2018年5月31日 星期四

跟住雷神過大海@Rico's

搭巴士由路環的黑沙海灘返到酒店已經三點幾,去到個check-in大堂望一望……嘩!條人龍乜咁長?



明明都仲未到大陸黃金周,但已經咁旺場啦喎!心諗如果真正到了長假期係咪check-in要排隊排到出大門口呢?眼見check-in counter已開了6-7個,但感覺上效率奇低!好不容易才排到去櫃面,原來預book的3間房卻竟然只有兩間ready,雙人大床的一間原本hold了卻不知為何自動消失(不知是否電腦系統問題)。



成件事感覺既混亂又無奈,結果搞來搞去連排隊搞了超過半粒鐘check-in(像被罰站了半粒鐘),這是什麼樣的玩法?如果面對的客人是北方大媽,唔知會唔會索性拉佢出櫃面再私人醒兩巴……



基爾當然要盡量保持decent狀態(但黑面就在所難免),狼狽小伙看來也感受到基爾頭頂燃燒中的小宇宙,最後話upgrade了其中一間客房去Deluxe Cotai Room作補償,話會睇到海景咁話,條氣都叫做順返少少!



好不容易才拿了匙卡感覺很疲累,再去取回先前寄存的行李(慶幸不用排隊)就即上房抖抖瞌一陣,等到成5點幾再落去拎埋餘下果間房(慶幸不用重新再排隊),搞掂晒所有野終於可以安心出去食個靚dinner了。



酒店外面就有巴士站,無記錯好似係搭25X出返澳門市區。按常識計,通常巴士路線有個X字意思係咪屬於express快線車,不過喱架又唔似喎!或許正好遇上澳門放工的rush hour見識過人地塞車盛況,再加上一上車就下起大雨就更加塞上加塞……



結果去到水坑尾街這裏落車,全程巴士用了足足成個幾鐘頭(真係仲耐過去台灣)。不過最值得慶幸係,剛才的一場大暴雨已成過去,落車唔駛再擔遮可以輕輕鬆鬆逛街唔駛咁狼狽。



靜靜講個秘密你知:去澳門其實好多人(尤其愛影相的人)的重點節目就係夜遊舊街小巷,一來貪無咁多拖篋大媽阻路;二來夜色下的古舊歷史建築物格外迷人!沿街一路向前行,基爾立即就畀上圖喱幢靚靚古董大樓吸引,初頭還以為係大教堂……



後來查網才知佢叫做高可寧大宅,建於1916年。高可寧是民初時代的澳門富商,經營船務公司、銀號賭場等生意,當中包括新馬路那間很出名的德成按,依家活化成為典當博物館。至於這間大宅也列為歷史古蹟之一,唔知有冇開放畀遊客入去參觀呢?



繼續向前行無耐會見到一條橫跨成條街的行人天橋,只要認住佢就不會行錯路(澳門一般D街名都好難記,通常只認住地標建築物)。由天橋落返地面再行前少少就見到今晚dinner的目的地了。



無錯又食葡餐!不過喱間同晏晝食果間Fernando又有D唔同,感覺上比較多一點澳葡fusion味道,而且價錢好像更貼地一些。Anyway繼續睇menu學葡文,上圖分別係味道不錯的Moluscos Fritos(葡式炒蜆$90)、Bacalhau Com Natas(鮮忌廉薯蓉焗馬介休$108細份)和白烚豬手……



另外還order了Couve Salpicado Com Alho(蒜蓉椰菜$48)同埋上面喱味招牌特色菜Galinha Com Arroz Cozido Portuguesa(燒雞釀飯$128),掛住食忘了影張切開見到雞入面釀滿飯的照片,飯粒吸收晒燒雞的香味,不枉基爾咁山長水遠冒住大風大雨搭成粒幾鐘巴士來!



富仕葡式美食 Rico's Est, de Comida
澳門荷蘭園羅憲新街16號地下

46 則留言:

  1. 而家真係唔可以係公眾地方亂發脾4, 一陣俾人拍埋片, 放埋上YT, 真係慘過交罰款 ^^

    回覆刪除
    回覆
    1. 喱D片依家真係多到不得了,日日有新料XXXD

      刪除
  2. 西方大媽會要求有補償,一係有餐免費晚餐,再來一支酒,入酒店數。

    回覆刪除
    回覆
    1. 佢話有upgrade咗間房當補償.....
      不過喱啲野真係盡量都費事同佢嘈,一陣又畀人話HK人最愛搲著數XXXD
      求其自己心裏有數以後blacklist佢算

      刪除
  3. 回覆
    1. 差不多五六點再落去check-in埋餘下果間房,可以late check-out!

      刪除
  4. 我都唔知點解check in要搞咁耐.

    回覆刪除
    回覆
    1. 搞咁耐我下次一定要求佢擔張椅畀我坐,又或者索性轉過去VIP果邊check-in counter可以坐下來等佢慢慢搞.....

      刪除
  5. 做乜咁刻意要"雙人大床", 又唔係有人認頭預支honeymoon
    去得呢d土豪後花園, 預咗啦, 自己攞黎.

    回覆刪除
    回覆
    1. 咁book套票果陣係講明要大床㗎嘛,佢提供唔到係咪其實係酒店本身出問題?5粒星的應不會犯這類低級錯誤吧:P
      我已經專登避開啲土豪長假點知一樣中招XXXXD

      刪除
  6. 澳門現在真係太多遊人,呢間酒店咁旺架,check-in都排長龍。

    回覆刪除
    回覆
    1. 希望將來海南島開賭可以分流一下XXXXXXDDD

      刪除
  7. 幸運喎! 雨都下在車程中!
    隻燒鷄真係好吸引 ...

    回覆刪除
    回覆
    1. 算係好啦,塞車都唔驚,可以順便避雨XXXD
      不過自從那次大雨之後,好似都無乜再落過大雨,所以依家咁熱:P
      幾有特色,好多人專登來食佢,價錢又合理

      刪除
  8. 依...乜咁岩既~
    酒店肥人唔使點排就拎到房啦...hahahaaa
    燒雞釀飯又真係好好食呀~

    回覆刪除
    回覆
    1. 係囉乜咁啱嘅XXXD
      你一定係VIP...wakakaka...
      值得去一試呢

      刪除
  9. 識野喎~食富仕~
    係呀...依家d巴士成日都搭唔到..的士又開天殺價...
    根本就搭唔到車......係澳門生活真係好慘

    回覆刪除
    回覆
    1. 連主場tiff都讚,證明我無去錯喱間wakakaka...
      所以如果有電動單車(唔駛車牌果隻)我諗會幾方便!
      我聽得你講太多澳門的士的可怕故仔,所以一直都不太敢搭XXD

      刪除
    2. 呢間以前食過幾好~不過我好耐無去~D野唔知keep唔keep到~~
      電動車一律唔俾係街行.....你話澳門人可以點....
      唔使我講...fb都大把..
      不過我都親身經歷過....真係嬲到我震..
      仲係我趕去碼頭搭船過香港飛時發生..好徬徨

      刪除
    3. 味道都ok,而且價錢貼地一點XXD
      澳門啲路好細好窄其實都幾適合用電動車....
      咁真係要預鬆啲時間喎,不過第時澳門機場有輕軌都叫做好好多,唔知會唔會接駁埋去澳門市區?

      刪除
    4. 依家佢價錢係咪仲可以用抵字形容?因為我好耐無去
      係適合呀~但唔合法~~~~~
      澳門市區都未起過~我都唔知佢仲要幾耐先起完:P

      刪除
    5. 人均百零蚊我覺得ok呀
      成日覺得過多十幾廿年應該大部份人都唔駛搭車返工咁麻煩,網絡先進D人人可以home office^^
      如果有條輕軌接駁到機場真係方便好多呢,可能會多啲中山珠海人經澳門飛.....

      刪除
  10. 個葡餐睇相都覺得好正!

    回覆刪除
  11. 澳門就係咁,d酒店又新又大又豪華,但係d員工效率同質素就跟唔上!

    回覆刪除
    回覆
    1. 可能係佢個電腦system有問題又或者啲員工未熟習到運作吧,員工本身見佢已在盡力解決問題,而且看來三文兩語水平真係幾唔錯!
      不過我覺得如果要搞成半個鐘,一定要先好好安排個坐位畀個客囉,而唔係要人地罰企睇住你做野,本來唔嬲都搞到有啲嬲,都話晒係5粒星㗎喎!

      刪除
  12. 聽我話最好就預先網上check in,仲喺網上畀埋間房嘅number密碼,咁就唔使嘥咁多人手同嘥咁多時間!

    回覆刪除
    回覆
    1. 依家咁先進連房卡都唔駛攞咁犀利??!!@@

      刪除
  13. 去舊區影相,有D特色嘛。

    回覆刪除
    回覆
    1. 如果要影相都係行舊區多嘢影啲

      刪除
  14. 少見基爾兄會黑面~ 不過酒店check in排足半粒鐘真係未聽過!
    你都算黑仔,搭車又成粒鐘🤣

    回覆刪除
    回覆
    1. 都唔係㗎.....XXXXXD
      以國際化大城市標準來說,算叫做效率低了吧:P
      Rush hour都好塞車,同埋啲巴士勁兜路

      刪除
  15. 基哥過大海嘆美食,真係好唔錯咁喎! 我都好幾年冇去澳門了。

    回覆刪除
  16. 好耐無去過澳門了.......

    回覆刪除
    回覆
    1. 係喎原來都好多blog友都好耐無去過

      刪除
  17. 對黑沙最深印象係我細時同家人去,晚上冇電,黑媽媽嚇C我,真係現在都記得當時嘅情況,childhood nightmare 哈哈哈。

    回覆刪除
    回覆
    1. 唔出奇啊以前路環都係好鄉郊的地方.....
      即使以前澳門市區其實夜晚都幾黑媽媽無乜街燈,無依家啲賭場咁金碧輝煌五光十色XXD

      刪除
  18. 澳門啲古舊歷史建築物,在夜色下真係幾靚架!

    回覆刪除
  19. 去荷蘭園有無去禮記食雪糕?

    回覆刪除
    回覆
    1. 無呀食飽個葡餐之後好飽嘛:P
      禮記好似十幾年前去有食過一次^^

      刪除
  20. 就係有這些小插曲,旅程才難忘…

    回覆刪除