2018年6月22日 星期五

跟住雷神過大海@三元粥品

萬里長城長又長,都不及去澳門閒蕩夜街咁悠長!上次講到夜晚食飽飯之後,由雀仔園一直hea行到去大三巴,不過見大三巴可能太夜也關了燈所以都無影夜景相就走了,因為跟住仲有深宵特備節目安排嘛!



夜媽媽要影有氣氛的夜景相,上圖福隆新街這裏的陳年古老紅燈區街景自然是澳門的不二之選,事實上都幾多人專登揀夜晚才來這裏影相,一來固然因為昏黃街燈下特別有情調;二來當然係唔駛驚好似日間咁多北方大媽大叔熙來攘往咁吵耳擠擁啦!



記得以前街頭有間碗仔翅係好墟陷要排晒長龍好熱鬧,依家無晒條人龍看來就回復清靜好多!深夜來到其實好多店舖都閂晒門,不過齋行下條街都幾靚幾舒服的,最緊要係人少少樂得清閒一點。



還記得當天旅館的門牌……昏黃的街燈下看來又是另一電影場景,會否有興趣與無聊基爾沿路繼續走下去那半哩長街?



咦,乜行行下好似聽到有少少鼓聲?唔係喎好似係由肚裏面傳出來架喎!食飽飯行街又行了差不多成個鐘,又開始有點進食意欲了吧!剛好又行到來這間好老字號的三元粥店,一定要食返碗肉丸粥做宵夜先返酒店啦!



咁多年無食佢個肉丸粥今次終於可以舊味重溫一下,不過價錢三級跳真係貴了好多,要成三十幾蚊一碗(連隔離枱來自台灣花蓮的幾位大叔都話覺得幾貴),幸好依然好味道!



食飽粥之後驚太夜無巴士返酒店,都係時候搭車返歸了(p.s.巴士上又遇到大媽與大叔因為爭位落車而鬧交,雙方互有「問候」其實感覺都幾小學雞,在旁的人都在邊忍笑邊勸交)。好彩回程無乜塞車好快就返到去,酒店對面仲可以睇到夜晚亮了燈會變色的鐵塔,難得咁鬼夜仲有成大班北方大媽吱吱咋咋爭住同鐵塔影selfie添喎!咁基爾都襯下熱鬧快手影兩張,之後即閃啦!

三元粥品專家 Sam Un Loja de Canja
澳門新馬路褔隆下街44號地下

81 則留言:

  1. 深宵特備節目>>仲以為去夜店添。

    回覆刪除
    回覆
    1. 等老馬王子返來帶路先得啦......XXXXD

      刪除
  2. 回覆
    1. 間中食下都ok嘅.....最驚又貴又唔好食果D

      刪除
  3. 去澳門食過夜粥係唔同啲 :P

    回覆刪除
    回覆
    1. Wakakakakaka.....菲臘哥應該食唔少XXXD

      刪除
  4. 我幾年前曾經到澳兩日遊,晚上到大三巴逛逛,如你所言,真的很有氣氛,可惜當年比現在更不懂拍照,拍不到有感覺的照片。

    回覆刪除
    回覆
    1. 會唔會再有攝影團過去玩下練習下呢^^

      刪除
  5. 遲啲可以搭車過大海了!

    回覆刪除
  6. 福隆新街夜景真係有漫不經心既情調, 夜遊正呀!

    回覆刪除
  7. 澳門啲野真係貴左好多, 食個早餐閒閒地都幾十蚊

    回覆刪除
    回覆
    1. 咁佢地有market有顧客(大陸豪客),自然可以再不斷提高價啦!
      好明顯依家啲目標顧客群都唔係我地XXD

      刪除
  8. 福隆新街夜晚著了燈好有氣氛^_^三十幾蚊碗粥都幾貴﹗

    回覆刪除
    回覆
    1. 古舊建築加埋啲昏黃燈光係幾有情調......
      貴呀,遊客生意囉:P

      刪除
  9. 等港珠澳大橋開通,搵日去行下先!

    回覆刪除
    回覆
    1. 好多人都係咁諗喎....^^
      係咪無人會再擔心偷工減料問題呢wakakakaka!!

      刪除
  10. 香港食嘢都貴啦,澳門都一樣啫…
    夜裡鐵塔的燈光很美……

    回覆刪除
    回覆
    1. 所以咪話最緊要識搵錢囉,搵到果D自然唔覺貴,仲覺得「好平呀」添啦XXXD
      可以上去添㗎,森兄快啲好返隻手可以過去玩兩日^^

      刪除
  11. 借雷神o既橋一日遊可以寫成5篇,恭喜你榮登基奶奶之列喇!

    回覆刪除
    回覆
    1. 咁JJ尚宮仲唔快啲同朕搞返個「登基大典」......XXXD

      刪除
    2. 基奶奶只係平民百姓,極其量只係入紀錄大全,居然想坐龍位!

      刪除
    3. 車!又係你叫人登基嘅:P

      刪除
    4. 隱形標點就試到你恨登基到恨發雞盲.

      刪除
    5. 沒看到什麼標點呀.....只看到蝴蝶飛呀飛呀飛XXXD

      刪除
  12. 而家香港啲粥都係咁貴……😑

    回覆刪除
  13. 粥好多肉丸 , 香港三十幾文碗粥冇咁多料 .

    回覆刪除
  14. 基爾果然係...食過夜粥。

    回覆刪除
  15. 睇見碗肉丸粥我都覺得肚仔餓。

    回覆刪除
  16. 我每次去澳門, 都去十月初五街近16浦的舊式茶餐廳, 食番個咸魚蒸肉餅飯, 十分抵食30元, 還有油菜.

    回覆刪除
    回覆
    1. 咦,睇來Joseph哥都好熟路喎,係呀果頭都仲保留唔少舊式食店,隨時找到意外驚喜呢

      刪除
  17. 好似未試過係澳門食過粥,倒懷念以前澳門的雲吞麵,蝦子麵同燉奶等,以前平靚正架!但,而家聽説雲吞麵要成30幾蚊一碗。

    回覆刪除
    回覆
    1. 蝦子麵正呀,今次我都有去食呢^^
      係呀賭業興旺,帶動生活消費水平提高唔少:P

      刪除
  18. 那年我老友帶我去市政大樓吃午餐,我點了個黃蟮煲仔飯,真係好好味道。

    回覆刪除
    回覆
    1. 我以前有去過紅街市,坐櫈仔飲咖啡果啲大排檔幾得意^^
      鱔類我本身就麻麻地:P

      刪除
    2. 唔係咩嘢坐櫈仔飲咖啡果啲大排檔喎! 這大樓有自動電梯上、有冷氣開放。店外全部都有枱櫈任坐。有一層有展覽可看。地方實惠好舒適。
      黃蟮好有益,你都唔識寶耶。

      刪除
    3. 咁我又未去過呢,看來又幾好,係咪類似HK市政大廈街市樓上果種熟食市場呢?
      係呀一來怕多骨,二來怕牠的味道怪怪的:P

      刪除
    4. 我在前兩年去過旺角市政大廈街市樓上嗰種熟食市場一次,那裡的衛生環境,邊庶有澳門市政大樓咁整齊、咁清潔明亮吖! 真係冇得比。
      剛剛看到原來你都唔食蔥嘅,海鮮和魚類如果冇薑蔥,又點會好吃架! 黃蟮係事先全起了骨的,煮熟吃時真係啖啖肉,不知幾咁好食! 但我也不贊成吃生蔥,一定要吃煮過的蔥。

      刪除
    5. icic.....咁又係,市政大廈街市果啲衛生環境係差少少:P
      係呀,薑蔥都好少食,蒸魚果啲多數會撥開先食:P

      刪除
    6. 我都係撥開啲薑蔥不吃的。

      刪除
    7. 聽說如果魚夠新鮮,不用薑蔥也可呢

      刪除
    8. 不太新鮮嘅都唔好買啦! 魚肚內的黑色薄膜,或是橙色薄膜,係會使魚類有腥氣的,除了刮去它,還要下些蔥來蒸,就真是美味鮮甜的。

      刪除
    9. 原來如此.......秋葉姨果然係廚神^^
      我睇啲烹飪節目都係多數在魚肚放入薑蔥,西方人煮魚就多數塞入檸檬或薄荷葉

      刪除
    10. 各種海產的清理程序都好重要,唔通好似蔡瀾咁在韓國的海鮮檔,拿起隻生猛嘅墨魚仔,就係咁放入口吃下去!
      *
      很新鮮的鮮魷,都要清理一下,下熱水鍋滾幾滾,什麼味道都不用落,立即吃下就會覺得鮮味無窮啦!

      刪除
    11. “廚神”這兩個字不敢當! 不過是看得電視的烹飪大師煮餸多,唔多唔少都有些少印象嘅。我覺得鼎爺的西關煮菜方式,最合我家鄉鳳城的口味。

      刪除
    12. 生食海產始終有風險,即使生蠔或者三文魚生我都盡量少食,唔係咁夠膽:P
      對!現代人烹調有時過份用了調味品,有時反而吃不到食物原味了:P
      鼎爺好似又就來有節目出,佢同肥媽隔住咁出幾星期...

      刪除
    13. 雖然敝鄉都好興食魚生,不過我就好抗拒! 生吃東西實在太過不衛生,好危險!
      想不到鼎爺一介武師,煮食又會咁有心得。
      曾經有個朋友在一間上海小館吃小菜“炒蟮糊”,吃後回家腸胃不適。所以,我以前都是現買現劏,自己煮來吃。但因為太殘忍,很久沒買了。那次在澳門見到店面整潔,女店東又是信得過的樣子,才點了一個黃蟮煲”,果然沒有令我失望。

      刪除
    14. 係呀,淡水魚更宜先煮熟,會比較多寄生蟲呢:P
      我諗好多人都唔知原來佢係大廚^^
      宰鱔其實都很有難度,因為好滑潺潺!

      刪除
    15. 睇嚟基哥都未曾見過劏黃蟮,魚販是很有經驗的,是很容易的。

      刪除
    16. 係咪要帶防滑手套XXD

      刪除
    17. 唔話你知,等你估估吓啦。

      刪除
    18. 聽聞也可以用粗鹽省走啲潺^^

      刪除
    19. 你搵日跟阿媽去街市買番一兩條黃蟮看看,自然一切明白了。

      刪除
  19. 今時唔同往日,澳門大至上貴過香港,三十蚊碗粥,平架喇!
    朋友食兩個豬扒包成百二蚊

    回覆刪除
    回覆
    1. Wakakakaka.....好明顯我唔係佢地目標顧客XXD
      豬扒包好貴,又要身水身汗去排隊買,唔係太值得囉:P

      刪除
  20. 沒有微溫的便當,卻有滾熱的夜粥

    回覆刪除
  21. 我都好鐘意食三元d肉演架!!!!!!
    不過我淨係會冬天去食~夏天要我食粥唔使旨意~
    我仲係加隻蛋~
    要一碟皮蛋酸薑~
    再黎多個油炸鬼丫唔該^^

    回覆刪除
    回覆
    1. 喱間好耐歷史,N年前來果陣係好抵食,依家就貴好多了:P
      係㗎會熱啲,開冷氣都未必掂XXD
      皮蛋酸薑正呀^^

      刪除
    2. 依家澳門食咩都貴...所以收貴左但仲係好食既我都ok
      有d係又貴又唔好食哥下難頂!!!!!!!
      超鐘意皮蛋酸薑

      刪除
    3. 同意呀,好食最重要,唔怕浪費了quota!!:P
      始終澳門食肆競爭大,唔好食好快就被淘汰吧...
      通常食店多唔多這類前菜食?

      刪除
  22. 數年去澳門已經感覺物價大至上貴過香港!! 重要處處人山人海的貴客. 真的興趣大幅下降.

    回覆刪除
    回覆
    1. 係呀,佢地依家target遊客係大陸豪客嘛^^

      刪除
  23. 肥人都覺得澳門既物價真係貴貴貴貴貴同貴呀!

    回覆刪除
    回覆
    1. 唔驚啦唔駛坐飛機,咪當慳咗機票囉wakakakaka......

      刪除