2019年5月15日 星期三

雪梨盛夏光年@Boambee Bay

巡完一輪館之後,又可以集中返精神,繼續hea寫下外遊網誌……(仲有冇興趣follow?記唔記得上次寫到去邊?)



基爾盡能力在腦海中搜尋旅途回憶片段……話說回來,之前講到這次住的汽車旅館,好似住了兩晚都無乜影過佢外觀,這朝一早起床吃了麵包做早餐(之前一日買定),食飽反正閒著就走到旅館外圍逛逛兼影張相留念。



兩層高的旅館就長這樣!樓下那層有好多泊車位,如果嫌住雪梨市中心太貴,租住這外圍小城也不錯,記憶中好似係約百元澳幣一晚,算唔算平?



之後會合了大隊,再去先食個港式粥麵brunch,約莫十點幾差不多要展開今天的「小企鵝大長征」……開車個幾鐘左右,就來到上圖的第一個休息站Wyong,綠色這間快餐店在澳好似都幾多分店,不過因才剛吃得飽飽,所以只光顧了洗手間。



解決完生理需要問題之後無謂再四圍hea,火速出發上路去,沿途走的是NSW著名的Pacific Highway,整條公路主要沿著南太平洋海岸走,美景也不會令人入睡(雖然基爾也確實無可避免釣了一陣魚)……



兩三點左右又來到另一個休息站Taree,坐車坐到悶加上開始有點餓,拿拿聲入去個food court看看有乜野食下醫肚,除了麥記和Coolabah Tree Cafe之外仲有熟悉的上校炸雞店,結果揀了後者因為屋企人想食家庭全桶餐,個餐提供成支1.25L百事(好耐無見,因為家裏基本上已不會再買這種大支裝汽水,驚飲成個月都飲唔晒),另外還有一大杯coleslaw沙律,記憶中老家的KFC好似不太覺有這種酸菜沙律賣,大鄉里第一次吃覺得酸酸地幾fresh幾開胃好食。



飲飽食飽晒之後,立即又要繼續上征途!如果由朝早十點幾於雪梨開車出發計起,連食飯小休足足沿highway北上走了六七個鐘之久,終於在傍晚五點前來到了Boambee Bay這間resort。



Boambee Bay在哪裏?未聽過喎!基爾其實也是第一次來,這裏已經好近NSW北面邊界的Coffs Harbour,如果再向北開車走多四個幾鐘,就可以去到Queensland的Gold Coast和Brisbane了。



Check-in後拎了鎖匙泊好車推埋行李篋就去間獨立屋豪宅參觀一下吧!平時在老家住慣窩居的基爾,第一次來住這種大觀園式度假屋心情如何當然不用再仔細形容了,特別喜歡佢個森林景大露台,外圍就是無盡的沙灘,更好的是完全沒有西斜的暑熱感……Check-in還附送了天氣報告表,Coffs Harbour這一帶雖然位置更接近昆士蘭,但氣溫出奇地比雪梨涼快得多,夏季日間一般原來只有廿四、五度,夜晚更只得十七、八度左右,對基爾來說是超級正斗的清爽天氣!



唔講咁多無謂野,先安頓好晒行李再拎晒前一晚已買定好的食材,第一時間要準備來豪宅度假的第一餐入伙盛宴,到底煮乜食完全唔記得,開心到忘記了影相……食飽晒之後洗埋碗,見八點幾還不太夜又駕車出去Coffs Harbour個大商場逛街街,主力去超市先入一入貨,因為之後會在resort住成個禮拜咁耐,買定食材煮飯也是必須的指定動作。



駕車來這大商場也不遠,車程也不過十分鐘,規模當然不能與Sydney的大百貨公司shopping mall相比,但入面超市食肆cafe和各式生活用品店舖已齊備,趁未關門火速先巡一巡Woolworths和Coles,由於臨近收舖時間,偌大的超市裏幾乎空無一人很有包場shopping的感覺。



行外國超市經常會有選擇困難症發作,因為實在有太多未見過的野食想試了,加上來到澳洲大部份蔬果麵包蛋糕鮮奶芝士雪糕都要比老家平一大截而且味道種類又多,單單企在雪糕櫃前發呆已經唔想走開……咁最後買了乜先?Honey Gold Mangoes回來老家逛超市好似沒見過有這品種,這裏剛好特價賣AUD$5兩個,超級好味道!Orange Candy Melon有人頭咁大個,售價AUD$2.9(不是以磅計,係兩個九一整個,平到笑,但重點係超好食,平時在老家基爾都不太愛食蜜瓜,但這個確令人食唔停口)。



另外仲有其他無影包括200gm Bacon $4;原條5磅裝麥方包$2(夠食兩三日都食唔晒);1L盒裝鮮奶$2……順帶一提這裏超市也興自助畀錢,但有趣的是架機可以入銀仔幾好玩。入完糧餉駕車返resort,八卦走過去泳池和club house行個圈看看有乜野玩,明天如果唔出去可以來玩陣。

49 則留言:

  1. hea寫hea遊當然繼績有興趣啦,但你隔咗幾篇又真係唔太記得🤣
    基爾盡能力在腦海中搜尋旅途回憶片段<--基爾外遊有無閒情逸致寫吓遊記?寫咗迷記得囉~
    係呢間Resort住咁耐你就爽啦~

    回覆刪除
    回覆
    1. Waaaah.....銀哥咁早起身來留言好犀利^^
      多謝你咁捧場,唔記得唔緊要,其實每篇都可以獨立睇嘅!!
      有時會寫少少特別的東西先記下來,但今次無,因為純粹係去hea都無乜去特別旅遊景點參觀呢:P
      都幾爽,唔同玩法,都enjoy^^

      刪除
  2. coleslaw沙律印象以前有㗎。

    回覆刪除
    回覆
    1. Really~~~!!!我食咁耐都未見過,可能我多數食cheap餐:P

      刪除
  3. 係咪motel,我在美國跟巴士團玩,住過一晚。
    KFC咁多side dishes,我覺得coleslaw最好食。

    回覆刪除
    回覆
    1. 類似啦,勝在平,同埋都算乾淨企理!!
      我大鄉里第一次食,覺得酸酸地都幾開胃,唔錯呢!
      同埋有時食太多炸雞,食返啲菜會覺得無咁熱氣也無咁膩:P

      刪除
  4. 我都好鐘意去人地超市買嘢食.

    回覆刪除
    回覆
    1. 可以睇到好多平時HK少見的貨品,都幾得意嘅^^

      刪除
  5. 外國的生果平到笑,香港就越來越貴!

    回覆刪除
  6. PandaJoice:
    7 小時車程,司機好嘢!

    回覆刪除
  7. 香港少生果出,要靠進口當然貴啦…

    回覆刪除
    回覆
    1. 尤其啲日韓貴價生果特別貴呢:P

      刪除
    2. 森兄記得唔好再掉雪梨芯入廁所wakakaka....

      刪除
    3. 你仲記得…好嘢喎~~
      自此後都唔敢嘞…:P

      刪除
    4. 證明我都好留意森兄啲生活趣事嘅XXXXD

      刪除
  8. 去外地最中意行超市,好多野都想買,買返可當手信,哈哈!

    回覆刪除
    回覆
    1. 都係,通常都係食品,可以當手信也可以自己食,延續一下旅行的滋味感覺^^

      刪除
  9. N年前嘅肯德基係有菜絲沙律架, 記住係N年前
    架酒店相比HK真係唔係貴啦

    回覆刪除
    回覆
    1. wakakaka.....我大郷里未食過呢:P
      HK住賓館唔知幾錢呢??

      刪除
    2. 你唔會住重慶大廈個D掛

      刪除
    3. 唔係網紅唔駛去親身體驗喎XXXD

      刪除
  10. 而家去到外國就覺得香港好多嘢都好貴呀!

    回覆刪除
  11. 八卦走過去泳池和club house行個圈看看有乜野玩--->欲知後事如何,且看下回分解?^_^

    回覆刪除
  12. 我都係超級鍾意行超級市場, Coles,Woolworth, Aldi wa wa wa,我啲超重行李係有理由嘅,哈哈哈。
    未去過Coffs Harbour 添,好舒服呀。

    回覆刪除
    回覆
    1. 如果住的民宿有廚房,MD都可以即席顯身手,唔駛帶回家先食囉^^
      可能因為適逢聖誕長假期,附近都幾多當地人駕車來度假呢!

      刪除
    2. 我多數在表姐家住,都有為佢地煮飯,有次係過新年,所以未去已經同我講話要食甚麼,哈哈哈,咁俾面當然煮煮煮啦。

      刪除
    3. 咁佢地一定有口福,成日要關注定你個blog,可以bookmark定個菜單
      wakakakakaka......

      刪除
  13. 咦~住成個禮拜呢間RESORT咁應該係渡假遊喎~~~
    我都好鐘意行澳洲超市...真係好平好多野買~~~~

    回覆刪除
    回覆
    1. 係呀所以無乜去咩景點,純粹係去hea下咋:P
      奶類生果麵包同好多日用品都比港澳平,你地更加係最有錢城市的消費水平呢wakakakaka.....

      刪除
    2. 但有無停係呢度然後去周邊景點行下呀~
      我上次去澳洲超市呢...買左舊豬肉番酒店式公寓度煲雜菜湯....勁爆好飲!!仲要D煲湯豬肉都超勁好味....好羨慕

      刪除
    3. 咁都有嘅,因為附近都有唔少特別風景睇下^^
      有個廚房可以自己煮下都唔錯呀,唔駛餐餐出街食......
      仲煲埋湯你地真係好夠!!
      豬肉係咪濃味過黑毛豚?

      刪除
  14. 你地幾多人去呀,揸一架車夠唔夠坐呀?

    以前返香港覺得物價同食都抵過我呢邊,不過近年香港飲食真係貴咗好多,兩個人喺cwb隨便食餐lunch,一張大牛都已經無得找啦。^^”

    回覆刪除
    回覆
    1. 夠坐啦唔係好多人啫wakakaka.....
      但重點係我地人工無你地咁多,但承受的消費水平就同你地差不多囉:P

      刪除
  15. 一個人行咁大間超市感覺一定好爽!😂👍🏻

    回覆刪除
    回覆
    1. 舒服好多又輕鬆好多,無咁大生活壓力XXXXD

      刪除
  16. 咁大間超市,剩係蔬果部就己經又大又多種類,而且冇乜顧客,幾乎包場,勁呀!

    回覆刪除
    回覆
    1. 可能因為夜晚會比較少客人來買野吧!
      唔似HK啲超市咁即使九點十點依然一樣咁多人逛XXXD

      刪除
  17. 我都好鍾意行老外超市 , 好多未見過的東西好吸引 .

    回覆刪除
    回覆
    1. 係呀都幾多新鮮野睇,可以買啲特別野當手信囉^^

      刪除
  18. KFC比HK好食?
    好大的超市,C9一定會發癲~~~哈哈

    回覆刪除
    回覆
    1. 其實花款無HK咁多,但份量好勁,同埋有HK比較少見的酸菜沙律....
      可以睇下人地有乜地道野買都幾好玩嘅^^

      刪除