2018年5月3日 星期四

跟住雷神過大海@序章

一不離二二不離三,繼金山閑話和武漢花潮的大長篇之後,再開多個最新鮮滾熱辣的遊誌先,不過預計今次喱個應該可以簡單快捷完成好多……唔講咁多廢話,拿拿林上船過大海!



基爾今次趁住五一大陸長假前夕搶先過去澳門走一轉,一來費事搭車搭船同人逼,二來酒店又平少少!不過千算萬算都估唔到會遇上初夏第一個雷暴警告添,無計喎買晒package天氣點惡劣都要去啦!



這朝早因為搭早船關係,晨早7點已出門口,來到上環碼頭見仲有時間就食個澳門茶餐廳早餐先,好耐無幫襯過佢依家都幾鬼貴,除了蛋治之外其餘粉麵類都好一般。食飽就入閘準備登船了,雖則話未到五一,但來到上環碼頭依然見好多黃衫和紅帽子大陸團,為免被推撞就畀佢地boarding晒先啦!登了船好快就起航,可惜沒有預期的刺激拋浪feel(回程時夜航就有,感覺超high),莫非雷神眷顧基爾所以遲少少先來?



一粒鐘左右就到了氹仔碼頭,今次住路氹那邊的酒店所以揀喱邊上岸方便D。過關時都係讓晒D大媽大叔走晒先,因為驚左佢地D篋。出左碼頭就去搵酒店shuttle,第一次來氹仔碼頭喱邊真係大好多,行好遠先搵到綠色果架酒店穿梭巴士,其實酒店同碼頭距離唔遠,途中基爾第一次路經了澳門機場覺得幾有新鮮感,同埋依家澳門正在建造架空輕軌鐵路接駁機場這一帶,上圖右那條天橋就係其中一截路軌,不過唔知起到幾時才竣工!



沿路會經過好多這一帶的酒店和豪宅,基爾似大鄉里好多地方都未去過,例如上圖左這個迴旋處的圓形行人天橋就覺得好grand好壯觀,目測行一圈應該有超過300米吧!想像如果當作是跑步徑的話,三得個三六得個六,計落跑3圈就差不多1K了,真好!



幾乎忘了交待一聲,基爾對上一次來澳門大大話話都有成十幾年前了,所以路氹這一帶好多地方都未來過,8字摩天輪和鐵塔都無見過,今次即使唔上去都可以在路邊望下啦!搭了十幾分鐘車就來到酒店,個天仲未落出雨但已開始勁黑勁厚烏雲了,係咪好有山雨欲來的感覺?咁唔理三七二十一先入去酒店擺低行李先算。



來到酒店還未夠十一點,基爾老奉以為五星酒店應可以check-in住先,放低行李佢會到時到候有房就自動有bellboy拎上房。依家先知原來係無喱支歌仔唱(基爾住cheap房無這服務,貴房應該有),一定要等到下晝三點幾專登返一返酒店去check-in咁鬼麻煩,幸好行李仍可先拎去寄存否則鬧爆佢!咁settle左D行李就在酒店行一陣先啦,因為聽到出面已經勁行雷,實在不宜冒濕身之險行出街咁傻咁天真……



酒店除了必然有個grand賭場之外,其實佢個商場又真係幾多店舖行喎(都係齋行下無乜野買)!入面仲有個金沙城劇場唔知係睇show定係真係有戲睇,佢攔住門口應該係上午時段未開!無聊行了一陣又出去大門口望一望睇睇咩情況先……妖!仲勁過先前,落雨落到倒水咁款,真係有遮都無用果隻,咁唯有乖乖行返入酒店hea多陣再算啦!



旅行一刻值千金,但雷神駕到天氣不似預期也是無可奈何的事,咁再去行多陣shop先囉!咦,酒店入面喱間M&S又幾大喎,不過D衫就依然都係走佢一貫的成熟型market路線,基爾暫時仲未有興趣買喱類衫住。



對腳自自然行了去food hall果邊比較吸引,見佢有賣英國紅巴士和電話亭餅乾,其實佢個包裝係幾靚,但在老家的M&S都有咁就無謂拎咁遠以免舟車勞頓搞到碎晒先返到屋企,留返D位拎杏仁餅和肉切酥好過啦!上圖左那款cookies唔記得聽邊個講係好食的,但都係唔買住!運完一輪吉見有點累,就去商場個food court坐多陣……



八卦去巡了一圈food court的食店,估唔到係都幾貴,澳門今時今日應該係唔會再有平野了。休息了一陣又去行下Esprit,基爾發現澳門這裏都仲有好幾間分店,反而香港就差不多全部摺晒(似八佰伴咁)。行多陣見已經再無咩特別店舖想行了,咁一於起錨啦!出去一睇開心返D只係微雨而已,唔駛諗火速閃過去巴士站先!上圖見到有位北方佳麗在影相,佢個方向係正在影巴黎人鐵塔作背景;至於圖中的玻璃建築物就係有個8字摩天輪的新濠影匯。



好彩好快就有巴士(忘了是搭25還是26A)!因為唔想行到太夜先返去check-in,咁先近近地去路環果邊食個簡單葡餐做個lunch吧!好耐好耐無坐過Transmac,雖然仍是單層但就睇落新淨左好多,同埋發現依家全部劃一晒收6蚊車費,感覺有點貴(後來八卦裝一下人地用澳門八達通原來只係3蚊咋,差成五折咁多呢)!



p.s.這次在澳門搭了幾程巴士,無獨有偶竟遇到幾次網上常見那類鬧交幾乎打交的場面(乜依家D澳門人咁躁火),就好似喱程去路環途中,有兩位年近八旬的大叔仲好好火氣,為了爭位落車問題初則口角繼而幾乎動武(有明顯肢體性推撞),雙方互問候家人語句此起彼落,幸好剛巧有位身穿貌似懲教人員制服人士(澳葡裔)笑笑口地將兩位大叔勸開及扶其中一個趕快落車,戰況才沒有升級……

54 則留言:

  1. 澳門近近地幾方便即興去,不過物價就高咗啲.

    回覆刪除
    回覆
    1. 我都覺得係,所以都有成十幾年無去過了:P

      刪除
  2. 「可惜沒有預期的刺激拋浪feel」真係唔好講呢的笑,我有親戚遇上刺激拋浪,真係成個人抛起!
    現在澳門消費真係很高了!

    回覆刪除
    回覆
    1. 當玩海盜船,離心力超爽呢....XXXXD
      係啦啲食肆都幾貴:P

      刪除
    2. Stella講得啱,大自然唔係講玩……

      刪除
    3. 似乎森兄都有啲大自然難忘經歷咁喎,有空要share下喎^^

      刪除
  3. 上次返來順便過左大海, 而家係個邊食野都幾貴

    回覆刪除
    回覆
    1. 咁有冇帶專員去食下杏仁餅鳳凰卷牛肉乾和肉切酥牛耳果啲^^

      刪除
  4. 點解你啲相冇人潮嘅,五一應該好多人喎。

    回覆刪除
    回覆
    1. 有呀,碼頭果兩張都幾多人的.....至於酒店賭場都多人但唔畀影相嘛:P
      街上面就太大雨,無乜人會冒雨出去行街喎,多數人潮留在賭場裏博殺XXXD

      刪除
  5. 我以前喺M&S行童裝部㗎。

    回覆刪除
    回覆
    1. 依家先知原來王子有這癖好!!......XXXXD

      刪除
  6. 以為五星酒店應可以check-in住先. Yes, Macau's hotels are quite inflexible for check-in time.

    回覆刪除
    回覆
    1. 可能第時大陸再多幾個省市開賭,咁啲Macau's hotels應該會flexible啲啩XXXD

      刪除
  7. 回覆
    1. 咩事呀?....唔通阿靚仔雷神霹中咗你?XXXD

      刪除
  8. 雷神警告d人唔做完功課過大海呀!

    回覆刪除
    回覆
    1. 咁我以後都要聽Miss JJ講要做好晒功課先去玩了....XXXD

      刪除
    2. 你得個講字。同埋口水多過大海。kakaka................

      刪除
    3. 通常口水多過大海先有興趣寫blog㗎啫,係咪XXXD

      刪除
  9. 嘩'我都有十幾年無去澳門玩囉,
    太多賭場了!吸引唔到我去玩.

    回覆刪除
    回覆
    1. 香港啲露營地逼爆,咁會唔會諗下過澳門露營呢又^^

      刪除
    2. 都有諗過下,近幾過月勁忙~就無再諗囉!`

      刪除
    3. 係咪要陪大佬溫書?^^

      刪除
  10. 我都+幾年冇去澳門了,嗰度變化真係好大,起咗好多大賭場!

    回覆刪除
    回覆
    1. 賭場賺大錢咁一定係越開越多啦,正常嘅^^

      刪除
  11. 酒店既service boy 都係講普通話多, 英文都唔多識

    回覆刪除
    回覆
    1. 咁又唔會,都多外國遊客所以兩文三語做酒店服務行業是必備的呢!至少做check-in counter果啲一定要識英文吧!

      刪除
  12. 下篇係咪講搬住一大袋錢回香港?=P

    回覆刪除
    回覆
    1. 如果咁容易我諗無人會再返工了吧.....XXXD

      刪除
  13. 澳門發展得好快,我地就好似未見過世面既港燦,嘩~~~D建築物咁鬼靚架~~
    哈哈....等睇你D食相啊喂

    回覆刪除
    回覆
    1. 我其實都燦燦地,好多眾生相都未見過呢....wakakaka
      我覺得你地影得影啲喎^^
      今次都唔算食好多野咋:P

      刪除
  14. 出游遇到咁嘅天氣都真係好無奈...

    回覆刪除
    回覆
    1. 雨季其實都預咗會落雨,只要唔係打風無船開已經算係咁啦^^

      刪除
  15. 我都好多年無去澳門了,落雨真係有d掃興.

    回覆刪除
    回覆
    1. 出入搭車係有少少唔方便但都ok嘅^^

      刪除
  16. 澳門消費真係好貴呀, 完全追過香港呀唔好講笑~

    回覆刪除
  17. 華~幾時過黎架~~我都唔記得幾時有咁大雨過~~~
    輕軌呀..唔好問我地~我地都唔知幾時起好...唔知會唔會爛尾呢......
    起黎都無咩用既

    回覆刪除
    回覆
    1. 果日閒日你應該返緊工^^
      係咪主要方便路氹啲酒店遊客去機場?如果接駁埋過去澳門和路環會實用啲

      刪除
  18. 回覆
    1. 證明唔關事cheapcheap人一樣招風雨...XXXD

      刪除
  19. 齋睇相覺得似gael兄請北方佳麗伴行兼私影,又真係估你唔到喎…@@
    我覺得人多的地方口角少不免,近好幾年香港旅客多了,港人已煉成百忍成金術…哈哈

    回覆刪除
    回覆
    1. 我諗通常啲私影龍友都會有返一定攝影技術和造詣吧!好少會影成咁核突啩....XXD
      對住啲躁底又蠻不講理人士,都係走為上著避之則吉好啲wakakaka...

      刪除
  20. 我上一次去澳門都有成十幾年了,我媽講澳門啲野貴過香港添。我都係鍾意澳門嘅杏仁餅,豬油糕就唔要啦。哈哈哈

    回覆刪除
    回覆
    1. 係呀我都覺得依家HK食野仲平少少,澳門是天價:P
      依家HK都有咀香園喎可以去買下來食啦.....仲記唔記得王母蟠桃先XXXD

      刪除
  21. 澳門跟香港旺角一樣多人,十幾年前去過一次之後都怕怕。

    回覆刪除
  22. N 年冇去過澳門 , 氹仔好繁榮喎 .

    回覆刪除
    回覆
    1. 係喎你同相公都多算係北上,好少見你地過大海^^

      刪除
  23. 基爾兄一係做懶蟲,一係就出卜出得咁密😂
    過大海我總覺得很貴,慳返d錢去旅行好過

    回覆刪除
    回覆
    1. 咁先好,等你捉摸唔到wakakakaka....
      貴呀,係感覺超貴,比HK還要貴,所以成十幾年我都沒去過了:P

      刪除