2019年2月14日 星期四

舊金山居閑話@Stevens Creek

不知不覺花了一年多時間,舊金山居閑話大長篇原來已經寫到來第33回了,以單一旅行計也超越2007年俄羅斯和2010年上海世博的超長氣網誌紀錄(同樣寫了32回)……咁來到最終回,大家會懷住咩心情陪基爾見證這歷史一刻呢?



這天會搭深宵機返歸,所以原則上仲有一整天時間要好好善用了。大清早起來先吃了碗熱辣辣麥皮加上昨天製作的blueberry muffins,之後就忙住執拾好行李及清理好房間(係咪好有手尾先)。



執好篋後又帶小狗高兒出去走個圈,就這樣悠閒地度過了一個上午;午後最佳節目當然是出去食個lunch,結果去了上圖這處吃美式三文治餐。



這間Sandwich Spot原來在加州也有頗多分店,看牆上的價目menu一般7蚊到8蚊美金已有交易(連飲品),聞說是熱門的學生飯堂。大快朵頤之後又去Stevens Creek Shoreline散散步!



這處是位於灣區南岸的淺海濕地區域,除了有很多小帆船和風帆板泊在岸邊之外,仲有好多遊湖的單車小艇出租,就似個水上遊樂中心。



這天天氣同樣非常好,黃昏時份超多家庭一家大細來湖邊逛逛感覺幾chill幾悠閒。上圖可見平靜如鏡的湖面,比昨天去過的Vasona Lake大得多。



日落的金光配襯帆船碼頭一定無得輸,連攝影技術和器材都好一般的基爾,也能捕捉到這令人迷醉的一刻……



夕陽醉了,落霞醉了,任誰都掩飾不了;因我的心,因我的心早醉掉……唔知返到老家之後,仲有冇這份閒情逸致經常去看日落呢?(答案當然係:「冇!」因為日落時份經常仍要在office中搏殺!)



除了看海,Stevens Creek這裏還有些小溪流和大片無盡草原,唔少人傍晚會來散步或者踩單車(有冇人又想來炒地皮起豪宅?好過填海)。



暮色漸濃,遊人亦漸散去,湖邊這間Lakeside Cafe也開始顯得冷清,基爾準備返歸食飯所以都無諗住幫趁佢(但佢向湖果邊個view確實幾靚)。



喱度又見到一大群雁來草地覓食,唔知係咪上次去日本公園見到果班呢?不過冬天可能都好多雁群飛來相對較暖的加州過冬,同蝴蝶一樣。



唔好hea咁耐都係快快趣趣返歸先,這晚不會出街食了,就留在家煮飯吧!基爾也有參與一份,在基爾媽「督導」下整咕嚕排骨,由於工序較繁複已經有好多年冇煮過……



好彩煮出來都唔錯喎!至少個賣相都叫做呃得下人先啦!吃飽飯就差不多要拖行李出機場了,幸好出境安檢過關都不太煩,十一點幾來到閘口準備登機時,慶幸開始有少少眼瞓。



眼瞓點解咁開心?主要原因係基爾其實大多數都無法在機上睡著覺,如果十幾粒鐘睡不著都幾難度過……不過上到機又畀電影螢幕吸引住!



去程時記得有睇Lala Land等幾套戲,回程看看又有乜睇先!結果睇了逆權司機和打死不離三父女都幾好睇,另外盧根和Home Again因為有點累只係半睡半睇,後者除了記得有Reese Witherspoon之外就唔太記得劇情了,亦唔知香港有冇上映?



睇完4套戲都竟然仲有成六、七個鐘要飛實在太恐怖了,不過左挨右靠點都係瞓唔著,無幾耐又見空姐來推餐車,到底算係晚餐定早餐?粟米蝦仁飯比想像中好食(至少有好多汁送飯),但亮點一定係那杯雪糕!



因為已經睇了四套戲,實在唔想繼續睇戲,於是看看飛行圖。一望條飛行路線原來回程是要飛越北極圈白令海,由舊金山向北繞經阿拉斯加再過去俄羅斯遠東的堪察加半島,再飛越北海道日本本州和台灣,感覺似飛了半個地球……結果花了十四個鐘坐到腰骨直晒先落機,平安抵家!

71 則留言:

  1. 講開我都有好N年冇搭過飛機。

    回覆刪除
  2. 一個旅程完咗,即係第二個旅程開始,應懷着期待的心情 ;-)

    回覆刪除
  3. 你的飛機餐很豐富,有名牌雪糕。

    回覆刪除
    回覆
    1. 杯雪糕係好重要的呢!!!wakakakaka.....

      刪除
  4. 情人節快樂!
    今年San Francesco n overall 加州都好凍呀。

    回覆刪除
    回覆
    1. 情人節快樂^^
      其實成個美國都凍啦,東岸仲犀利:P

      刪除
  5. 小聲說: LaLaLand好睇呀(反話),我睇咗唔夠一半就zzzZZZ咗,哈哈!又,原來SF飛香港都要14個鐘咁耐,只係俾Toronto少一小時,辛苦呀!

    回覆刪除
    回覆
    1. 啲風景都拍得幾靚嘅,我睇景為主XXXD
      唔知點解要繞了一個大圈,坐十幾粒鐘實在辛苦:P

      刪除
  6. 坐長途機真係坐到腰痛
    因航已經好多戲睇, 坐法蘭西個間真係悶到你呢....

    回覆刪除
    回覆
    1. 以前後生時唔太驚,近年就好怕了....XXD
      法蘭西果間唔太記得有冇坐過,但我有去過戴高樂:P
      我記得N年前坐過漢莎,是看走廊頂黐住的電視機仔,以前竟然都會有心機去睇可能因為實在太無聊吧!!!wakakaka.....

      刪除
    2. 法航係咪同荷航合併咗?會唔會有改善?

      刪除
    3. 依家啲航空公司競爭都好大,合併都可以加強實力嘅

      刪除
  7. 直坐十四個鐘,實在太攞命啦,寫完舊金山居閑話,咁下篇是?

    回覆刪除
    回覆
    1. 最尾果兩三個鐘直情要長駐廁所門口做伸展運動XXXD
      下篇是.....你有冇好提議^^

      刪除
  8. 十幾個鐘機訓唔到真係好辛苦!

    回覆刪除
  9. 新鮮食材唔用,两年前鷄尾又炒一碟,金山基伯真獨特。

    回覆刪除
  10. 所以我去歐洲都唔介意轉機,可以落機伸展下。
    話時話,到底你在舊金山留左幾耐?

    回覆刪除
    回覆
    1. 都係㗎,所以我見依家好多人飛歐洲都會選中東航空公司好似都唔錯,不過價錢就不算差太遠,但勝在可以break開兩程機舒服少少^^
      其實只係幾星期不算太耐,始終有份工在身嘛:P
      但就夠我寫成年都幾好,唔駛個blog丟空太耐無嘢寫囉XXXD

      刪除
    2. 等第時退休後再去玩耐少少囉XXD

      刪除
  11. 仔細的寫,留個好回憶,可以慢慢回味呢。我搭飛機,食得瞓得,十幾個鐘,無難度。so far!

    回覆刪除
    回覆
    1. 對呀,其實我間中都有自己睇返,好似俄羅斯旅程,基本上瑣碎的細節依家都忘了,自己閒來睇返一兩篇時,感覺都幾新鮮有趣XXD
      好明顯你有旅途達人的基因,食得瞓得是坐長程機必備的條件!!
      我自問就有待鍛煉一下,仍很有進步空間wakakaka.....

      刪除
  12. 初頭睇到第一段真係畀gael兄嚇一嚇…講到好似最後一篇咁…哈哈哈
    正所謂一個旅程的終結,等於下一個旅程的開始…期待更精彩的行程~~
    其實選擇退休後的生活,相信這裡很舒適 (若然能適應),因為香港個生活壓迫感都幾大…

    回覆刪除
    回覆
    1. Blogspot都未執笠我應該仲會寫下嘅!澳洲都未正式開筆寫呢XXXD
      況且.....我都唔捨得森兄成日百忙抽空來留言互動啦wakakaka...
      我都希望盡量寫有趣少少,給自己留作旅行紀念^^
      其實任何地方生活,我相信總有要面對的生活問題,正如森兄即使HK幾有壓逼感,一樣可以活得優閒,一杯清茶也可享受大半天閒情,這是我看森blog學到的養生之道吧\^^/
      btw,其實金山網誌還寫了個番外篇!留待日後先再出,還請森兄耐心等候:P

      刪除
    2. 我都認同, 咁多年以來, 寫Blog, 覆Blog,, 巡Blog已經成了生活習慣, 又其是一些關注的Blog友有冇新網誌出呢!!當然gael Blog時時留意啦…
      話時話, 森伯幾時一杯茶嘆成大半日, 除非喉嚨痛吞嚥困難啫~~~唉~~擰晒頭!!!!

      刪除
    3. wakakakaka....可能是周不時見到森兄post出來的一杯蜂蜜或湯圓糖水之類,總之鏡頭下森兄總會給人很懂養生和享受閒情的chill人印象!!
      很明顯森情小品文都是很用心經營花了不少心思寫blog的一群^^

      刪除
    4. 大夫咁耐唔見人係咪去咗炒地皮先XXD

      刪除
  13. 你個遊記寫咗咁耐,當然帶著失落的心情啦🤪
    返到香港日日搏殺,我地迷靠寫遊寫來延續旅程囉,咁樣諗都唔錯架~

    回覆刪除
    回覆
    1. 寫咗成三十幾篇都夠晒皮㗎啦,其實都無乜失落,因為仲有好多其他嘢等住寫XXXXD
      我都話同銀哥係香味相投wakakakaka.....靠寫遊寫來延續旅程<===沒有比這形容得更貼切了!!!

      刪除
    2. 好認同寫遊記來延續旅程,並作为回憶和分享。
      我係飛3x 個鈡都訓唔到。宜家會帶sleeping pill. 訓到時間會過得快。 我第一次食係只訓了2粒鈡!

      刪除
    3. wakakaka....所以咁多人愛寫旅行blog吧^^
      對,如果瞓得著應該會好少少,但食藥始終驚有副作用之類:P
      長程機如果可以躺睡就最正啦!!

      刪除
    4. 當然認同啦🤪
      所以咁多人愛寫旅行blog<--十多年熱潮時就係,而家D人興「吸晴」認同,寫幾句短句係面書甚至拍片先係大多數。呢D行為我都有,但不是為了認同,紀錄我行程點滴嘅blog先至係我最想做嘅事~

      刪除
    5. 人地啲旅行Vlog我都有睇喎有些都唔錯幾好睇!
      但我自己就無拍,如果又要影相又要拍片仲忙過返工!!好難可以安安樂樂享受旅程呢XXD

      刪除
    6. Vlog呢個字我都係早排先知咋!
      我曾經試過玩吓拍片,(當然無我旁白啦,自己講嘢唔得),你真係講得啱呀,「仲忙過返工!」所以拍咗一陣,其餘大部份時間收埋,享受旅程算吧,我又唔係想做網紅~

      刪除
    7. 你如果同銀嫂同行多個人幫手可以拍多少少片都ok嘅,當係留個紀念吧!^^
      享受旅程至緊要.....

      刪除
  14. 我有好幾年沒怎麼寫過遊記,因為用的時間很多,佩服基爾哥哥的毅力。
    等待最終的番外篇!

    回覆刪除
    回覆
    1. 對,真係有點費時間和心力,所以完成一整篇多少會有點成功感XXD
      想看阿摩的旅行靚相係咪要去fb?^^

      刪除
  15. 下次落實去邊未啊?^_^

    回覆刪除
    回覆
    1. 右邊「至愛網誌」欄內你搵到大把提議啦^_^

      刪除
    2. 果啲係我自己鐘意睇啫,同寫又是另一回事吧:P

      刪除
  16. 原來寫左咁耐架個遊記!!!
    多謝你完成左一個遊記俾我地睇...我明寫長遊記真係好辛苦~
    幾乖仔喎~又執房又煮飯~
    我都驚左飛美國~上次南美連續飛17小時真係驚左!

    回覆刪除
    回覆
    1. 係呀,不過又唔算寫好耐,之前果啲試過一寫寫足幾年都有之XXD
      你最懂這些,我都成日有關注你啲長遊記大旅行^^
      要啦,因為唔係住酒店,自己間房都要幫手自己執下....
      絕對係,可能我年紀大了(我說我自己wakakaka)實在不太慣長程飛行,或許如果可以有錢坐business/1st class又唔同咁話XXXXD

      刪除
    2. 南美我都好驚好遠機程......雖然心裏也想去:P

      刪除
    3. 先去sf 幾日,再轉去南美。

      刪除
    4. 都ok,但都應該係12+12不易應付吧:P

      刪除
    5. 所以我既12+12有中途站🤣

      刪除
    6. 要啦!!
      12+12其實對我而言都係大考驗呢:P

      刪除
  17. 咕嚕排骨單係睇樣睇色水賣相真係好得喎,相信味道都唔會差,哈哈...

    回覆刪除
    回覆
    1. 果然最識貨係你.....wakakakakaka!!XXD

      刪除
  18. 終於都寫完啦, 肥人幫你拍手掌歡呼..hahahaaaa
    坐成十幾個鐘..肥人應該叫左救命...平時坐飛機去日本肥人都已經唔太得啦...hahaa

    回覆刪除
    回覆
    1. 多謝你支持wakakaka....仲有個番外篇XXD
      都係近近地玩下爽,飛太遠實在辛苦自己,除非有錢買business!!^^

      刪除
  19. Stevens Creek Shoreline 個夕陽好靚,睇住夕陽都醉了,如果聽埋張學友唱歌就完美!

    回覆刪除
    回覆
    1. 咁耐無來留言嘅?!^^
      如果是拜日教徒,來這裏看日落是最佳位置了,附近也沒有什麼高樓大廈,可以影過飽呢!
      唔駛聽張學友唱啦,自己唱仲陶醉wakakaka.....

      刪除
  20. 夕陽醉了,當年張學友同陳法蓉去澳洲栢斯拍左個音樂特輯,拍得好靚

    回覆刪除
    回覆
    1. 嘩......你好記性喎仲記得係陳法蓉!!!
      我只記得係好似去澳洲拍的音樂特輯
      依家大台好似少了好多這類音樂特輯,可能無乜夠份量的歌手同佢拍?!

      刪除