2018年7月11日 星期三

遺忘的唱盤時光@日本紅白

之前摷開床下底個CD寶盒,咁又繼續搵返D陳年老碟出來抹下塵回味下先得!唔覺意之下又摷出喱張日文碟,唔知有冇人有興趣陪基爾伯伯來重溫一下紅白盛世年代呢?



上網查返喱張CD其實又唔算好耐歷史喎!據資料話係2007年發行的復刻版雜錦碟,不過內裏收藏的就多數係上世紀80年代日本藝能界響噹噹巨星的代表作,正如碟中的簡介話齋,是記載了一代人的青蔥歲月……


按動唱機的play按鈕之後,一陣濃濃的昭和風味徐徐滲透到每個空間角落,時鐘即時也有反應,迅即回撥到30多年前……小林明子唱起Fall In Love果陣,到底係做緊暑期作業定係讀書報告?定還是在計緊sine cosine和tangent的數學題?再聽松田聖子的搖擺口紅,你會發覺初出道的林憶蓮看來也甚得聖子真傳吧!


依家聽返聖子姨姨30年後重唱搖擺口紅,會唔會有點毛管戙?昔日的小忌廉可愛教主雖然早已不復再,但唱功仍算是殿堂級數吧!至於當年的型女派掌門人應非中森明菜莫屬了,或者有些人會怕了她那把低沉聲線,但當年她的駅、難破船和禁區就分別改成了梅艷芳和張國榮的名作……30幾年後的今天,基爾竟神奇地迷上了她翻唱的秋櫻。


係咪好多人已經急住要舉手話:「完全唔識佢地喎!」……唔緊要,即使純粹當新歌聽其實都依然好好聽(老實說單聽旋律都好聽過好多新歌),依D係咪叫百聽不厭的經典?除了有可愛教主和型女出場之外,當然不可不提玉女派的河合奈保子,偶像派除了個樣要睇得之外,唱功也不能太離譜,聽聽上面這首月半小夜曲算是她的水準之作吧!


滴住汗唱月半小夜曲的河合奈保子,明顯比好似鼻塞塞咁唱小雨點來得更出色!講開日系的玉女派傳人,當然不能漏了柏原芳惠,她的最愛後來也成了周慧敏的代表作。30年後的今日,到底又係邊個keep得好D先?


除了有清純玉女宅男女神唱情歌之外,當然不能少了勁舞快歌,這方面就不能不提荻野目洋子,上面的跳舞街原版係咪好勁先?數數手指以上咁多位80's天后大部份都入晒五了吧(有些應該快要登六了)!Keep到這水平其實都要寫個服字畀佢地啦!


這張紅白紀念碟中仲有個小驚喜,就係收錄了南沙織的哀泣的妖精。或者大部份人早已忘了誰是南沙織,睇返個舊MV就即時醒起深秋立樓頭了。南沙織的樣子有別於一般日系女歌手,外表很有點country民謠歌手風味(當年應算是別樹一幟),說她有點三毛的氣質又會唔會有人同意呢?

50 則留言:

  1. 唔駛慌, 我呢位阿毛婆婆都識佢地
    見柏原芳惠一把年紀就要出寫真, 有啲唏噓
    Pure Pure Lips 我記得係廣告歌
    個個年代仲有好多玉女: 菊池桃子、齊藤由貴 etc...

    回覆刪除
    回覆
    1. wakakaka.......係咪美魔女果隻先XXXD
      咁我諗唔同年齡層會有唔同market啩:P
      依家唔知仲有冇雜果冰潤唇膏呢??
      仲有小泉今日子岩崎宏美早見優呢.....^0^

      刪除
  2. 回覆
    1. 大夫唔係半淚盈咁驚呀嘛........XXXXD

      刪除
  3. 想當年,紅白大賽係盛事,同歡樂滿東華一樣,好期待,哈哈!

    回覆刪除
    回覆
    1. 以前好少有直播,我記得多數係農曆新年先會重播XXD
      同埋最記得唱演歌果啲八代亞紀北島三郎美空雲雀一出場就多數轉台.....wakakakaka

      刪除
    2. 我地有代溝,我最喜歡美空雲雀...

      刪除
    3. 咁遲啲等我又講下啲演歌畀你聽下wakakaka.....

      刪除
  4. 無論日本、香港樂壇,真係往事只能回味!

    回覆刪除
  5. 香港好多流行曲都係改自日本,紅白可以聽翻原唱.

    回覆刪除
    回覆
    1. 以前其實都唔多機會聽到原唱版本,有些甚至不知原來是改編歌呢

      刪除
  6. 這些真是那些年的集體回憶!
    真要比個讚你了!
    :)

    回覆刪除
    回覆
    1. 咦.....咦!我還以為你係聽開AKB....^0^

      刪除
    2. AKB 是你 Gael 的年代。。。
      :)

      刪除
    3. 我剩係聽過前田敦子板野友美咋喎....XXD

      刪除
  7. 呢個時期的日本歌對港人來講都好輝煌…

    回覆刪除
    回覆
    1. 呢個時候的日本歌唔太認識,在印象中有幾首的日劇歌幾唔錯…

      刪除
    2. 快啲介紹幾首來聽下^^

      刪除
    3. 例如~悠長假期,男兒當入樽的片尾曲,仲有一套劇酒井法子扮啞的主題曲,最後點都要講同一屋檐下首歌…最正!

      刪除
    4. 咦~~~~咦!咁睇來森兄當年都煲唔少日劇喎!悠長假期戀愛世紀有冇煲齊晒!當年好興果個玻璃蘋果手工好靚^^
      酒井法子果套我諗你係講星之金貨吧!那時好似是亞視播,仲記得那年暑假隔籬屋勁播你講果首主題曲:P
      同一屋簷下我記得成套戲啲主角都成日喊XXXD
      記得我有隻日劇萬歲的碟,應該有喱幾首hit歌,有空都可以寫返篇blog喎!!

      刪除
  8. 依...肥人.....唔係好識佢地....
    紅白...更加無睇過, 哈哈!!

    回覆刪除
    回覆
    1. 紅白近年都好少有轉播,唔識都唔出奇啦XXXD

      刪除
  9. 點解冇山口百惠嘅,佢同。松田聖子應該係同一年代。

    回覆刪除
    回覆
    1. 咁梗係有原因,留返遲啲再話過你知^^

      刪除
  10. 記得以前細個好鍾意睇紅白大賽,可能因為深夜才開始,難得可以遲瞓,哈哈哈。

    回覆刪除
    回覆
    1. 同埋以前覺得睇紅白係一件好潮的事嘛^^

      刪除
    2. hehehhee, 記得有翁倩玉同陳美玲添,有香港人幾興奮呀 ^^.

      刪除
    3. 以前都幾多港台韓歌星上過紅白呢....

      刪除
  11. 秋櫻山口百惠唱仲正
    80年代好多靚歌,日港歌壇巨星輩出,依家果班根本呃飯食👎🏻

    回覆刪除
    回覆
    1. 咁喱個翻唱版本又比較少聽,所以先揀佢囉:P
      係咪因為咁所以當年先去學日文呢?^^

      刪除
  12. 要能講句"往事只能回味"囉。

    回覆刪除
    回覆
    1. 周不時回味下都唔錯,可以鍛煉下啲記憶力嘛XXXD

      刪除
  13. 講咁多個只係唔識南沙織。

    回覆刪除
  14. 真係唔識喎,唔係扮架
    記得譚校長首偏愛係日文改編

    回覆刪除
    回覆
    1. wakakaka.....當新歌聽囉^^
      偏愛唔係日文歌改編㗎喎,係譚校長自己作曲的,畀佢知道一定好傷心XXXXD
      首歌係有個日本女歌手合唱的,佢咪係早見優囉^^

      刪除
  15. 記得以前每年紅日真係全亞洲關注盛事,而家真係冇乜人留意了....

    回覆刪除
    回覆
    1. 早幾年好似仲有cable買來播下,近年真係唔見有......想睇要自己上網睇:P

      刪除
  16. 唱歌的紅白,聽過但沒太留意。

    反而,任天堂的紅白就熟好多了。=P

    回覆刪除
    回覆
    1. 咁SU童年一定很幸福有得打任天堂紅白機.....XXXD

      刪除
  17. 兩種紅白,好像差不多年代。咦,也不是,中森明菜更早期,以前即使沒有互聯綱,日本歌星在香港很受關注!

    回覆刪除
    回覆
    1. 依家其實都有紅白喎,年前SMAP收山都好受注目呢!
      近年比較興韓歌,但我好似都沒買過什麼韓星碟:P

      刪除
  18. 開幾個火頭,等同幾頭住家心態.

    回覆刪除
    回覆
    1. 我唔習慣收收埋埋果啲蝴蝶和咸蛋.....XXXXD

      刪除
  19. 回覆
    1. 好似同佢以前後生果陣風格唔同咗:P

      刪除