀后都食過呢間,好食又抵食。點解怕食酥炸?怕熱氣?

    回覆刪除
    回覆
    1. 勁呀都話你仲熟路過我㗎啦wakakaka
      係呀怕熱氣,下次食麵和其他野可能無咁熱氣.....

      刪除
  2. 怕熱氣咪剔走個外皮先食囉.

    回覆刪除
    回覆
    1. 係呀有部份都拆咗外皮先食,其實有時食KFC我都會:P

      刪除
  3. 士林台灣麵有點台灣風味呢! !

    回覆刪除
  4. 元朗少到,有機會我會試試!

    回覆刪除
    回覆
    1. 如果有地膽朋友帶路其實元朗都有好多知名食肆選擇:P

      刪除
  5. 台灣食物幾啱香港人口味.

    回覆刪除
    回覆
    1. 叫做最接近口味啦,所以成日都咁多人飛過去都係為咗掃街啫:P

      刪除
  6. 台灣我未去過,還是在杳港試試台灣口味的食物先。

    回覆刪除
    回覆
    1. 對呀,依家HK都開了不少台式食肆,不妨先去試個pre-trip^^
      台灣都好值得一遊,自然風景都靚,喜歡掃街又多夜市逛,最重要係勝在近近地,你去過日本歐洲咁多地方,台灣應該無難度吧

      刪除
  7. 台灣既美食真係好吸引人!

    回覆刪除
  8. 以前去過, 價錢還可 ... 紅燒牛腩又冧又好食! 麵夠甄韌彈牙特色來的!

    回覆刪除
    回覆
    1. 原來咁多blog友都有去過,唔怪得佢咁旺場.......

      刪除
  9. 元朗仲有B仔涼粉都OK GAR,大大碗,有生果粒。

    回覆刪除
  10. 韓國午餐肉我老伴買過,一啲都唔好食,你買邊隻牌子呢?

    回覆刪除
    回覆
    1. 啡啡地色個罐,有膠蓋,唔記得係乜牌了
      主要係無咁肥和咸:P

      刪除
  11. 日光日白咁多人坐晒出面,D生意好好哦!

    回覆刪除
    回覆
    1. 點幾兩點鐘去到都仲要等位等成三四個字.......

      刪除
  12. 我久不久都會到元朗行街 , 熱鬧又多嘢食 , 呢間未幫襯過原來咁抵食搵人都要去食下 .

    回覆刪除
    回覆
    1. 依家大馬路果度真係超級多人,熱鬧過市區:P

      刪除
  13. 多謝介紹, 肥人搵日可以碌過去試下先..haaaa
    B仔..肥人覺得唔好食其實...hhaaa

    回覆刪除
    回覆
    1. 12點幾1點超多人,記得避開啲peak hour^^
      甜品其實都幾多其他食肆選擇嘅......

      刪除
  14. 其實香港已經有很多美食…區區都有~~

    回覆刪除
  15. 呢間野我曾經經常食架!好正~
    酥炸類食品有少少顧忌<-- 你又唔食牛肉麵嘅?我最喜歡~🤤

    回覆刪除
    回覆
    1. Really~~~~!!係咪果頭返工?
      牛我又係盡量少食喎....口味係咪好厭尖呢XXD

      刪除
    2. 似前係,所以成日食囉~
      少食牛咁無辦法了~😅

      刪除
    3. 元朗依家交通方便咗好多好多(相對廿幾年前),所以假日都多咗好多區外人去覓食,感覺不一樣了:P

      刪除
  16. 咁既價錢都OK喎!
    睇落啲排骨好掂下.

    回覆刪除
    回覆
    1. 所以都幾多人幫襯,中午時段要等好耐先有位,同埋如果坐店外露天位會比較熱:P

      刪除
  17. 我去台灣都冇食牛肉麵,搵日都要入去呢間食吓。
    很久之前吃過一家住家製的台式牛肉麵,那些牛肉好有特色,好好食! 睇嚟好難食得番咁好食咯。

    回覆刪除
    回覆
    1. 好多人都話佢係比較正𡨫,不妨一試,不過都比較多人要等位:P
      牛肉麵我都比較少食,所以都唔太懂分好與壞

      刪除