2018年7月22日 星期日

遺忘的唱盤時光@山口百惠

上次摷了一隻紅白歌合戰舊CD,已講了一大餐80's日系天后,會唔會意猶未盡想聽多幾首?拿拿林又去摷摷個CD寶盒,今次一於揀多幾張先!



如果好記性的話,可能仲記得幾年前基爾都有講過真弓傳這張碟(重溫請click五輪真弓),其實千禧年前後Sony Music除了推出真弓傳之外,仲有出過一張百惠傳。邊個百惠呀?除了山口百惠,還會有誰?



可惜百惠傳摷來摷去都唔見影唔知放左係邊度,不過記憶中同上面這張山口百惠精選CD也大同小異吧!這張同樣是Sony Music出品的寶藍色精選碟發行於1991年(比百惠傳還要早近十年),已經忘了當年買時係幾錢,八卦上網check返原來依家炒價已升到二百幾,果然係有價有市呢!


唔講咁多即刻聽歌!全碟16首歌當中,除了上次提過中森明菜翻唱的秋櫻之外,其實仲有好多都係山口百惠70's年代主演過的電影電視劇主題曲和插曲等作品,所以幾乎每首都係耳熟能詳的經典,基爾心水的No.1是上面這首山鳩,來自她與三浦友和主演的電影《絕唱》。


未夠喉?再來多首心水No.2伊豆之踊子!唔知有冇人睇過喱齣《伊豆舞孃》(唔駛爭住話完全無睇過喎!)話時話明年就係百惠嬸嬸的登六大壽了,唔知到時電視台會唔會又重播返佢一系列經典戲寶賀一賀佢呢?如果有就真係不能錯過了!


就因為聽了百惠傳,基爾當年就急急腳跑去圖書館借來了川端康成這位諾貝爾文學獎得主的幾本代表作品伊豆舞孃、雪國、千羽鶴和古都一次過睇晒!所以都唔爭在聽埋上面喱首古都,連小鳳姐都曾改編唱過廣東版。


除了古裝扮相靚絕東瀛之外,山口百惠當年的時裝劇同樣大熱,如果唔提下赤的疑惑會唔會有人投訴呢?赤的疑惑之後仲有續集赤的衝擊,80年代初無記重播時仲掀起一輪日劇熱。另外她還主演過松本清張名著改編的電影霧之旗,少不免又令基爾趕去圖書館掃齊了砂之器、點與線等好幾本偵探大師的代表作回家追看。



除了這張超級精選之外,基爾仲收藏了山口百惠於1980年東京武道館舉行的收山演唱會VCD,記得當年都係無意間在信和找到即時如獲至寶,今時今日當然可以在網上輕易找到片段重溫。


在這個收山演唱會裏,山口百惠唱了多達29首歌,曼珠沙華、橫須賀的故事和秋櫻等當然不能不唱(D歌迷一定喊晒唔肯畀佢走),開場的This is My Trial和散場的再見的另一方更加係基爾的超級心水之選,好驚隻碟會睇到花左播唔到,安全起見都係睇網上片段好D!



基爾這隻是很舊很舊的台版,近年在某大型連鎖唱片店發現原來也有港版DVD發售,不過價錢都唔平喎!當然也可以試試上網淘一淘,blu-ray的售價平到呢……唔怪得咁多人淘上癮!

51 則留言:

  1. 山口百惠真係經典中既經典,地位無人可代替.

    回覆刪除
    回覆
    1. 佢歌影視全部玩晒而且都極紅,我諗應該後無來者了吧!

      刪除
  2. 果時睇佢,真係驚艷!難怪咁紅!

    回覆刪除
    回覆
    1. 唔知在日本佢又有冇出過漫畫呢?

      刪除
  3. 回覆
    1. 食D當歸田七又止唔止到癮呢唔知XXXXD

      刪除
  4. 佢D歌唔錯, 但d劇就套套白血病=.=

    回覆刪除
  5. 終於講山口百惠,我雖然不是百惠迷,但都記得她收山演唱會,最後放下咪在台口,然後轉身那一幕。佢真係講得出做得到,退隱左幾十年。

    回覆刪除
  6. 以前亞視周不時播佢啲舊劇, 仲有赤的XX, 播時佢都已經息影左

    回覆刪除
    回覆
    1. 仲有佢套古都, 都值得睇

      刪除
    2. 我仲以為係大台播:P
      依家D日劇好似唔興古装

      刪除
    3. 古都是川端康成的晚期作品,小說本身都好值得一睇呢^^

      刪除
  7. 那個年代,日本歌在香港真的大熱,山口也是大紅。

    回覆刪除
    回覆
    1. 我諗都係,因為好多廣東改編唱翻唱佢啲歌呢....

      刪除
  8. 她的作品好經典,一定抅起你好多回憶

    回覆刪除
    回覆
    1. 其實又唔係好多回憶,好多都係後來聽返佢啲歌睇返佢啲戲㗎咋...XXD

      刪除
  9. 因為你上次介紹,我買左五輪真弓, 今次應該會買山口百惠喇。我都好鍾意佢。

    回覆刪除
    回覆
    1. 百惠傳都值得一買,基本上佢啲代表作都有晒了^^

      刪除
  10. 雖然我哈日,但係山口百惠唔係我個年代(扮細)。冇乜留意佢啲歌。

    回覆刪除
    回覆
    1. 得閒時我會當係新歌聽下囉....當然也可以當作係聽貝多芬巴哈啲classical咁,我諗無乜人同佢地同年代啩,但一樣今時今日都好多人鍾意聽嘅,無法例規定唔同年代就唔可以聽吧!
      其實我仲收收埋埋咗好多周旋,白光,Frank Sinatra,Billie Holiday,Nat King Cole和Matt Monro果啲諗住慢慢寫blog㗎喎XXXXXD

      刪除
  11. Gael兄對日本樂壇好認識,山口百惠的歌唔識…
    感覺上佢係演員較多…

    回覆刪除
    回覆
    1. 日本較近代的紅歌星,我只識宇多田光咋…

      刪除
    2. 其實唔太熟識,好多專家在陣我不敢班門弄斧啊XXXD
      以前娛樂不多,歌影視是主道,我諗如果係紅就多數撈晒三瓣,收入都多啲啦^^
      酒井法子最近又來HK開騷喎,你唔識佢我諗佢會好傷心wakakakaka....
      以唱功計我覺得絢香和中島美嘉也是我心水之選(宣布收山的安室就一般般),不妨留意下,當然宇多田光的First Love當年也極hit極經典,森兄有眼光^^

      刪除
  12. 今早同事講開“黃子華”收山Show,
    另一位同事突然提起山口百惠...
    好神奇喇! :)

    回覆刪除
  13. 歌評影評又做埋,功課就hea做!

    回覆刪除
    回覆
    1. 我主要功課係監察夢飛翔失踪網誌XXXD

      刪除
  14. 我無聽過百惠唱歌..但知小丸子同佢姐姐都好鐘意佢~~~~~~XXD

    回覆刪除
    回覆
    1. WAKAKAK....連小丸子原來都係佢fans!

      刪除
  15. 山口百惠不是我個年代⋯⋯可能我較遲接觸日本事物,一切由經典日劇開始

    回覆刪除
    回覆
    1. 不同年代有不同經典,基爾只是對舊事舊物特別有興趣而已^^

      刪除
  16. 我唯一喜歡的日本明星就是她!也是我唯一的偶像!

    回覆刪除
    回覆
    1. 咁有冇買佢D唱片或者電影poster之類呢^^

      刪除
    2. 咁又無哦,因為我係小學時候睇佢電視劇,當時家中比較窮,買唔起.

      刪除
    3. 依家我諗都仲可以買到百惠傳果隻碟,不妨去大型果類唱片店找找應不太難找到^^

      刪除
  17. 山口百惠。。。真係好耐嘅事囉

    回覆刪除
  18. 都係喺無記睇重播的日劇認識到山口百惠,同埋酒丼法子,她們的演和唱都幾好。山口都算揾到個好歸宿。

    回覆刪除
    回覆
    1. 係囉,以前都有好多舊日劇看,依家就比較多播新劇,但新的明星我又唔多認識呢:P

      刪除
    2. 在香港日劇熱潮已過,韓劇還有些水尾。他們新的一代演員面口太過陌生,我見到就轉台了。

      刪除
    3. 係咪依家興睇大陸劇?
      我見好多港星都去揾真銀^^

      刪除
    4. 有吸引的劇集已經不多,雖然各劇紛陳,但係唔係咁容易超越以前的好作品。所以我現在我很少專心看劇集。
      如果宣傳片有吸引的地方,也會去留意看一兩集。反而喜歡看電視上的舊電影。如“浮城”“長江七號”“金雞”“葉問”...

      刪除
    5. 以前仲有好多粵語長片睇我都睇過好多!^^

      刪除
    6. 想不到基哥都有耐心看這些黑白舊片。那些粵語長片雖然佈景簡單,但是劇情在合情合理之中,卻衍生出幽默,或者笑話,編劇的功力實在很高。

      刪除
    7. 同埋好多時都可以睇返五六十年代的香港舊貌,好珍貴的影像記錄

      刪除
    8. 想不到基哥這麼年青也喜歡看香港舊貌。
      有一套黑白片竟然同場加映50年代英女皇加冕,當時花車在彌敦道上遊行的實況,真是時光倒流60年。

      刪除
    9. 咁都好經典喎,以前彌敦道一定無咁多車和高樓大廈了吧^^

      刪除
  19. um...呢篇...肥人...完全...搭唔到咀啦..哈哈!!

    回覆刪除