2018年5月25日 星期五

跟住雷神過大海@Fernando

搭Transmac來到黑沙海灘喱邊已經停左雨唔駛再擔遮,睇睇時間原來已差不多晏晝成點鐘,就去食個lunch先!



以往基爾幾乎每次來澳門,總會到一到這間老牌葡菜餐廳打一打卡,今次都唔例外。這次揀了閒日的食晏時段來貪佢無咁多人,之前試過假期來要排隊等位,好旺場呢!



雖然有成十幾年無來過,但餐廳陳設就好似穿越時空咁一D都冇改變,似乎時間在這裏已失去了意義……還記得上圖那座古老的足球遊戲機,第一次來時成大班人玩到嘈到拆天咁勁開心,估不到佢仲依然放在原位,只多添了些刮花的歲月痕蹟吧!



依舊的古老紅磚牆……依舊的歐式壁爐……依舊的紅白格仔桌布……依舊的白色餐碟和透明玻璃水杯!唯一有些不同的是昔日喧喧鬧鬧的大廳不見了,依家反而可享受難得的清幽悠閒。



安坐後看看menu,發現價錢也早已不一樣了!趕快點了幾味慣常會吃的菜式,趁住還未上菜的空檔就去後花園走走,順便去廁所洗洗手才開餐(廁所入口仍舊在後園那邊)。



最先上桌的幾個大碼豬仔包依然新鮮熱辣皮脆好味,用來點橄欖油、沙律醋以至夾著沙律菜吃都是神來之筆。上圖右是每次來都定必order的葡式烤乳豬($372/2份),皮夠脆肉夠鮮之餘也沒有廣式燒豬咁咸,唯一係食多幾舊會有點膩,這時最好飲多幾啖Sangria($70/半jar)就完全無問題。



至於什菜沙律撈上了酸酸的沙律醋之後更是解膩的還魂丹,平時基爾極少會食生洋蔥,但對這碟鋪滿了洋蔥絲的沙律卻是完全失去抵抗力,愛煞了它對味蕾那種微微辛辣的刺激感覺!嫌唔夠喉咁於是睇睇menu再order埋上圖喱個燒排骨($162)。



平時燒臘檔賣的港式燒排骨通常都沾了甜甜的蜜糖味,葡式這種就沒有太多調味醬料醃製,反而可以食到豬肋骨的原味,只需唧一點點檸檬汁提鮮已夠晒,順帶一讚連伴碟的粗薯條都好好味!



繼之前的睇menu學英文之後,再來多個check bill學葡文吧!先睇最貴果味Leitao,就是葡式烤乳豬;跟住Salada單睇字面都估到係什菜沙律;Sangria應該都好多人飲過,這種南歐水果酒又叫做桑格麗亞(感覺又譯得幾靚咁喎),是由紅酒梳打水葡萄汁柑橘玉桂混合少少切碎生果肉調製而成,飲落似果汁多過酒,但酒精濃度一般仍有7-8度,基爾試過溝七喜或可樂飲依然會有些醉意……



講埋賬單上餘下兩味係乜,Agua應該好多人知係水,這間葡菜餐廳飲水要收費,每桌會擺一枝兩公升樽裝蒸漏水(就好似中餐廳酒樓會擺幾碟花生蕎頭前菜),收$45感覺都幾貴;最後的Entrecosto唔駛估就知係剩返果味燒排骨。結果埋單合計約700幾蚊,以人均消費計雖然比以前略貴了一些,但仍算是可接受的範圍吧!



食飽飽之後襯住沒下雨又行出去黑沙海灘行多陣先走。4月尾天氣仍有點微涼,加上才剛剛下完場大雨,所以沙灘上幾乎都不見有泳客或者游人閒蕩。咁樣其實都幾好,可以重拾返少少昔日澳門那種寧靜的南歐海岸小鎮feel……上圖可遠眺沙灘邊緣盡頭的舊威斯汀酒店,昔日總覺很有氣派,依家降左grade唔知有冇唔同左呢?



海灘邊的石階好似修葺得比以前靚了,仲種了不少樹,上圖由樹梢交錯之間望返出去一望無際的海灣,可能因為天色灰暗關係唔知點解竟多了一份「迷離境界」的神秘感覺!



又真係喎!無人的沙灘總有些獨特的蒼涼味道,對澳門來說算唔算係一幅難得的閒適風情畫……唔知黃金周果陣會唔會又好似西貢大浪西咁有好多大陸自由行來紮營和起爐燒野食唱歌挖沙摸蜆呢?浪漫地行完沙灘之後,係時候搭巴士返去酒店check-in攞房先!



法蘭度餐廳 Restaurante Fernando
澳門黑沙海灘9號

50 則留言:

  1. 一枝水$45都好歐洲feel播。

    回覆刪除
    回覆
    1. 澳門消費係歐洲水準㗎啦依家XXXD

      刪除
  2. 如果佢收支水,而我無飲,就唔比tips。我燒豬是一碟二人份量? 都好大件喎。

    回覆刪除
    回覆
    1. 咁我又唔知如果唔飲得唔得喎,不過會好頸渴:P
      一碟係一人份量,總共叫了兩碟,所以先會300幾蚊,其實佢份量已經比以前細咗少少,以前仲大碟DD....

      刪除
  3. 嗰間餐廳好出名,朋友都帶我去過,食物幾好但貴咗啲.

    回覆刪除
    回覆
    1. 係呀我十幾年前去澳門如果食葡餐都係食喱間,反而船屋小飛象木偶果D就不一定會去:P

      刪除
  4. 雖然可以說我係係澳門渡過我嘅童年,但係我對葡菜冇特別好感,反而鍾意葡國雞飯,哈哈哈哈。

    回覆刪除
    回覆
    1. Really~~~~~~原來MD是澳門人,咁咪年年有錢收囉wakakakaka!!!
      咁葡汁四蔬又有冇煮下?^^
      其實我鍾意舊澳門多一點,依家就少了一點特色吧!

      刪除
    2. 我只係在澳門渡過童年,可惜唔係澳門人,冇錢攞,哈哈哈。我都是鍾意舊澳門, no more :(

      刪除
    3. oic....原來如此!:P
      舊事舊物總有一點舊情懷吧^^

      刪除
  5. Visited this restaurant long time ago. The BBQ is good. Not sure of the quality nowadays.

    回覆刪除
    回覆
    1. 原來都唔少blog友幫襯過喱間,係呀佢都好歷史悠久,以前好多人幫襯成日要排長龍,不過依家澳門食肆多咗好多其他選擇,喱間就無咁旺場.....其實我覺得佢keep到水準,味道仍不錯,份量就縮咗少少水:P

      刪除
  6. 真係同我N年前去個時, D裝修完全無變
    個沙灘係咪即係發現灣?

    回覆刪除
    回覆
    1. 原來唔少blog友都對喱間充滿回憶咁喎wakakakaka...
      係咩以前叫發現灣㗎咩???

      刪除
    2. 唔係啦
      有套陳年大台劇係個度拍, 前排重播嘛

      刪除
    3. 你講起又有少少印象,近排有重播咩?
      其實我有興趣睇舊劇多過依家果D....:P

      刪除
  7. 雖然時間在這裏已失去了意義……但這裏價錢帶你回到現在!

    回覆刪除
  8. 葡式烤乳豬($372/2份)
    Sangria($70/半jar)
    燒排骨($162)
    $544x1.1 = 598.4

    回覆刪除
  9. 你貴人出門招風雨,呢間都幾貴下。

    回覆刪除
    回覆
    1. 如果唔係打風都接受到,落雨其實無咁熱,近排HK熱到暈不願走到街上去!!
      都貴呀對於我來說:P

      刪除
  10. 我早期都成日過澳門玩,一定會去呢間法蘭度食晚飯.
    味道確實唔錯!

    回覆刪除
    回覆
    1. 係喎,上面好多blog友都係咁講,可能以前選擇不多吧!大部份人去到澳門食葡餐都揀喱間,事實上以前係極多人排隊的.....
      我覺得佢啲BBQ類係做得唔錯,通常都會叫燒排骨和燒乳豬這兩味:P

      刪除
  11. 葡式烤乳豬皮脆真係好有水準,正!!

    回覆刪除
    回覆
    1. 同HK食開燒臘檔買果啲係好唔同呢^^

      刪除
  12. 好多年冇到過澳門,但見你提到這間餐廳,我好像到過,找回些回憶。

    回覆刪除
    回覆
    1. 應該如果係十零廿年前去澳門都多數會食過,你記得唔記得玩過那架足球遊戲機先^^

      刪除
    2. 我冇玩過足球機呀。

      刪除
    3. 下次去要玩下懷舊下啦^^

      刪除
  13. 乜咁多假又上大陸又過大海, 搵到有美相伴啦

    回覆刪除
    回覆
    1. 我無帶長頸鹿去呀......邊有你咁幸福去行山去外遊總有美相伴吖XXXXXD

      刪除
  14. 太陽伯伯知你唔係睇風景,休息兩日囉。雷神專程陪食探。kakaka.................

    回覆刪除
    回覆
    1. 雷神都好丫至少無咁hot,如果只得太陽伯伯又驚熱到無胃口食野喎XXXXD

      刪除
  15. Fernando我估我本人都有10年無食過...又多人又貴...澳門食野真係好貴.......同埋記得夏天好多蚊~~~~~~~
    閒日既黑沙我都未去過~

    回覆刪除
    回覆
    1. 一講澳門就諗係小T~
      飲水要收費, 果然跟得好足噃~🤣
      葡文,令我諗起莫三比克

      刪除
    2. Tiff:係呀真係貴到我諗過多幾年我都食唔起了:P
      我記得佢花園和廁所有點蚊香!
      Weekend去黑沙係咪會多人好多?

      刪除
    3. 銀哥:同意,佢係代言人,食在澳門應該要出返份糧畀佢XXXXD
      我諗係好似去茶樓收茶錢咁^^
      你果陣有冇速成學返一兩句同當地人搭訕?

      刪除
    4. 無,文字字面我真係毫無天份,一句Amigo算是極限了🤣
      我話佢跟得足係跟足歐洲,飲水都要錢😜

      刪除
    5. 葡萄牙在非洲都有好多前殖民地,如果學返少少應該都會幾方便吧!
      都幾多外籍人士光顧,可能佢地都習慣了吧XXD

      刪除
  16. 食物賣相唔錯,而且餐廳環境都好古雅優美~~~

    回覆刪除
  17. 黑沙灣呢間葡式餐廳門口好綠化吸引。那碟葡式烤乳豬睇嚟好好食,份量又十足,一碟兩個人食都夠啦,是兩個人的份量吧?

    回覆刪除
    回覆
    1. 佢間餐廳環境幾大幾靚,以前好多人排隊,依家好似少人咗,多咗其他食肆選擇吧!
      烤乳豬和燒排骨通常都會食的,一碟我諗夠兩三人食了!

      刪除
  18. 呢間餐廳D野食都唔錯,係D侍應有D串,同埋無冷氣,夜間都好D,比較清涼

    回覆刪除
    回覆
    1. 係呀,無冷氣是重點XXXXD
      秋天冬天去會比較食得舒服,又無咁多蚊:P

      刪除