2012年12月15日 星期六

越空西大嶼山@大澳

離開悟園繼續往山下走,眼底的大澳小市集已幾乎觸手可及了,彷彿又由世外桃園重新投入俗世煩囂之中。



記得上次由東涌走到大澳,是沿北大嶼山經沙螺灣、散石灣、深屈灣一帶的行山徑一路向西走,一直走到大澳北的侯王古廟,須時差不多要5個鐘。



今次就循南路經鳳凰徑第5和6段落山,穿過梁屋和南涌村,再沿上圖的鹽田壆長堤壩,終於走到人山人海的大澳巴士總站和市集。



鹽田壆長堤壩外就是大片鹹淡水交界生長的紅樹林。大澳三面環山,山上的泥沙沖積物沿溪流沖到大澳堆積成淺灘,形成濕地生態,所以這裏的紅樹林規模也不比米埔遜色。



行返入大澳市集裏面,又見到賣鹹魚蝦醬的手信店,不過無來一排,價錢又好似貴左了。比較特別的是右上圖那座釣魚台模型雕塑,分別插了中日台三支旗,以前好似無見過,唔知係咪新整的呢?



順便又行埋過去大澳郵局,因為這裏門口仍保留了一個鑄有「EIIR」英女皇伊利沙伯二世徽號的郵箱,不過早已不是昔日的紅色,改為髹上了回歸後的綠色。



仲有上圖這棵甚有型的Y形樹,記憶中以前都有路經過這裏,它其實就在右上圖的大澳大會堂和診所附近,但咁多次來都無留意到這棵奇樹,當然要替它影張玉照啦!



一路向西走,穿過了密集的棚屋,景觀豁然開朗。上圖遠處的高山唔知係咪屯門呢?平日和周末、紅字假期好似都有街渡來往大澳和屯門,如果住屯門都幾方便,來回也不過40蚊左右。



擺放在棚屋旁的龍舟,如果5、6月來到,應該可以睇到村民扒龍船……



仲有一樣野就係,來到大澳當然又要影下棚屋和擺在街邊晒晾的海味,才似是來過大澳吧!

2 則留言:

  1. 路程都好遠喎 , 你有冇買番條靚鹹魚做手信呀 !
    我鍾意舊紅色的郵筒 , 現在綠色很難看 .

    回覆刪除
    回覆
    1. happyak:係呀喱程都算係中距離,東涌至大澳那程感覺上好似仲遠水路
      絕對同意,用了綠色始終唔係咁順眼

      刪除