2018年1月3日 星期三

舊金山居閑話@起飛

眨下眼又hea了大半個月,成個聖誕新年happy長假期都過晒,係時候要開始動筆寫2018年第一blog了吧!會唔會有人已經等到有少少心急?終於起飛了!雖然到依家好似都仲有少少jet lag時差,要捽捽對眼先可以開筆寫blog(眼訓中)……



出發當天是星期日,不過可能仲未到長假期開始,所以都唔算人頭湧湧喎,反而仲覺得個機場有少少靜蠅蠅!雖然是坐傍晚機,但吃了午飯就已準備好出發去搭機場巴了,因為飛美國機可能安檢程序會多一點,為穩妥起見還是提早少少出機場吧!



由於今次主要任務係為東西兩宮太后出巡西京護駕,小基子實在不容有閃失,盡可能預鬆少少時間,check-in填行李牌、帶路入閘安檢以至在機上幫忙點飛機餐和填美國入境紙等大小雜務都要妥善安排。由於臨近聖誕,上圖departure果層有班choir唱聖誕歌搞搞氣氛,不少遊人都駐足觀賞,基爾寄完行李都同兩宮太后落去八下先!



見時間差不多都係早少少入去登機閘口,因為在閘口前所有飛美國機最近都新增多一重「問話」手續,其實都係D簡單提問,例如去美國做乜?去幾耐?手提行李有冇離開過自己之類……



飛機準時起飛,傍晚7時已在空中展開歷時十幾粒鐘的航程。這次坐的是A350-900,算是較新型號客機吧!3-3-3座位感覺唔算太逼,基爾坐長程機一般都偏愛揀走廊位方便出入去廁所,慶幸今班機竟不算太爆,隔籬仲有個吉位可半躺稍休。



基爾都好耐無坐CX,依家佢地D娛樂設施都幾多元化喎!有戲睇有劇煲有機打之餘,仲有好多本電子版雜誌睇,當中旅遊雜誌都唔少,這十幾粒鐘一定唔怕戇居居坐到悶!



簡單揭過幾本雜誌後,點都要望望今輪有乜好戲睇下先!自從book了機票後近喱幾個月基爾都刻意少了去戲院,留返上機先慢慢睇丫嘛!



咁到抵有乜精彩電影先?基爾揀的第一套就係《星聲夢裡人》,之前睇其他人評價都係一般般,所以最後都無去戲院睇留返上機先睇。感覺上最經典依然是半山公園跳舞睇日落果幕;另外長碼頭果段Ryan Gosling獨腳舞同埋結尾果段fast forward空想,基爾也看了兩次;咁多首歌當中最喜歡依然是主題曲City of Stars!



一路食飛機餐一路睇完兩粒幾鐘的La La Land之後,雖然成個機艙基本上都已經熄晒燈黑晒,大部份人都瞌著晒覺,但基爾仲未想訓住喎(想盡量調節下jet lag),咁又揀多套戲睇下先啦!不斷用手指滑動椅背個mon咁又揀中上面喱套《出貓特攻隊》。戲中的出貓橋段其實都幾鬼複雜,在飛機上半夢半醒狀態下看戲當然不宜深究了,印象中幾個春青無敵男女主角都演得令人賞心悅目,比較得人驚就係高才生女主角用筆插喉嚨作嘔果幕,當堂嚇到基爾醒晒!



既然都嚇醒左咯,無無聊聊坐係度又無乜野好做,咁又繼續睇多套戲啦!睇完美片泰片之後,再揀套日片看看。之前喱套《我想吃掉你的胰臟》上映時,印象中好少戲院做所以最後都無睇到。3套戲當中以喱套算是最短,但都有接近兩粒鐘,故事改編自熱賣人氣小說,基爾個人覺得是屬於典型慢節奏的情書式日本愛情片,無獨有偶都與學生時代情侶回憶有關。不過可能因為珠玉在前,加上今次喱套戲前半部份平平淡淡的鋪排情節太冗長,明顯就沒有昔日看《情書》時的那份驚艷感!幸而演少年春樹的北村匠海和成年版的北川景子都有極高顏值,為整套戲挽回不少分數。



寫寫下好似變了寫電影blog咁……係時候回歸返去現實世界的機艙先。基爾近年越來越怕坐十幾粒鐘的長途機,會唔會同年紀漸長有關?不過值得安慰係今次CX個飛機餐都算甚有水準,其中的M牌雪糕可說是驚喜亮點!

67 則留言:

  1. 我都係鐘意揀走廊位
    CX 都真係幾多戲睇, 坐過法航, 真係悶到爆, 而且佢地服務似係要自己 self-service

    回覆刪除
    回覆
    1. 揀走廊位.So do I!
      法航似要自己 self-service...有同感.

      刪除
    2. AhMo:self-service意思係自己去拎飛機餐?

      刪除
    3. 王子:長途機多數揀走廊位,會舒服D無咁冇被困感覺,不過最好係隔籬位無人坐XXD
      奧航水平會唔會好啲?依家有奧航直飛都可以試下....

      刪除
    4. 唔駛自己攞餐, 不過之後想飲水之類, 就自己黎啦, 佢地唔會問你想要咩, 我仲見過空姐掛住睇雜誌

      刪除
    5. 唔記得講, 千祈唔好隔離坐個好鐘意講野chit chat, 本人經驗, 真係想C

      刪除
    6. OIC~~~~~如果攞水要起身問佢拎,咁真係要坐走廊位好啲,方便出入嘛^^
      過份鐘意chit chat真係會有少少煩,唯有扮瞓覺囉XXXD

      刪除
  2. 我十幾年無坐過CX,長途飛我唔怕,食得瞓得。最多睇兩套戲就到香港囉。

    回覆刪除
    回覆
    1. 新年快樂.....
      我多數唔瞓得,所以幾乎係硬坐十幾粒鐘,當中要經常出位去做下伸展運動先掂,否則成個人麻痺晒XXXD

      刪除
  3. 坐飛機有電影睇時間易過好多,所以貴小小都要坐國泰.

    回覆刪除
    回覆
    1. 都係嘅,最好係啲戲要啱胃口XXXXD
      記得十幾年前要睇中央大電視果陣,都幾辛苦,個mon太遠基本上用望遠鏡都睇唔清楚,依家人人椅背有獨立mon就已經好幸福了:P

      刪除
  4. 「隔籬仲有個吉位可半躺稍休。 」真好運呀!我都怕長途機坐到攰哂又背痛,我幾次都是3-3-3座位,一定仲係坐中間位,都幾辛苦,亞仔話佢坐單邊位都唔自在,畀有部份的過路乘客踫到頭肩位,而且幾次都滿座添!

    回覆刪除
    回覆
    1. 隔籬有吉位,真係好似畀人upgrade咗咁幸運,開心了成程機XXXD
      同意,走廊位都係有好有唔好,最大好處係出入方便,唔好處係正如你所講會成日畀人撞到,同埋如果瞓著會好易畀人行來行去嘈醒,無覺好瞓:P

      刪除
  5. 咁gael兄呢個行程完成未呢??返回香港…
    可能自己對睇戲麻麻地, 我寧願閉目養神去到才夠精神遊歷…

    回覆刪除
    回覆
    1. 你繼續睇落去咪知囉XXXD
      但係閉目都閉唔到十幾粒鐘咁耐喎,在機上即使瞓得著都不會熟睡,通常都係瞓下醒下咁,有少少娛樂當催眠一下都係好事XXXD

      刪除
  6. Welcome back and HAPPY NEW YEAR !!!

    回覆刪除
    回覆
    1. 那套La La Land 我都係在飛機上看,都唔知有甚麼好,尤其係Emma stone 也取best actress才覺得好笑。我fast forward 幾十次才叫做看完部戲。

      刪除
    2. 祝MD一家新年快樂萬事如意日日有食神^^
      可能耐無睇歌舞片,啲歌舞場面都ok好睇收貨!
      Emma Stone演獨腳戲舞台劇鬱鬱不得志果幕我覺得浪費咗,我覺得可以再做多少少,唔係只得巴黎鐵塔關燈咁短XXD
      果場戲都幾重要,引發佢地散咗,無再發展下去成為夫妻....

      刪除
  7. 打個飛機餐都算甚有水準
    M牌雪糕杯可說是驚喜亮點

    回覆刪除
    回覆
    1. 嚇得我個心離一離,即係上返去睇下係咪自己打錯字先!!
      大夫有所不知,飛機餐乃係用來食,並非用來打.....XXXXD

      刪除
    2. 打餐/打個飛機餐~強國人用語

      刪除
    3. 真係未聽過喎.....多數係聽佢地講「點餐/點個飛機餐」,真係好少聽用個「打」字,唔知係邊度鄉下㗎呢??!!@@
      長知識了wakakaka:P

      刪除
  8. 兩宮太后<<你咁寫唔驚比佢地見到!
    方便出入去廁所<<你去好多次方便呀小基子?kaka...

    回覆刪除
    回覆
    1. 佢地無興趣睇㗎喎!!!
      我要經常離座去廁所又好去做下運動又好,好怕長時間坐係度,會唔會同過度活躍有關XXXXD

      刪除
    2. 藍馬騮要兩太后合力管治o既!

      刪除
    3. 垂簾聽政,必恭必敬...wakakakaka

      刪除
  9. happy new year!
    我後生時對坐飛機好期待架,現在年紀大左,坐長途機係差左,幸好都仍然瞓得食得。
    我都有啲八卦,東西宮係點分嘅呢?

    回覆刪除
    回覆
    1. EE新年快樂.....!!
      要畀個叻你,我咁耐以來搭飛機都好少瞓得著覺,有一兩個鐘入睡已是萬幸,如果瞓唔到就通常頭暈暈地,連帶無乜胃口食飛機餐:P
      有親有疏囉wakakaka...

      刪除
  10. 華...你好叻呀咁快出到遊記...比個叻你!!!
    lala land我睇到就訓著.......我鐘意坐長途機戲接戲~同埋我最憎3-3-3坐法....除非3既倍數既人去旅行......
    happy new year~

    回覆刪除
    回覆
    1. 求求其其都叫開咗個頭先啦....跟住可能寫成年㗎嘛XXXXD
      如果係情侶去又真係有少少老尷,無啦啦有個唔啦更嘅人同坐一齊望住晒wakakakaka.....
      祝新年快樂,快啲有旅行倒數^^

      刪除
  11. 我鍾意飛,但唔係幾好長途機,要困在咁細嘅空間十幾粒鐘好辛苦。
    亦都鍾意走廊位,貪佢去廁所方便之餘都可以得閒起身鬆下對腳... 又‘順便’去犕餐區同空乘攞零食 lol

    回覆刪除
    回覆
    1. 我都一樣,有幽閉恐懼,當然如果坐頭等就唔同wakakakaka....
      我就係經常去走廊行catwalk果類人XXXXD
      不過我又好少走去問空姐拎野食喎,下次如果無聊無野做去試下先^^

      刪除
  12. 我反而唔鐘意走廊位。
    東西兩宫太后能結伴同行,小基子真係居功不少。

    回覆刪除
    回覆
    1. 係咪驚畀人嘈醒或者行來行去騷擾?
      太后們年紀大又不太懂蕃邦語文,都要靠小基子陪同先敢搭咁遠飛機㗎!

      刪除
  13. 歡迎你返嚟喎
    新年快樂!
    去美國旅行...
    安檢煩厭到爆,不過佢地仇家多,都無辨法
    依叔簽證費妤貴喎

    回覆刪除
    回覆
    1. 路霸兄今年一月有冇plan?幾時飛?
      也祝你新年快樂出入平安萬事如意.....
      初頭我都有少少擔心驚佢問到唔識答,不過其實都係問簡單基本野,安樂晒XXXD
      個簽證貴㗎,不過可用十年,如果經常去都抵嘅!

      刪除
  14. 好期待你既旅程,係機上有美味雪糕又有電影睇,好開心呢

    回覆刪除
    回覆
    1. 我都盡快開咗個頭寫先,驚攤耐咗仲難開筆XXXD
      果杯雪糕直情係最佳安慰獎,總算可撫慰了百無聊賴寂寞的心....一陣間wakakaka

      刪除
  15. 長程機真係好須要睇下網頁睇下電影,如果唔係,齋坐實會悶死!

    回覆刪除
    回覆
    1. 我覺得睇戲都會睇到悶,最好都係瞓得著,同埋無BB喊XXXD

      刪除
  16. 回覆
    1. 你講王子果啲閃神和海綿呀?!!XXXD

      刪除
  17. 如果架機唔坐滿,你知個情況會係點?
    就係飛機起飛後及可除下安全帶時,就有人很快的霸位或轉座位,就是希望冇咁逼同可以好瞓啲!
    你知啦,依家飛機位真係幾窄挾㗎…

    回覆刪除
    回覆
    1. 絕對係,霸位瞓下覺都係人之常情嘅^^

      刪除
  18. 坐咁耐機,耐不耐在走廊來回行一轉鬆鬆腳都要啊﹗=P

    回覆刪除
    回覆
    1. 要㗎!尤其係我喱類senior一定要起身郁多啲,否則條腰骨搞唔掂XXXD

      刪除
  19. 走廊位,我首選!
    看電影,機上消磨時間最佳方法。
    星聲......我覺得普普通通!

    回覆刪除
    回覆
    1. 如果同阿摩一齊去旅行係咪要隔廊而坐囉XXXD
      依家有私家電視真係爽好多,想睇戲聽歌睇書乜都ok....
      個劇情本身唔係太入肉,好似有點平鋪直敘,少了點驚喜!

      刪除
    2. 如果有人陪去旅行,我唔介意讓個走廊位!哈哈

      刪除
    3. 阿摩經常要帶成隊小兵去旅行啦wakakakaka...

      刪除
    4. 帶兵更加要坐走廊位

      刪除
  20. 長途機, 走廊位,我首選!
    兩宮太后?? 我都想8 下……
    一整起架, 點分身???

    回覆刪除
    回覆
    1. 起身伸個懶腰都方便啲,唔駛驚騷擾到人地^^
      唔駛分㗎喎,有親疏之別,額娘一定行先嘅wakakaka.....

      刪除
  21. 你由SAN FRAN飛香港, 都要15粒鐘, 比我這裡由紐約飛, 快1粒鐘. 不過, 我還要由滿地可搭一小時機落去, 再等3-4小時. 所以一整日就用左.

    回覆刪除
    回覆
    1. 嘩,Joesph哥唔講真係唔知原來路線要咁複雜......我仲以為Montreal係咪可以經Vancouver轉機返HK會順路少少?
      近排你果邊咁大雪,我諗空運一定又係大亂超級delay了吧?!

      刪除
  22. 新年快樂~

    肥人坐飛機會不停訓訓訓...不過訓極都係好攰呢~

    回覆刪除
    回覆
    1. 新年快樂......新居習慣了吧^^
      有私家廚房係咪多咗開動煮飯mode?
      你瞓得著是福氣了,至少時間會易過好多啦.....

      刪除
  23. 如果有得揀,硬係坐走廊位好D,出入方便同有少少空間郁動下。

    回覆刪除
    回覆
    1. 三五個鐘果啲我都覺得無所謂,超過五個鐘最好都係揀返走廊好似好一點,有活動空間真係好重要㗎,因為我通常瞓唔著覺:P

      刪除
  24. 機上電影都好新丫,有戲睇時間過得特別快,話咁就就落機~

    回覆刪除
    回覆
    1. 你最熟啦,A350-900係咪算叫做新機種?
      我瞓唔到通常都係靠睇戲麻醉自己,間中會睇睇下太累而幸運地瞓得著覺XXXD

      刪除
  25. 坐CX,享受果然唔同啲~正!

    回覆刪除
    回覆
    1. 其實我都唔常坐,之前聽好多人彈佢啲飛機餐,但我要求不高,覺得也還不錯呢!

      刪除
  26. 會唔會有人已經等到有少少心急<-- 我呀,因為好耐無見你打遊記了~
    3-3-3我不太like,窗口位實在太慘。
    呢篇影評咪當序幕囉~ 當然要好!CX唔做返好,實聽執笠都似!

    回覆刪除
    回覆
    1. 少咗出埠所以無乜寫囉:P
      但可以影到窗外航拍喎wakakaka
      可能我比較少坐CX,其實設施餐飲服務我都覺過得去嘅,之前見人地彈得好勁可能自動調低咗預期吧XXD

      刪除