2014年1月3日 星期五

烤爐印度餐廳@炮台山

據過往經驗,似乎寫來寫去都係「食探出巡」最受歡迎,咁2014年第一篇就寫「為食blog」啦!不過今次唔係去食爐端燒,而係食印度菜。



北角這一帶唔知係咪都幾多印巴裔人士居住,連帶附近都有不少印巴土耳其餐廳菜館,之前去過海光街的TAVA和七姊妹道的羅勒印度餐廳Tulsi Indian Restaurant,兩間都係地舖,雖然平均消費價稍貴但環境比侷促的重慶大廈舒適(其實重慶大廈的印度菜也不便宜)。至於今次去的是上面這間烤爐印度餐廳。



好耐之前已聽友人講過喱間印度菜館大有來頭,所以喱日收工一於搭叮叮過去炮台山電氣道街市上面的熟食市場做「食探」。上到去雖然已經差不多七點幾八點但食客不多,只有旁邊幾檔中式小菜和打邊爐的較多人……Anyway,先坐低睇睇menu,雖然只有一頁紙但選擇也算多,一於交由友人發辦點菜。



上面喱味大力菜燴羊肉Mutton Saag($78)驟眼睇賣相雖然麻麻地,但基爾食落即時豎起手指公叫好,綠色菠菜蓉令羊肉增添了一份獨特的清新感覺,有別於一般比較濃味的印度菜式。除了燴羊肉外,老闆還免費奉送「餐前小食」威化胡椒餅Poppadoms,薄脆得來也很有胡椒香味,沾上薄荷他他醬Riata Sauce來食,確是個頗開胃的前菜。



另外必叫的還有芝士烤餅Cheese Nan($24),一端出來已經不斷散發濃郁的芝士香味,它餅身雖然厚但不會有pizza那種油膩感,一入口軟綿綿熱辣辣加上芝士香撲鼻而來真係超正,冬天食就最適合不過。另一味令基爾直樹大拇指的是上圖右的香燒春雞Tandoori Chicken($69),聽聞老闆兼主廚特別從印度訂製了攝氏達300度的Tandoori烤爐運返香港,就是為了炮製喱味地道風味招牌菜。最特別係喱味烤雞唔似一般印度餐廳的烤雞咁乾爭爭鞋烚烚,因為佢入爐前除了用咖喱粉、肉桂、藏紅花粉等醃雞外,還會塗上乳酪做「太陽油」,所以燒出來既金黃香嫩又帶點獨特的乳酪味。上圖左是印式燴茄子Brinjal Masala($63)。



食了咁多味其實都幾飽,不過由於烤餅實在太好味關係,再order多一個蒜蓉烤餅Garlic Nan($22),同樣係一端出來就聞到香噴噴的蒜香味,即使飽都要食多一塊。值得一提是通常食濃味菜式都會口渴,但今次這餐基爾只叫了上面這杯青檸梳打Lime Soda,唔算太口渴而已。聽友人講喱間印度菜館的主廚兼老闆來頭不小,曾在山頂峰景餐廳、太平山餐廳擔任大廚,還曾在筲箕灣剛被除了米芝蓮星的恆河咖喱屋工作過云云……Anyway,由於尚有幾味蕃茄咖喱和黃薑飯未有機會試,以這餐人均約$140計,絕對期待再來返兜encore!

烤爐印度餐廳 Clay Pot Indian Restaurant
北角電氣道229號電氣道市政大廈2樓CF5號舖


p.s.2014食探出巡頭炮同場特別贈獻:麥記招財福堡餐



最近在電視看到麥記廣告,知道臨近農曆新年該店又重推招財牛雞福堡,基爾唔食牛所以對福堡興趣不大,反而見到其餘三樣:小龍蝦湯、紅豆批和扭扭薯條即時兩眼放光,喱日tea time一於相約同事去麥記食。



可能由於少少肚餓關係,加上天寒地凍,喱一小碗熱辣辣小龍蝦湯就份外滋味,就咁食係有少少偏鹹,相信如果食住個包一邊飲就無咁鹹,湯裏有一粒粒小蝦肉,連餐叫只需$8。



另一款基爾特別期待再食的就係上面喱味紅豆批,其實基爾向來到所有蘋果批菠蘿批之類都敬而遠之,唯一只對紅豆批情有獨鍾,可能好多人會覺得佢偏甜,這卻正合基爾胃口,新鮮出爐熱辣辣特別正呀!

65 則留言:

  1. 好咪喎,我食印度餐都會點Tandoori⋯⋯好香。

    回覆刪除
    回覆
    1. Koosan:係呀睇openrice好似都係必食之選

      刪除
  2. 蒜蓉烤餅Garlic Nan...啱我....好味。

    回覆刪除
    回覆
    1. 卡:蒜蓉味好香濃的^^

      刪除
    2. 做乜叫人做"卡" ...喺 "嘉嘉" 呀!

      刪除
    3. Ka:是但啦個嘉字難打啲丫嘛XXXD

      刪除
  3. Poppadoms我至愛. 臨近農曆新年乜唔係出招財馬堡o既?? 紅豆批又係我至愛.

    回覆刪除
    回覆
    1. 印度胡椒餅幾脆好食過薯片
      香港唔知食唔食得馬肉架呢?
      其實都唔一定要跟生肖,如果唔係狗年咪鑊?!!!><
      咁王子餐廳個menu有冇紅豆批點架先^0^

      刪除
  4. 好介紹! 我都好喜歡食印度菜。你地好似只得兩個人,食左好多嘢!

    回覆刪除
  5. 估唔到炮台山都隱藏住咁正宗既外國美食,平時少去個邊真係唔知...有機會要去發掘一下~

    回覆刪除
    回覆
    1. Matthew:我平時都好少去喱邊,今次都係第一次去咋

      刪除
  6. 以前食麥記,都會幫襯佢的蘋果批,其他口味都想試,不過一直未有機會...

    回覆刪除
    回覆
    1. 森:其實我平時都少幫襯麥記,不過今次三樣新野都啱我胃口^^

      刪除
  7. 極少食印度菜,但睇黎唔差幾吸引喎!

    回覆刪除
    回覆
    1. Wan:我之前都只係試過兩三間,但覺得喱間已經係中上水準

      刪除
  8. 回覆
    1. BK:經我加鹽加醋之後係咪引到你流口水kakakaka

      刪除
  9. Must try this Indian restaurant if I have chance.

    回覆刪除
    回覆
    1. Ray:其實都好近炮台山站,地點不難找的

      刪除
  10. 印度菜我的最愛是 panner butter masala,我甚至會在家自行炮製,連香料都要生磨,而且還要慢慢炆,所以做這一道菜往往費時兩小時過外!

    回覆刪除
    回覆
    1. Desa:咁你都算快手喎,我就完全唔識整:P

      刪除
  11. 為食blog主出巡啦!我條頸太長囉!流口水都仲未滴到落地!

    回覆刪除
    回覆
    1. 基仔你米喱埋唔見人吓!

      刪除
    2. JJ:kakakakaka~~~咁係咪即係想睇返旅行嘢先?!!!!
      喱排忙呀,回應都無時間><

      刪除
  12. 好介紹呀 , 兩間我都想食呀 , 由其印度芝士烤餅經你形容更加令我口水流啊 !

    回覆刪除
    回覆
    1. ak:之前好似睇過你都有介紹元朗定荃灣有間印度菜都唔錯喎,有冇同相公去encore吓呢?
      麥記銀座都有好方便你啦^^

      刪除
    2. 係元朗 , 但有兩間我唔記咗邊間添 , 最近稍忙遲d 睇番舊 blog 再去幫襯 . 銀座嗰間我唔多想幫襯 , 因為得半片芝士冇喱味道 .

      刪除
    3. ak:oic~~~其實元朗都幾多好嘢食的呢
      原來如此,我仲以為間間麥記的出品都係standard,原來係有分別

      刪除
  13. 其實我幾鍾意食印度野, 以前係英國成日叫的.
    番到黎, 覺得難搵好食的, 你今次介紹呢間好似錯咁喎.

    回覆刪除
    回覆
    1. 魚:係呀英國我諗都多印度人,食印度菜應該都幾地道
      如果去開北角區不妨去找找,我覺得水準幾唔錯的

      刪除
  14. 又食好野.....又唔帶我去.......

    回覆刪除
  15. 以前讀書時印象中我只食過一次,仲係個印度同事煮嘅咖喱,撈埋飯食,好親切!
    祝你2014年有個好開始!

    回覆刪除
    回覆
    1. BIM:由地道人煮始終感覺更地道^^
      也祝你有個美滿甜蜜的2014XXD

      刪除
  16. 我上一次食印度野已經是十年前了,其實都食唔出佢D又紅又橙又黃的,是什麼肉。最大件事是食了個印度雪榚,柯了2日,所以從此不再吃印度野!

    回覆刪除
    回覆
    1. King:嘩!!!!咁都幾大鑊喎,唔怪得你印象咁難忘><

      刪除
  17. Gael,這間印度餐廳我常常幫襯,味道不錯.

    回覆刪除
  18. 個羊肉就咁睇個賣相真係好差!哈哈!

    回覆刪除
    回覆
    1. Teddy:可能佢地重視味道多過裝飾啦^^

      刪除
  19. 個樣都可以接受~相信味道幾特別下.
    有機會去過去都想試下.

    回覆刪除
    回覆
    1. Andy:如果去開港島行山都可以順道來喱度食㗎

      刪除
  20. 扭扭薯條真係好吸引)))))
    北角我"好似"未去過.......嗚嗚

    回覆刪除
    回覆
    1. Yan:係呀我都比較鍾意扭扭薯條
      喱頭又好似無乜特別地方,如果去開皇家遊艇會都可以去埋喱度,因為就在隔籬而已

      刪除
  21. 看來很吸引呢!祝新年快樂!

    回覆刪除
  22. 我喜歡飲湯, 不知有什麼出名印度湯介紹?

    回覆刪除
    回覆
    1. Peter:印度中好似有蕃茄湯磨菇湯之類,下次再去都想試試^^

      刪除
  23. 咁遠,我有機會去北角和北京都一樣少。。。。哈哈哈!
    紅豆派正呀!!

    回覆刪除
    回覆
    1. Lucamom:唔緊要喱間我諗唔會執,下次回來再去試下囉^^
      你有冇整過紅豆pie畀大小豆食下呢

      刪除
  24. 好味呀,印度菜,最喜愛。 ^0^

    回覆刪除
  25. Brinjal Masala真係無得輸, 太正

    回覆刪除
    回覆
    1. 祖:我覺得唔太辣,幾好味,可能「改良」咗迎合港人口味^^

      刪除