2018年1月7日 星期日

舊金山居閑話@到著SFO

在飛機上睇完3套長戲都仲有好多時間剩,本來想再揀多套戲睇但心水果D有好多都因播放時間不足唔畀睇,咁齋坐係度做乜野消磨時間好呢?



最佳選擇莫過於睇卡通片,捽捽下個mon好彩喎又見到海綿寶寶,連睇幾集正好就差不多落機了!如果有去過美西加西地區都會知,飛機會有點穿越時空時光倒流feel,同日大約兩三點就到著,比起飛時間(傍晚七點)還要早,好似無坐過飛機咁(當然回程機要還鐘)!



基爾初來甫到三藩市機場第一感覺係有點舊,四周又好似有點昏昏暗暗(定還是香港機場太光猛簡直係光污染呢),兩宮太后因為係長者可以走特別通道唔駛排長龍,連帶基爾隨行入境過關,問話也不太繁複,行李也沒搜查直入直出可喜可賀。出到去接機大堂才不過三點幾,已見迎迓太后們的專車,點齊人上車出發,首個景點先去Clement Street那邊買菜買燒味,準備今晚煮返餐家鄉洗塵飯。



三藩市喱邊好似話好多地方泊車都要入錶,上圖右的黃色咪錶好似有少少似昔日香港那種入銀仔咪錶。近列治文日落區喱邊D樓都只有兩三層高,確有點迪士尼美國小鎮大街feel吧!上圖左果間甜品店聽聞係幾好食的,可惜沒有時間入去幫襯下,留返下回再去吃吧!



不逛不知喱條美國小鎮大街又真係幾多唐人店舖喎,有中超之外仲有燒味店蒸包蒸點心店,還有飛髮舖和金魚舖一應俱備,儼如小華埠!一不留神原來太后們早已自動波火速入了去逛旁喱間新聯興超級市場,又揀蕃薯又揀橙又揀香蕉又揀菜,加上店員阿姐全部都同聲同氣似去了屋村街市,完全唔覺去了外國一樣!



由於金山緯度比香港還要高,冬天來到幾乎晏晝四點半已開始日落西山,話雖如此不過似乎都無損太后們行街買菜煮飯的興致,咁對基爾來說都算唔錯喎,可以乘機開個小差,自己無聊沿街四圍遊蕩下,這算不算是真正「自由行」呢?



閒蕩一圈無意間來到其中一個街角見到喱間永利燒臘快餐店,見佢條長長人龍都知應該係喱區的「名店」吧!只見芸芸華人口面顧客人堆當中,赫然發現竟有太后身影,果然識揀喎!真係想入去問下佢地其實到底係咪住喱度架,又會咁老馬識途呢?



搞成粒鐘最後張羅完晚餐飯菜之後,就差不多天都黑齊要返屋企了。返到屋企又要忙煮飯開飯又要執好床鋪枕頭,又要開篋拎手信,最終十點幾沖完涼刷完牙再閃電衝入房撻落張床度,數數手指都有成廿幾粒鐘無好好睡過一覺,手指都未數完已經訓著了……

50 則留言:

  1. 係咪全程唔駛講英文? ^^

    回覆刪除
    回覆
    1. 買燒味唔駛,買蒸包蒸點心唔駛,去中超喱間唔駛:P

      刪除
  2. 你嗰行程第一個景點真係另類。

    回覆刪除
    回覆
    1. 佢都一早講左係古裝片喇..

      刪除
    2. 王子:搭十幾個鐘機飛越太平洋白令海峽去逛中超買餸買燒味,本身已是件十分型的事了吧XXXXDD

      刪除
    3. JJ:咁又未必喎,古裝片拍到昭君出塞去和蕃咪要用蕃邦話囉....wakakakaka

      刪除
  3. 坐飛機唔夠時間睇晒套戲我會先睇一部份,回程睇埋佢 :P

    回覆刪除
    回覆
    1. 我本來都想,不過佢個system係如果唔夠播放時間,可能距離落機時間只餘一小時之內,佢唔會畀你click到套戲來睇,所以只能揀一小時內的短片或卡通片或劇集了....

      刪除
  4. 可以一口氣看幾套電影真犀利!

    回覆刪除
    回覆
    1. 其實都辛苦㗎,不過為了kill time都無辦法咋:P

      刪除
  5. 香港d舊錶依家又一村仲有, 4蚊半粒鐘, 但冇黃色咁靚仔
    山長水遠去外國都唔體驗下當地飲食文化

    回覆刪除
    回覆
    1. 估唔到喎,高尚住宅區泊車4蚊半粒鐘好抵!!@@依家屋村果啲停車場一般都around十蚊半粒鐘吧??!!
      才剛落機啫!仲有排去慢慢體驗嘅:P

      刪除
  6. 睇幾套電影咁多?冇瞓過?
    直頭返鄉下咁喎。

    回覆刪除
    回覆
    1. 冇啊,都瞓唔著,我搭飛機係好少會瞓得著:P
      係個佈景唔同咗囉變咗美國小鎮大街XXXD

      刪除
  7. 要陪兩宮太后出宮,真係辛苦小基子了。哈....

    回覆刪除
  8. 你都喺...探親團...
    有親友喺當地果然好方便,
    可以入住親友屋舍,又有專車接送
    一落機要去買餸...唔喺有專人招呼?

    回覆刪除
    回覆
    1. 有啲地方真係探親先會去....^^
      無㗎,想食乜餸自己煮啱口味啲丫嘛!!

      刪除
    2. 既然去到美國梗喺食牛扒啦,食漢堡, pizza...又會食番燒味?

      刪除
    3. 牛無食喎,burger都冇啊,反而pizza有...:P
      可能坐完十幾個鐘飛機突然好掛住的燒味XXXD

      刪除
  9. 舊金山唐人街,長者們溝通無難度。

    回覆刪除
  10. SF真係唔需要講英文都生存到。 唐人街地方好似60/70 年代真係好舊。 downtown一帶都要泊車入錢,當地人很守法,唔會博,費時被拖車啦。

    回覆刪除
    回覆
    1. 如果長住學兩三句傍下身囉,老人家學嘢其實比想像中快嘅!
      係啊市內一般都係要入錶,外圍小城就多數唔駛.....
      其實泊車都好方便,方便過又平過HK多多聲XXD

      刪除
  11. 依家聽講去美國入境幾麻煩,要左check右check,又要盤問下,原來過關檢查都幾易...

    回覆刪除
    回覆
    1. 唔知係咪如果一支公去會問多幾問,我因為湊住兩個長者所以求其問下就算XXXD

      刪除
  12. 天都黑齊要返屋企…乜嗰邊唔會有夜市之類?!!...
    既然去到似華埠咁仲好啦,有親切感而且食物會啱口味些吧!

    回覆刪除
    回覆
    1. Christmas Market會有,算唔算叫做夜市?不過無台灣果D咁多嘢食賣㗎喎!
      不過我地唔係住近喱區喎,去喱度都要成粒幾鐘㗎:P

      刪除
  13. 睇尼都係長篇小說,幾時先有主角出場?(風景係主角)

    回覆刪除
    回覆
    1. 都無合掌屋,無乜靚景主角睇㗎咋......XXXXD

      刪除
    2. 一日分幾篇寫,你唔好食餐飯又當一篇呀!

      刪除
    3. 咦,都好喎!咁咪可以寫足一年囉wakakaka....

      刪除
    4. 咁你回港後變左基太后,長氣表表者!

      刪除
    5. 太后不一定長氣嘅,即使長氣都係關心你的表現,又唔見佢對住街邊乞衣長氣?.....XXXD

      刪除
  14. 華~~開始行程喇~~~
    我擔定櫈仔先~~~太后們好醒呀!!!!!連燒味都識路買~~~~
    你真係好彩喇~~無問咁多野~~我上次去..得我一個..問到我驚

    回覆刪除
    回覆
    1. 開始㗎啦^^
      識揀多人排隊果啲先去買wakakak...
      可能一條友係會問多啲,我湊住兩個長者反而唔嘥氣問我,知道一定係來探親囉XXD

      刪除
    2. 咁又係...當地人都去排隊就一定係正野啦~佢地都好勁喎!一落機就咁有活力去買野食~
      哥時過美國海關問我10條以上問題...真係好救命......

      刪除
    3. 佢地可能在機上有瞓著所以唔算太累喎,又可能見啲地方啱行會精神啲囉XXXD
      年青人加上一條友真係可能會問多啲,佢地最驚啲人留底做黑市居民啩?!!:P

      刪除
  15. 第一個景點, 好特別喎!
    真係估不到要買餸煮飯, hahaaa

    回覆刪除
    回覆
    1. 去入定貨丫嘛要住一排呢XXD

      刪除
  16. 去到外國見到中文字,中餐一定好開心!

    回覆刪除
  17. 燒臘飯都唔貴喎!`可以接受喎!

    回覆刪除
    回覆
    1. 細佬Andy哥果然觀察入微有留意到喎^^
      6蚊美金一個兩餸燒味飯,圍起都係大約45蚊港紙左右,而且份量都幾大可兩人食,真係抵過HK茶樓:P

      刪除
  18. 因播放時間不足唔畀睇?以為剩係得提示但都有得睇添,可能我唔係係機上成日睇戲,唔知道⋯⋯ 但係你連海綿寶寶都撈埋又真係幾攪笑噃~
    兩宮太后來到咁舊香港的舊金山,有無好親切感覺呢?
    係喎基爾,想問問,兩宮太后應該早已退休,咁攪簽證時有難度嗎?有人講就算自己父母,退休未必攞到簽證的。

    回覆刪除
    回覆
    1. 唔係喎佢個系統係唔夠時間播全套戲,就唔畀你click入去:P
      海綿寶寶好睇丫,仲有好幾套美式卡通,最奇係仲有He-man!!
      啲賣菜阿姐講廣東話佢地梗開心,買餸無難度嘛^^
      唔難喎,佢地其實已經去過好多次,仲熟路過我,佢地一簽就十年可以多次來回添㗎!

      刪除