2018年5月21日 星期一

武漢迎花潮@劉家山村

睇完個靚靚日出之後凍到手腳同塊面都冷冰冰,早餐火速去食返碗熱粥和熱豆漿暖身是常識吧!



山寨客棧的早餐選擇實在不多,但勝在有碗熱粥暖下胃,仲有熱辣辣的饅頭包點同埋那隻燙手烚蛋!基爾平時在家時幾乎都不會吃烚蛋,但旅行在外就經常吃到!好喇食到成個人又飽又暖,正常人喱一刻會諗起D咩?梗係出發去玩啦,正所謂旅行一刻值千金丫嘛……



山寨客棧除了有日出團之外,仲有個免費行山團可參與,咁食完早餐又拿拿聲起行去坐電瓶車,第一站就來到山腰這一帶的劉家山村!



在村口有個路牌寫住「宜居村莊」喎!基爾單單睇村裏的青磚民居建築和小路就修建得好新淨好靚,但又唔會好似華東那類古鎮有咁濃商業味道。



去大陸這類古村小鎮,基爾覺得晨遊或夜宿肯定是王道!例如基爾這次未夠9點已經來到這個劉家山村,很明顯外來的旅行團大巴就仲未來到,所以成條村都好寧靜,可以真正感受到古鎮真正的恬靜面貌。



相信如果再過多一兩小時,全鎮又會逼滿一團又一團外來遊客了吧!小河川兩岸定必又會擠滿大媽大叔喧鬧爭位拍照了,很難想像如何可以像基爾那樣站在小木橋上悠閒賞景!



古村其實範圍不太大,像基爾這樣簡單走一圈才不過一粒鐘而已。據資料顯示,目前古鎮裏只餘百多戶人家約五百幾人定居,沿路遇到的村民大都是年過六七十的公公婆婆,有些在家門前閒聊,有些則擺出一盤盤土產果乾魚乾,或是不知名的山草藥之類向遊人兜售,仔細聽他們說的大多都不是國語,應該是湘鄂土話吧!



在岸邊閒蕩時留意到河川上有這些方塊排列的枯萎植物,細看應是種蓮藕採蓮子的浮田。話說山寨這一帶的山區除了春日是賞櫻勝地之外,夏秋兩季也有很多遊客專程來賞荷花和紅葉云云……



不過這條古村落活化改造為旅遊區原來其實只有十幾年歷史,據聞昔日這裏曾是革命搖籃,也是湘鄂地區最典型的窮山僻壤。據聞2005年當地政府才開展這裏的旅遊扶貧計劃,並以這裏作試點村,逐年投入資金修造水泥公路、鄉村學校、公廁,還修葺整治河道修築塘堰水塔電網,令村裏的基礎設施大為改善。上圖好似是位於村口大停車場附近的鄉公所。



旅遊業明顯幫助了村民收入翻幾翻,最難得的是村裏仍保留不少原汁原味的古民居建築,大部份仍有原住村民居住,比不少香港所謂的古蹟活化工程來得貼地又成功。

54 則留言:

  1. 你真係好會掌握時間,早上條村真係幾寧靜。

    回覆刪除
    回覆
    1. 咁係咪叫做「早起的鳥兒有蟲吃」.....XXD

      刪除
  2. 雖然要靠旅行團,不過地方仍然很古樸,有原味。

    回覆刪除
    回覆
    1. 大陸好似近年都有好多喱類古鎮旅遊區開發,應該都係賺到錢吧^^

      刪除
  3. 回覆
    1. 王子看來是這方面的老馬......XXXXXXD

      刪除
  4. 內地都唔知做乜鬼度度都咁多人.

    回覆刪除
  5. 日出團、行山團真係方便旅客,我喜歡。

    回覆刪除
  6. 做乜要開發經濟啫, 佢地既老魔頭教咗佢地越窮越光榮啦.

    回覆刪除
    回覆
    1. 你估仲係戴紅頸巾時代咩,依家邊仲興喱套㗎,依家講大國齕起人人富起來㗎嘛XXXD

      刪除
  7. 屋角建設像小屋般, 造工精緻, 真幾古典喎!

    回覆刪除
    回覆
    1. 相信應是這一帶的民居建築特色吧......

      刪除
  8. 大陸地方大,唔活化都有人睇,將d錢尼起新屋唔好呀!
    香港地唔活化邊搵到錢呀!爛溶溶搵鬼睇。

    回覆刪除
    回覆
    1. 又唔一定喎JJ老師,都好多人鍾意睇爛溶溶建築物㗎,咁先夠原汁原味丫嘛:P

      刪除
    2. 你有去睇呀?唔覺喎!你去搵野食就多。

      刪除
    3. 香港自70年代開始拆舊建築,衣家所剩無幾,先有人話可惜咁。
      大陸家陣開始拆民間舊屋啦,你想睇就快手快腳,十年後可能剩返著名歷史古蹟咋,全世界都一樣要重修活化。

      刪除
    4. 啱啱食飽饅頭食到飽一飽,邊駛咁快又去搵食呀你估生積咩XXXXD

      刪除
    5. 都唔係嘅如果好似JJ老師咁識搵地方,中環上環西營盤灣仔應該都估有好多古蹟保留下來,等住JJ去影靚靚夜景相^^
      番鬼地方好多時分開新城區和老城區,我諗歷史保育會做得完善好多,HK地價貴應該不會有這種福份吧:P

      刪除
  9. 爛溶溶o既屋陰氣重,會見X呀!有d大膽人會去搵X屋。
    你想睇就介紹你去灣仔南固台.

    回覆刪除
    回覆
    1. 咦.....JJ老師原來對喱方面都幾熟咁喎,咁你有冇試過夜訪高街先^^

      刪除
  10. 香港的古蹟活化工程不少都成功保留了座建築,但遊人到了那兒,反過來被內裡改變了的用途(如商舖)吸引,較少了解該建築背後的歷史。

    回覆刪除
    回覆
    1. 可能根本都唔多人想去了解歷史背景吧,我諗大部份人都係鐘意shopping和high tea多啲,你睇啲商場幾墟陷就知XXXD

      刪除
  11. 我都好怕個啲人工化左嘅古鎮 e.g. 周莊
    朋友去過烏鎮, 都話有啲假

    回覆刪除
    回覆
    1. 我覺得周莊烏鎮朱家角果啲已經唔算假,最假的應該是豫園果類,完全是商業旅遊區景點XXXD
      烏鎮我也去過一次,確實係商業味濃,遊人也多,村口甚至要收入場費似主題公園咁,不過如果要去我覺得很值得住上一晚,因為只有在夜晚和清晨時份沒有遊客人潮的時段,才可見到古鎮的真正面貌:P
      如有興趣不妨重溫我的烏鎮舊網誌^^
      https://gaelhk.blogspot.hk/2011/07/6.html

      刪除
  12. 行山, hmmmm, 好彩啲村莊同風景值得一看咋,哈哈哈

    回覆刪除
  13. 回覆
    1. 可能咁多年來早已習慣了獨家村XXXD

      刪除
  14. 早去早享受,人多無法睇到靚相

    回覆刪除
  15. 能夠悠閒地四處睇睇, 影些相片已經很不錯了…

    回覆刪除
  16. 回覆
    1. 嘩.....即刻升價咗十倍喎wakakakaka.....

      刪除
  17. 你係跟團去定係自由行?離武漢開車2小時有個草原,風景很不錯!

    回覆刪除
    回覆
    1. 係跟團啊,主要是行山的團,那景區好像都要坐電瓶車....
      我後來有去一處叫蔡店的地方,是看油菜花的大平原,也是在武漢市郊的地方

      刪除
  18. 見你咁寫...會唔會係其實太凍d花未開?

    回覆刪除
    回覆
    1. 都唔算喎,後來見到好多都開晒,野生果啲係會比較早開和耐寒一點

      刪除
  19. 肥人中意呢種古色古香既地方呢~
    我都會係其中一個大媽, 係兩岸不停影相...哈哈!!!

    回覆刪除
    回覆
    1. 大陸都有好多這類早鎮,如果想交通方面啲可以去華東浙江江西都有好多,上海近郊果幾個都好有人氣好多遊人呢:P
      咁遊客都係咁㗎啦wakakakaka.....你記得揀啲靚相擺上blog喎,好似上次去韓國咁^^

      刪除
  20. 回覆
    1. 大夫去到除了可以迎花潮之外仲可以買返啲山中藥材添㗎

      刪除
  21. 希望繼續保持原貌,唔好咁商業化~
    聽你咁講趁早行應該係最好了,見你D相真係無乜人

    回覆刪除
    回覆
    1. 喱度我覺得唔算太商業化,華東果D真係商業到爆,銀哥應該無乜興趣去XXXXD
      10點後會開始多外來的旅遊巴到達,到時會熱鬧好多

      刪除
    2. 有時去到才發現中伏都無辦法⋯⋯ 我愛中國歷史,華東果面總要走走

      刪除
    3. 如果中學時有讀過中史,返大陸睇歷史古蹟特別有感覺,值得去睇下

      刪除
  22. 遊山真是一個好節目! 空氣清新,視野廣闊。
    聽講武漢大學也是旅遊熱點,尤其是在賞櫻期。

    回覆刪除
    回覆
    1. 大江南北實在有不少值得一遊的好地方.....
      大學校園聽聞依家外人不能隨便入去,要先網上登記,因為每天也有配額限制,不能招待太多遊客以免影響校園吧

      刪除
  23. 確有古村的風味,但感覺很新、很整潔、井井有條!

    回覆刪除
    回覆
    1. 係呀因為近幾年先至重修過,因為要發展成古鎮旅遊區點都要執靚少少^^

      刪除