2019年5月22日 星期三

雪梨盛夏光年@Coffs Harbour

晨早空氣清新開朗……來到這個靚靚度假村當然不能浪費了和煦的澳大利亞晨光,大清早六點幾醒來梳洗後即刻出外緩跑晨運去!



基爾這次住的是二樓,感覺上較有privacy。不過後園這邊其實也不算太多閒雜人,基本上只有度假村住客才會行經這裏吧!



後花園對出有條小徑,再外面就是條河流,今天這清早正好遇上潮漲,不斷有海水由外面的河口湧進來。



沿小徑再往前走會見到有個公眾燒烤場(度假村外圍),weekend那幾晚在屋裏也會聞到一點由燒烤場飄過來的香味,幸好人聲不算嘈雜。



燒烤場旁邊有個小沙灘,可能由於接近聖誕長假期,都見幾多當地家庭扶老攜幼來玩個day trip,除了可燒野食和游水之外,沙灘旁有間小店可以租借canoe來扒下,同埋仲有可以試玩企在滑浪板上扒的paddle board,但基爾沒膽量試咁就無去八卦睇下幾錢了。



行去另一邊有一排度假村住客專用的獨木舟,不過這朝太早職員counter都未開工,只純粹來巡視一下而已;之後某天中午才再來扒,要先向職員登記領取救生衣才可來取艇(那天剛好未完全潮漲,可以扒到河中心的淺沙洲玩幾過癮,但因怕會掉進水裏所以沒帶手機隨身,一張相都無影到)!



所以風景照片就靠這朝早去影晒!澳洲盛夏的天氣真係無得輸,經常可見到藍天與白雲,大清早也不算太熱,出戶外遊逛唯一要緊記的是戴定牛仔帽和搽防曬!



沿河邊緩跑了一小圈之後又係時候要返歸,大片青青草地真係令人身心好舒暢,果然是度假的好地方(最緊要係看來無乜外地遊客,也不見有人開大喇叭跳廣場舞)!



火速吃了簡單麵包早餐後(都忘了影相所以不記得吃了什麼),才九點幾十點又再駕車出遊了,今朝會去個主題公園睇香蕉。



話時話Coffs Harbour周邊都幾多旅遊景點,但相信應該不是太多外國遊客會來,今次基爾也是第一次來度假,這個香舊樂園眼見來的大部份應是當地人,或者是由Sydney or Brisbane和Gold Coast附近城市駕車來度聖誕長假期的澳洲人吧!



香蕉樂園入面有少量山坡滑道之類的遊樂設施,但不要期望有什麼大型機動遊戲,基爾只集中去巡一巡紀念品店和雪糕店而已。



紀念品店都有幾多林沈野賣,除了慣見的postcard和tee、茶杯、筆、匙扣之外,櫥窗上掛著的這些香蕉仔都幾可愛,AUD$8.95約50蚊港紙一隻,驚阻掟就影相當買了!



最熱鬧的自然係間雪糕店,人地話明係香蕉樂園所以見唔少人都有買香蕉船來食,另外仲有香蕉味雪糕都想試一啖,但條人龍太長所以都係睇過當食了(要減肥呀喂……!)順帶一提上圖左那間是XD Theatre,類似動感影院之類,但因為未見有開場所以水靜河飛。



又唔食又唔玩咁來做咩先?去逛逛樂園入面這些workshop囉!佢有幾間店舖有教人即席整芝士和整糖,仲有示範切割玉石之類,不知這些切開來似雨花石圖案的礦石是否當地特產,但由於有一定重量,基爾完全無打算要買回家擺(也沒有地方擺)!



都係過隔籬檔口睇人地整糖好過,一入到這間店就聞到成間都好香糖果味,即時好有食糖的意慾,幸好基爾定力夠只看不買(肥呀……!)



細路仔入到來可能就會迅即被迷惑了,眼見色彩繽紛的糖果也確實吸引,一包入面有唔同果味和圖案,試食過師傅以閃電手速度整果隻kiwifruit味,真係好香奇異果味道。



運完一輪吉之後,就hea蕩去停車場拎返架車,見到隔籬停了一架鮮黃色香蕉樂園車喎!唔知係咪職員專用,車身都畫得幾靚呢!



逛完香蕉樂園之後,咁見時間又差不多lunch hour了,於是又駕車去返前一晚去過Coffs Harbour市中心那個大商場睇睇有乜食啦!這天來冇記錯好似係weekend所以郵局冇開冇得入去八下,但幸好Target那間百貨店有開都可以有野行一陣!



唔係明明話來食個晏先咩?都係一陣先去shopping啦!商場入面有個幾大的food court,話時話好多年前老家的大型商場都好流行有food court,不過近年差不多都摺埋晒了,小店式經營始終敵不過大財團吧!



喱度的food court明顯仲有不錯的生存空間,中餐食檔看來也是老外的心頭好不乏捧場客,這間名叫「奉天」的基爾有巡過一遍,大多北方菜式為主不算太合基爾胃口,咁再四圍行多陣先反正不太餓。行行下行到一處中庭位置又見到唔少人來排隊喎!估唔到估佢地係排緊乜?



無錯喇佢地並唔係排隊買野食,而係排隊同聖誕老人影張靚相!雖然商場入面係有冷氣,但始終天時暑熱個個穿背心短褲同穿上厚厚紅色大衣的聖誕老人合照,個畫面怪怪的真有點不太習慣!



基爾大人大者又無乜意欲同小朋友爭排隊同聖誕老人影相,咁就在核心的外圍影下相算啦!不過說時遲那時快突然有位鬼妹工作人員以九秒九速度竄出來同基爾講核心外圍都唔畀影相喎!幸好她態度算友善,咁基爾say個sorry就轉身鬆人繼續在商場四圍蕩。



蕩到開始有少少打鼓聲音傳出之際,見商場個map原來外圍有間Domino's喎!反正好似未試過在澳洲食pizza咁不如去試試。不過原來間店位置又真係好外圍橫街,找了好一會要問路人最終先搵到……



平時基爾在老家都好少幫趁Domino's所以都唔太知價錢如何,這裏兩個大批賣AUD$25.95,蒜蓉包就AUD$2.95,唔知抵唔抵食過香港?比較麻煩係這間店原來只做takeaway連少少企位小圓桌或bar table果類都欠奉,咁點呀?……咁咪唯有乖乖托住個大pizza返返入去商場個food court搵個冷氣靚位安安樂樂食囉!



雖然行來行去係有點論盡,但幸好個pizza又幾好食喎!這裏的薄餅餡料當然沒有老家咁多選擇,也沒有乜乜物物芝心手指扭扭批咁多花款揀,但基爾反而很喜歡這種平平實實的薄批,至少不會食滯,批底餅身也很香脆好味。好了!人食飽飽之後,架車當然都要去吃過飽先得,昨天跑了7粒鐘車程之後都仲未去入油。



又係街市行情報道時間!外國入油唔駛問阿貴一定比老家平得多,但到底係咪平好多就要交由有駕車的blog友先解答到……這裏入diesel約莫50L就係AUD$73,三得個三六得個六折算港紙約$410左右吧!隔籬支槍入無鉛汽油好似都係差唔多價。



入完油之後,又係時候返歸,去游一陣水享用一下resort的設施先啦(當然又係無影相)!下午時份熱頭正正,有乜活動好得過浸在泳池中消消暑……hea游個幾鐘感覺良好,又似乎多了quota去吃個輕食下午茶。不過悠閒的傍晚時份,慵慵懶懶不想再出外覓食,咁之前在商場超市買定的零食糧餉係時候出場了!



先來件cheesecake先,基爾覺得Coles出品的這盒芝士蛋糕餅身細滑好味過老家買的莎莉,濃濃芝士味實在令人唔停得口;朝早食過的大條全麥麵包又平又抵食,食幾餐都食唔晒;另外平時不太敢飲鮮奶驚肚仔痛的基爾,見這裏超市有賣lactose free的牛奶就最好不過,飲過完全無事可以放膽飲了!

50 則留言:

  1. 英國所有的Domino's都係外賣店。餐廳已經執哂。地方咁靚,氣氛顯得特別寧靜平和。

    回覆刪除
    回覆
    1. OIC.....!!!不過好彩你地果度應該選擇頗多,不一定要幫襯啲連鎖店吧?!
      你完全明白人身在外地可以享受片刻寧靜平和的可貴.....平時在HK周街都係人實在已經煩嚣到夠晒皮XXXD

      刪除
  2. Workshop乜唔係教人食蕉,接蕉...㗎!!

    回覆刪除
    回覆
    1. 佢好似係有片農地做蕉園但我無行過去,唔知當造季節時期會唔會真係有摘蕉玩下呢??

      刪除
  3. 香港唔知有冇無乳糖牛奶呢?

    回覆刪除
    回覆
    1. 有見過呀,但選擇無咁多,暫時只見百記有Harvey這牌子有lactose free,盒裝的,同樣是來自澳洲!

      刪除
  4. 好醒神的鮮黃色香蕉樂園車呀!

    回覆刪除
    回覆
    1. 架車幾靚,唔知係職員專用定係畀VIP坐?

      刪除
  5. 住喺呢度,空氣又好,地方又大,真係會健康啲哈

    回覆刪除
  6. 飲奶會肚仔痛,可能你腸胃對乳糖敏感…
    睇完你先明白啲澳洲人點解身型咁龐大…哈哈

    回覆刪除
    回覆
    1. 聽聞過人地話如果長期飲返等腸胃習慣返就無問題,但先決條件係要放個長假期可以留在家先得wakakakaka....
      都唔只澳洲,睇過好多英文台的飲食健康節目話歐美英人好多都係吸收過量熱量糖份之類,同飲食習慣不無關係呢!

      刪除
  7. 我老伴話澳洲油平過香港好多。

    回覆刪除
    回覆
    1. 我諗全世界大部份地方入油應該都比HK平吧:P

      刪除
    2. 大馬近汶萊可能都一樣有油田係咪??
      四蚊一L係咪平過HK入油好多?

      刪除
    3. 咁HK真係貴好多,而且人口太密集人多車又多,塞車泊車也煩....
      環保方便多用公交出行XXD

      刪除
  8. 香港 food court 係咪淨番大食代?
    原來你識扒獨木舟

    回覆刪除
    回覆
    1. 我平常有去果啲大商場一般都無晒food court了,可能分租出去比做food court收更多舖租吧:P
      唔識㗎,第一次處子下海㗎咋XXXXD

      刪除
  9. 香蕉樂園都幾有趣,行下當運動。

    回覆刪除
  10. 下次怕掉落水,將相機放入防水袋,就可以影相了.

    回覆刪除
    回覆
    1. 驚掉落海之後搵唔返咪大件事XXD

      刪除
  11. 香港今年好似雨水多,總是見不到太陽,雪梨盛夏陽光好舒服,我掛住太陽伯伯﹗

    回覆刪除
    回覆
    1. 雨水多都好,唔怕制水XXXD
      我諗至少要到端午節後先會有猛烈大太陽,到時就可以去晒棉胎了^^

      刪除
  12. 香蕉樂園咁搞笑既~~好似D活動同香蕉無咩關係咁~~~
    我仲以為有採摘生果呢類環節添~~~XXXD

    回覆刪除
    回覆
    1. 睇地圖見佢地係有個蕉園,但可能未逢時未摘得啩:P

      刪除
    2. 下~~~天真的我以為一年四季都係蕉季添:P

      刪除
    3. 其實我都唔太清楚XXXD

      刪除
  13. 開頭仲以為香蕉樂園會有大型蕉林之類=P

    回覆刪除
    回覆
    1. 佢都有個蕉園嘅,但唔知係咪唔逢時所以唔太見有摘蕉活動....

      刪除
  14. 咁搞笑香蕉樂園我以為主題公園添
    我哋啲老嘢就諗起香蕉俱樂部
    Pizza真係受歡迎 冇得輸
    最近聽到個電台節目
    有個聽眾移民咗澳洲好耐
    佢話澳洲最出名三樣嘢
    烏蠅、肥婆、醉酒佬...

    回覆刪除
    回覆
    1. 我可能冇行晒只行了部份咋!!
      係咪電台節目定電影??
      都係fast food方便快靚正又食得飽^^
      烏蠅就一度度地方,城市唔算太嚴重,內陸可能會犀利好多
      肥就一定唔只澳洲啦XXD
      醉酒佬幸好我不多蒲bar所以不多見呢:P

      刪除
  15. 晨早空氣好,有益健康。
    下晝又游水,夠運動量,唔怕肥,可以多吃🤣🤣

    回覆刪除
    回覆
    1. 如果可以都係盡量早睡早起比較健康一點吧^^
      我肥底,都係唔敢多吃了:P

      刪除
  16. 哈哈~大大片青青草地,係好適合好跳廣場舞,當然如果沒有音樂,只是安靜地跳舞,就不會影響別人,就好像耍太極,沒有噪音問題。但跳沒有音樂的舞,我知無可能 :D

    回覆刪除
    回覆
    1. 如果附近都無民居,有音樂都無乜所謂,或者開細聲啲或者自己戴住耳機聽住來跳囉XXXD

      刪除
  17. 扒獨木舟,我只做過副手,未曾試過一個人獨扒。我又不肯穿救生衣,真傻!
    如果未曾學過兩三道板斧,謬謬然下水,很容易扒扒吓就反艇跌落水。

    回覆刪除
    回覆
    1. 穿救生衣都好重要,安全啲丫嘛,這裏都一定要穿救生衣才可下水!!
      初學者最好去啲水流平靜一點的地方,注意潮汐就更佳,當然如果有教練同行更好,反艇都有人幫手^^
      第一次扒其實我覺得都幾累,無想像中咁鬆輕呢:P

      刪除
    2. 扒獨木舟比較輕鬆,不過要學識在反艇之後,識得把艇反正,再上艇。
      此外,拿雙槳扒“舢舨”,若是隔得久才扒一次的話,扒完會手痛骨痛,成個人好似散晒一樣。

      刪除
    3. 我記得以前屯門公園好似都有得扒艇仔,不過依家就無了
      之前去迪茵湖就見有水上單車踩^^
      好同意!!有時見別人在城門河划艇望落係幾輕鬆,其實都頗吃力呢:P

      刪除
    4. 如果經常扒的話,筋骨活動得多,就不會覺得辛苦,會越來越輕鬆。

      刪除
    5. 秋葉說得對,所以如果養成做運動的習慣,健康也一定有改善^^

      刪除
  18. 我都以為蕉園係樂園添^^”。

    呢個旅程感覺上好舒服寫意呀,尤其係住嘅地方,瞓醒就出去望住個靚view散步,千金難買呀!

    回覆刪除
    回覆
    1. 有少少機動遊戲高卡車之類玩,不過我無去果邊啫:P
      其實外國生活應該大部份都比HK無咁緊張吧,至少唔駛逼火車逼巴士周街逼滿人XXXD

      刪除
  19. 生活好健康,去到咁遠都跑步~
    係香港我唔願郁,哈哈~

    回覆刪除
    回覆
    1. 見Matthew平時都經常行山,運動量其實都幾充足吧^^

      刪除
  20. 河流?有無鱷魚?澳洲好多鱷魚的!
    香蕉樂園不太特別,運桔正常~
    差在未著比堅尼同聖誕老人合照🤣

    回覆刪除
    回覆
    1. 咁我又無深究,但鱷魚係咪通常雜草叢生果類沼澤區先比較常見??
      如果來這個小港灣應該不會有太多獵物吧,如棲息在這裏應要捱餓了...
      咁又無見喎,始終係個商場嘛,穿比堅尼可能會驚冷氣凍親XXXD

      刪除