2012年3月29日 星期四

生昌潮洲海鮮酒家@大圍

大圍顯徑一帶原來都有唔少食肆,基爾反而唔係咁常來,今次出巡的喱間生昌潮菜酒家也是第一次來,可能由於是周日非常旺場,要坐到上3樓。



生昌潮洲海鮮酒家就在田心警署對面,非常出名,住果頭的一定知,雖然不是築於海邊,但也很有點離島海鮮檔的味道,喱日去到時,所有露天位爆晒!



3樓靜靜地都好,坐低開餐!左邊喱條烏頭魚好大條,之前知道潮州人鍾意用酸梅蒸烏頭,基爾唔太愛,但今次喱種鹽焗煮法又幾得喎,like!另外仲有成大碟鹹酸菜,沒錯這並非細細碟果隻前菜,係而好大碟的。基爾平時唔太食鹹酸菜,但喱味係甜多過鹹同酸,仲係清甜果隻,出奇地好好味,食左好多!



食完鹹酸菜胃口大振,見隔籬叫了成大碟煎蠔餅,直情係蠔餅同個碟一樣大,於是又叫了。某潮州人一食就話係用豬油煎,夠地道,基爾就略嫌肥膩熱氣,但裏面又真係好多蠔仔,忍唔到口都食左幾件。再來另一味熱氣野——花枝蟹棗,都係招牌菜之一,食落似炸了的蟹丸,大大粒幾唔錯!



鹵水鵝就同出面食的差不多,水準average,價錢又唔算貴,至少抵食。比較特別係右面喱味豉油皇吊筒,一咬落去係會即時噴墨的,仲會成棚牙黑晒,夠驚嚇!



蠔仔粥也是必食之選,同煎蠔餅一樣都係有好多蠔仔,貨真價實!而且食得太多肥膩煎炸野很有罪咎感,清清地食返碗粥聚聚火都係好的!再來一碟同樣是清淡的蒜蓉豆苗,感覺當堂好似無咁熱氣(心理上)!



好喇到基爾最期待的飯後甜品出場,之前食潮菜試過食反沙芋,長長地一條條四四方方咁,咬落外皮脆脆地甜甜地都幾好食。今次食的喱味芋泥初頭驚咁林唔會好食,但食落又有意外驚喜,淋在上面的糖漿不太甜,芋泥本身質感幼細軟滑,似食雪糕,所以雖然係好鬼飽,但都一樣掃清一啖不留!最後要提提右面果包雞蛋餅,好耐無食過呢!
 
生昌潮洲海鮮酒家
大圍下徑口村151號地下

沒有留言:

張貼留言