2019年1月10日 星期四

港珠澳閃遊36小時:上

事先聲明此澳不同於彼邦的那澳,所以盛夏光年和金山又暫擱一邊先……話說月前新大橋開通後不久見有屋村團告示貼出,基爾媽都想去一遊所以即報即出發(註:今次轉轉風格唔再多口水,改用快遊速記方式寫)!



8:00am │ 屋村團一般都好早出發,但好處係屋企樓下就上旅巴零煩惱兼慳時間,唔駛去羅湖福田集合四處搵導遊旗仔



8:50am │ 話都無咁快旅巴已經駛過了青馬大橋,去到東涌對出的人工島關口大樓,感覺上好似仲近過去機場



9:00am │ 關口大樓的建築又真有點似機場喎,但改了用木建風格多了一些東方味;晨早來到不太多人過關,冇電視見到咁墟陷



9:07am │ 用E道打指模不用10分鐘已過關好方便,趁有時間要等齊人咁順便去個廁;見海關大樓內也有開DFS,其餘大多吉舖仍未出租營業



9:15am │ 過關後集齊人再行出大橋外連接的旅巴站,旅巴早已在外等候



9:17am │ 旅巴站隔籬幾行就係金巴站,朝早也不見有人龍,都係車等人



9:20am │ 這朝有雲霧微雨,幸好不曬;上車點齊人立馬再向新大橋出發



9:25am │ 原來大橋公路會先繞過機場國泰城和維修區,成日想來上圖這條「人氣橋」影飛機降落,終於有機會到此一遊(路過遠望車上遊)



9:30am │ 離遠仲可以望到飛機停機坪,記得有次由東涌行去大澳也會經過這裏;之後無幾耐旅巴就進入海底隧道,香港電話卡就收唔到了



9:37am │ 大橋的隧道路段好似唔算好長,感覺上好似短過行大老山隧道



9:55am │ 一出隧道就係茫茫汪洋,大橋橫跨了珠江口,望出車窗外就似坐船過大海;過多十幾分鐘已見到對岸幾座小島,那已是珠海海岸了



10:00am │ 珠海的拱北海關大樓就長這樣,同樣是個填海人工外島,建築物同樣幾新幾潮幾似機場大樓,風格統一



10:25am │ 落車用回鄉證排隊過大陸關口(有人潮但不算誇張),出關後等齊人換乘大陸旅巴再出發;由這裏可分流到澳門和珠海兩條橋



10:50am │ 基爾這團會先去珠海那邊,到著後先會路經珠海輕軌鐵路站,將來唔知會否接駁澳門輕軌?之後仲路經上世紀讀書年代曾到此一遊的海「情人路」(車上遊)



11:05am │ 海濱車單徑椰林樹影依舊,有好多遊客在珠海漁女像前打卡,佢原來係珠海十景之一,另外圓明新園和石景山公園也曾留腳毛



11:15am │ 最後來到海灣對出有橋連接的一個小島,這打卡景點叫珠海大劇院,單看外貌似兩隻巨蚌,與澳洲的雪梨歌劇院如出一轍風格相似



11:30am │ 與導遊對錶後解散,入去劇院裏八卦一下,室內感覺似文化中心,唔少外國樂團樂手演出海報廣告;更重要是去個廁(乾淨無味)



12:10pm │ 劇院所在的小島其實都幾大,可惜沒太多時間四圍走走;在劇院外集齊人馬再出發,因為係時候要去食這趟閃遊的第一餐團餐



12:30pm │ 食店名叫毋米粥,去到先知係食粥底火鍋。火鍋料都幾豐富有鯇魚片有貢丸有蜆有菜仲有油炸鬼,最後碗粥有點肥膩只食一小碗就夠



1:35pm │ 食飽粥底火鍋後再出發,接近三點來到下一景點:去買手信



2:55pm │ 單睇這間食品廠個名Padaria da Guia係咪好有澳門feel,立馬醒起之前去濠遊行街時也有見過這間東望洋餅店,原來製餅工場在這裏



3:10pm │ 等齊人去完廁後(團遊經常有這環節),列隊上樓參觀製餅工場,很有點似之前去舊金山時參觀糖果廠的感覺,當然規模細小小



3:30pm │ 巡完廠後必備環節就係shopping,話明係餅廠離不開就係買牛耳杏仁餅蛋卷之類的澳門手信,最搞笑係成村人只開兩個cashier收錢(p.s.基爾有試食過,純個人口味始終偏愛最香咀咀和晃記出品多一點,加上望見條人龍結果都係……放下就是食過)

62 則留言:

  1. 以後多一個選擇去珠海,澳門.

    回覆刪除
  2. 一直想去一次港珠澳橋,但還未有時間。

    回覆刪除
  3. Have to find some time to try this great bridge.

    回覆刪除
    回覆
    1. 最緊要唔好揀啲繁忙時間高峰期過關會好一點^^

      刪除
  4. 與澳洲的雪梨歌劇院如出一轍風格相似>> 係咪即係抄考?
    火鍋係咪一人一爐? 同陌生人一齊打, 我有D驚噃

    回覆刪除
    回覆
    1. 咁你望落又覺得似唔似?
      不是呀,一圍人一爐,不過會有侍應負責落餸分餸和有公筷應該都ok啩:P

      刪除
  5. 你跟屋村團去仲好,可以落埋珠海,我兩次都係經過,無得停.

    回覆刪除
    回覆
    1. 哇你咁快已去過兩次拿,過關等車多唔多人?
      有呀珠海有得停留有行下同食一餐咁囉,如果自己去可以行多少少地方,有些地方我都想舊地重遊一下因為有成十幾年無去過^^

      刪除
  6. 屋村團其實真係幾好, 舒舒服服去玩~

    回覆刪除
  7. 我仲以為你搭港珠澳黎澳門添XXD

    回覆刪除
    回覆
    1. 澳門啲消費都幾貴唔可以成日來㗎wakakaka....

      刪除
    2. 如果你搭港珠澳慳番好多夠食餐飯架喇~~~~~黎啦~~~~

      刪除
    3. 你果然係旅遊大使XXXD

      刪除
  8. 兩隻巨蚌好大啊,遠望好真
    跟C9團都幾好,唔洗煩

    回覆刪除
    回覆
    1. 睇完之後係咪即時想去食返碟炒蜆XXXD
      正呀,短線喱類都ok嘅!!同埋可以順便認識下啲街坊囉:P

      刪除
  9. 哈,基爾今次用timeline mode寫遊記。

    回覆刪除
    回覆
    1. 覺得如何?畀啲意見來好喎XXD
      講明係36小時所以先諗住試下喱個新寫法而已.....

      刪除
    2. 我其實無乜所謂,但係如果將來想按網誌計劃行程,則有時間會比較易掌握。

      刪除
    3. 咁都係,時間和車程距離方面會有大概的了解,可以多一點參考作用吧
      我見你寫行山都有時寫埋時間,都好有幫助呢^^

      刪除
  10. 咁多人,比我都放棄。有次喺手信街試過一粒剛出爐,仲暖嘅迷你杏仁餅,原來好食過平時嘅好多架。:)

    回覆刪除
    回覆
    1. 咦,正如你所講係新鮮出爐好食啲.....
      以後如果仲買杏仁餅會唔會試下返屋企叮一叮熱先食^^

      刪除
  11. 俾錢條龍似乎真係太長,佢地點做生意架。

    回覆刪除
    回覆
    1. 可能人手不多吧!
      不過喱團人散晒之後佢地又可以攤抖下囉....

      刪除
  12. 其實跟這種團出發都唔錯,比較輕鬆…著名景點會睇得到…而且安排食唔駛傷腦筋…

    回覆刪除
    回覆
    1. 咁間餅廠未好好生意,最後有冇買到咩手信?!…

      刪除
    2. 跟團通常都可以睇到啲主要景點,但如果某啲想留耐少少的地方就唔得囉,同埋有唔想花時間去的買嘢點都要一齊去:P
      交通係方便慳了時間因為坐旅巴.....食返而唔會太傷腦筋,因為寧願自己揀喜歡的食肆wakakaka....

      刪除
    3. 無買呀,一來無心機排長龍,二來試食過味道其實一般般,費事拎啦蛋卷又易碎:P

      刪除
  13. 屋村團好方便,返到家門唔駛轉車

    回覆刪除
    回覆
    1. 係呀如果有長者同行就更方便,減少一點舟車勞頓嘛^^

      刪除
  14. 我喜歡你這篇速記方式,遲D借來抄考用來打D無關痛癢又無乜心情的遊記純紀錄

    回覆刪除
    回覆
    1. wakakakaka....最緊要銀哥也啱用,短寫速記也可慳多點時間吧^^

      刪除
  15. 聖誕假期後都嘗試使用港珠澳大橋到珠海探親+玩樂二天, 去程直通BUS, 中午回程搭金巴. 時間早, 兩程也不太多人過關.
    珠海的拱北海關大樓人工外島,我以為自己去了機場, 建築物風格模式似足抄考@@@@

    回覆刪除
    回覆
    1. 對,最緊要係揀啱時間,唔好選早上和傍晚那類rush-hour應該會好一點的,之前見有幾個blog友寫過港珠澳橋也是這樣,方便啲唔駛同人逼埋排長龍等巴士.....
      係呀我諗佢個建築概念都係想同機場聯為一體,有了大橋都可能多了大灣區人來HK機場搭飛機出外國遊吧:P

      刪除
  16. 跟團很方便……
    我12月尾都貪新鮮走了這條橋一趟。

    回覆刪除
    回覆
    1. 跟團在交通方面比較便捷,與長者同行特別合適!!
      對,以後可以多個交通選擇過大澳探朋友仔^^

      刪除
  17. 回覆
    1. 謝謝JJ,減少了口水多過茶,希望你喜歡^^

      刪除
  18. 多謝你,咁詳述條橋,我未去呀。

    回覆刪除
  19. 這條橋期待己久,終於通車了。揾次都去看看。

    回覆刪除
    回覆
    1. 盡量選一些非繁忙時段過關會較方便^^

      刪除
    2. 屋村巴會唔會載人過埋大橋去珠海 ?

      刪除
    3. 記憶中香港旅巴只去到香港關口,之後就換大陸旅巴

      刪除
  20. 事先張揚或新春將會去參加一鐵一橋嘅旅行團
    而家潮流最hit, 高鐵去廣州南 加 港珠澳大橋...
    而家行上嚟你嗰度,體驗下先

    回覆刪除
    回覆
    1. 咦,都唔錯喎,可以一次過試晒兩樣新嘢^^
      會去幾多日?

      刪除
  21. 東涌人工島關口大樓,天花木建築好靚,仲可以天然採光又幾好喎~

    回覆刪除
    回覆
    1. 對,木建築特別有一種東方美感....

      刪除
  22. 珠海都買到澳門手信~
    不過咁多人有排等~

    回覆刪除
    回覆
    1. 係呀,依家香港都買到澳門手信^^
      做生意真係最緊要收錢要夠快XXXD

      刪除