2019年2月8日 星期五

舊金山居閑話@Vasona Lake

恭喜發財萬事如意龍馬精神新春大吉……拜年後無乜野做咁又繼續寫金山悠閒假期的尾聲(會唔會有點唔捨得),加快速度完成這趟旅行筆記吧!話說這朝早百無聊賴,不如玩下煮飯仔!



在老家時每朝早都好趕忙梳洗返工,好少有閒情慢慢細心煮早餐。旅居在外當然可享受一下慢活滋味,例如煎下pancake好玩得來又幾有成功感。



這款來自Trader Joe's出品的pancake粉個人覺得幾方便,加蛋加奶搞勻就可以落鑊煎得,當然也可加上自己喜歡的生果配料作點綴也不錯。



例如加藍莓紅莓或者士多啤梨也是不錯之選!本來也想買盒返港試下煎,但醒起數字屋也經常有上圖這款袋裝的小麥粉出售,而且價錢也不太貴,回來後就買包試試,果然效果同Trader Joe's果盒也相差不遠。



煎完pan cake之後見仲有點空閒時間,不如再來試下焗幾個藍莓muffins試試看(基爾還是第一次參與整蛋糕仔……不計算年前試整的紅豆糕)。



有食譜跟住做其實都ok,減少失敗風險,製成品通常唔會差太遠。好多人識整muffins所以都唔詳細講ingredients,撈勻晒舀入蛋糕帽再加藍莓裝飾就完成,可以放入預熱焗爐,調校好時間就可以等食了。



趁住焗蛋糕期間出去行個圈,之前聽聞好多人會來這間See's Candies買手工朱古力做手信,一於跟去睇睇有乜咁巴閉。



店面都幾classic,有點六十年代feel,應該也是老字號吧!見貨架上的朱古力食品選擇都頗多,除了唔同口味的朱古力之外,也有很多唔同餅乾。



而且最重要係,部份款式有得試食,咁唔買都試幾粒啦!不過基爾個人口味覺得番鬼朱古力多數偏甜,係咪配杯齋啡平衡一下會好少少。



同行人士買好心頭好之後就回程沒有再四圍蕩。回家後看看焗爐的製成品,都算幾唔錯!新鮮出爐即刻食兩個,唔駛送齋啡都覺得不錯吃!



午餐剩係食個muffin蛋糕仔又好似太求其了,點都要正正經經食個lunch先ok吧(這是什麼神邏輯)!反正得閒又出去兜個round,行過喱間墨西哥快餐店醒起來咁耐好似無乜食過burrito或者taco,所以即時入去一試。



這間Chipotle Mexican Grill回來上網check過先知,原來在美也是頗具規模的連鎖快餐店(維基話加拿大和英德法都有不少分店云云)。除了雞牛羊豬肉碎之外,也可加大量菜絲蕃茄粟米粒之類,一試無妨。



食飽飽咁仲有咩做?當然就係去散步!黃昏時份來到Vasona Lake這邊逛逛,其實基爾覺得如果有得選擇,梗係去親親大自然呼吸一下清新空氣,比去逛shopping mall超市outlet之類的物慾世界來得有仙氣……



翻查資料才知Vasona Lake其實是位於Los Gatos市郊的一個人工湖,修築於1935年,貯水量有60幾萬立方米(約莫係3個薄扶林水塘左右)。



冬天來到有點冷冷清清,但聽聞夏天這裏幾熱鬧,好多附近居民一家大小來扒艇釣魚之類,湖邊附近仲有個Oak Meadow Park有些遊樂場設施。



基爾覺得單單在湖邊閒逛下其實已經夠晒愜意,日落黃昏時份夕陽金光斜照湖面,係咪寧舍有仙氣,有冇即時想唱返首陌上歸人?



離遠望湖的另一邊,果然有得租艇仔泛舟湖上,不過冬天有點寒意,似乎就無乜人有此雅興了。不如就沿住湖邊跑一圈熱一熱身又如何!



上圖這條橫跨湖面的小橋應該也是景點之一,就在橋上看一會兒風景……



突然一群飛鳥劃破長空,趁住夕陽下的迷人magic moment歸家去,唔知佢地係咪棲息於湖邊的這片樹林呢?



湖面上還有幾雙幾對小鴛鴦和小水鴨來來往往不斷游弋,會唔會係以為基爾帶了麵包來餵佢地(但明顯是兩手空空)?



返去泊車處原來都有成排紅葉樹好靚呀!覺得這裏的紅葉也不比日本遜色,而且也不似大棠咁人頭湧湧(根本人影都唔係咁多隻)。



臨時加插的這個賞湖看日落的好去處真不錯,就在回港前享受多一點寧靜生活吧(都驚返到去老家周街人會唔慣)!



昨晚剛吃過日本料理,今晚同樣去試試亞洲風味去吃韓餐。這間Jang Su Jang長壽的menu看來製作得幾精美,菜式種類亦幾豐富,不過基爾以往都好少食韓國菜。



按慣例前菜都係有各式各樣泡菜醃菜之類,而且份量都幾大碟!平時基爾好少齋食泡菜,通常會配麵烏冬或飯食。



這個韓式煎餅pizza(USD$21)也是必備之選,基爾每次食韓餐好似都例必有人order這一味菜式。幸好今次這個不太油膩,味道尚算ok!



至於Bibimbap(USD$14)同樣是熟口熟面的韓式料理最hit熱選,這一大碗有芽菜絲青瓜絲醃菜絲菇絲仲有雞肉絲,中間仲有個荷包蛋。



順帶無聊一問:不知為何食韓菜多數要用不鏽鋼餐具?基爾最怕就係用那雙不鏽鋼筷子,總覺會無法控制好難夾野。上圖這味貌似五花腩的拼盤(USD$22)好似第一次見。



除了食拌飯和煎餅之外,menu上仲有tofu soup這個類別看來幾有趣,而且仲要有好多款,唔知香港那些韓菜館興唔興食豆腐湯?



平時較多會食芥菜豆腐湯,而韓式豆腐湯材料原來也頗豐富,有海鮮(蝦蜆之類)還有豬牛魚蠔選擇,素食者也可選磨菇、kimchi、bean paste和菜等配料;基爾忘了上面這款是否clam豆腐湯。



最後這餐由基爾埋單,以感謝主人家幾星期以來的熱情招待。有冇留意到美國餐廳食飯要畀tax和tips,加埋其實都有成30%呢!

51 則留言:

  1. 都話烘焙係個度猶如國技, 去到點都要焗一、兩轉 XXD
    以前去旅行, 導遊講笑話, 呢D不鏽鋼係方便老公一時唔高興攞黎當武器 XXD

    回覆刪除
    回覆
    1. 對,我覺得要有這份生活閒情,才稱得上是生活啊^^
      當然家裏也要有地方放置個大焗爐XXD
      Really~~~~!!@@我唔覺似笑話喎,似驚慄片多一點XXD

      刪除
  2. 英國仲有加12% 以上 service charge 添。所以去酒吧食就最抵喇。

    回覆刪除
    回覆
    1. 酒吧唔駛畀service charge又幾好,咁係咪因為冇waiter?
      麥記快餐店Starbucks果類cafe係咪都唔駛畀??

      刪除
  3. See's好出名㗎!乜你咁唔識貨㗎!

    回覆刪除
    回覆
    1. 我都係去到先知原來係著名老店,係咪你果度都有開??
      不過朱古力我覺得係典型番鬼果隻超甜類,食一粒半粒都好夠了:P

      刪除
    2. 歐洲咁多古力品牌,唔係太多美國貨賣.See's係未見過.

      刪除
    3. 有都唔會買啦太甜了,番鬼口味:P

      刪除
  4. 甜品最怕是太甜,我試過n年前在大大百貨公司買一包包裝精美軟糖,吃一口已經甜到震,結果成包扔掉。

    回覆刪除
    回覆
    1. 對,依家糖和朱古力之類的甜品我都唔敢食太多了,驚不太健康

      刪除
  5. 朝早百無聊賴
    玩下煮飯仔!

    回覆刪除
  6. 冇錯,半制成品成功率高好多,以前自己用麵粉搞要交好多學費.

    回覆刪除
    回覆
    1. 這種pancake粉我覺得都幾方便,加奶加蛋和水就煎得,即使朝早起床沒太多時間做早餐都可以一試!!

      刪除
  7. 先祝願GAEL兄新年快樂,身體健康...
    都好,朝早煮吓早餐又能夠體會慢活的樂趣~~
    夾餅若然加點花生醬會更好味~~

    回覆刪除
    回覆
    1. 也祝森兄萬事如意龍馬精神正財橫財都就手升職加薪同埋最緊要係.....桃花滿開XXXD
      沖多杯花茶chill下就perfect!!!
      我也試過,真不錯呢!!更健康的可以塗蜂蜜也挺好味道^^

      刪除
  8. 新年快樂,恭喜發財,萬事如意,龍馬精神!

    回覆刪除
    回覆
    1. 我超鍾意韓國豆腐湯㗎,配個牛肋骨真係冇得頂。

      刪除
    2. 也祝MDDDSDBD個個都萬事如意工作順利笑口常開口福滿載^^
      我還是第一次試這種豆腐湯覺得同中式的有很大分別,是另一種新奇食法!!配個牛肋骨<===Good Idea!!!

      刪除
    3. thank you thank you ! 人日快樂!

      刪除
    4. 人人生日,人日快樂happy birthday有冇整壽包食下?\^^/

      刪除
    5. 無呀,這裡多數係人日食撈起咋。

      刪除
    6. 係喎你地興撈起wakakaka.....

      刪除
  9. 煮下食下,又湖邊散步,欣賞黃昏景色,真係神仙生活。

    回覆刪除
    回覆
    1. 對,食飽最好就係去散步,而且外國地方大,人也不多,好chill好relax^^

      刪除
  10. 第一張相肥人第一眼望落去見到做乜穿晒洞...原來係藍莓..哈哈!
    日落湖景真係好浪漫呀..HAHAHA!
    肥人最中意用韓國筷子..哈哈!

    回覆刪除
    回覆
    1. 霎下眼好似又有少少似喎XXXXD
      應該都幾啱你地兩公婆去拍下拖的wakakaka....
      我完全唔識控制好難夾嘢喎:P

      刪除
  11. 真係悠閒到要做廚房男^_^個排紅葉好靚喎,是幾月去?

    回覆刪除
    回覆
    1. 12月聖誕前後果陣,紅葉都幾靚㗎!但遊人不太多.....
      要學下,要花點功夫wakakaka

      刪除
  12. 朝早自家煮pancakes同焗muffins真係好有渡假feel呀!

    我記得See's以前喺香港都有,其中一間喺太古城,店面同依家嘅都差不多,不過已經係好多年前嘅事啦。

    回覆刪除
    回覆
    1. 通常都係假期先有這份閒情逸緻吧....XD
      即刻check一check,依家原來仲有中環Landmark有店呢

      刪除
  13. Vasona Lake加埋附近嘅紅葉,真係度假放鬆嘅好地方!

    回覆刪除
    回覆
    1. 最緊要係人少少可以樂得清靜
      平時在HK周街人仲煩唔夠咩XXXD

      刪除
  14. 在湖邊閒逛下其實已經夠晒愜意--->同感,靜靜哋感受大自然,GOOD

    回覆刪除
    回覆
    1. 所以SU周末都好興去郊區行下山感受大自然\^^/

      刪除
  15. 偷得浮生……
    慢生活,實在需要……

    回覆刪除
  16. 祝基哥新年快樂!事事如意!
    在聖誕節來個外遊短住,慢活入廚。跟著優悠逛街、逛公園,真不錯。

    回覆刪除
    回覆
    1. 也祝秋葉姨新年進步萬事勝意龍馬精神^^
      對,唔駛去好多景點,盡量感受一下異地的生活節奏!!

      刪除
    2. 我有睇番你前幾篇遊記,都幾有意思。我有留言,冇偷懶。

      刪除
    3. wakakakaka......隨心留言就ok!希望有多點互動吧^^
      秋葉姨咁夜仲未瞓來看我blog咁捧場,非常感謝!!

      刪除
  17. 人日快樂!
    估唔到你仲識得煮飯仔!

    回覆刪除
    回覆
    1. 大家都生日快樂Happy Birthday!!^^
      要學返少少傍下身都好嘅wakakaka.....

      刪除
  18. 恭賀新禧~~~~~
    祝你豬年乜都好~
    咁興致整早餐~
    其實去旅行時我都會~~~~

    回覆刪除
    回覆
    1. 也祝你萬事如意身體健康kai客遠離你...XXD
      係囉我見你去冰島時都興自己煎蛋^^

      刪除
  19. 其實, 如果唔要求高, 美國生活也不錯的.

    回覆刪除
    回覆
    1. 我都覺呀^^我要求也不高!!
      不過先決條件要去考車牌XXD

      刪除
  20. 好喜歡你的慢活,究竟你去咗幾耐架?

    回覆刪除
    回覆
    1. 大約幾星期啦,不過就足夠我寫成年,都幾抵玩嘅XXXD

      刪除
    2. 慢活慢慢寫,才能細味旅程點滴呢~

      刪除
    3. HK生活節奏太快,只有寫網誌才可偷得浮生^^

      刪除