2020年1月8日 星期三

雪梨盛夏光年@Orara East

新一年又繼續開筆寫澳洲旅程……話說來到聖誕日這天,Coffs Harbour市內的店舖當然仍是休業中,無謂浪費時間去摸門釘。不過眼見夏日藍天白雲艷陽高掛天朗氣清,又唔想齋浸在resort的泳池虛度寶貴光陰,最理想的節目就係去附近的State Forest短途行一陣山吧!



來到澳洲不僅空氣質素佳(今年就好似受山火影響可能視野和空氣無咁好),大自然風景也靚,確很值得花一天半晝到郊外走走!記得十年八載前初來Sydney那次,只簡單逛過Bondi、Manly同埋North Head和South Head那些郊區地方,最遠也只去過Port Stephens滑沙而已!今次反正空閒時間更多,不能錯過去逛逛森林公園的滋味……



澳洲的森林公園夠晒大就不用多講了(之前閃遊過Dorrigo雨林公園看瀑布也很大)!今次來的這處Orara State Forest還分東西兩邊,想看靚風景還是來Orara East這一邊比較方便,由市中心駕車約一個鐘就來到,而且這裏有個很出名的Forest Sky Pier,人氣打卡指數相當高。



這個懸吊式觀景台就長這樣!它就聳立於山上的Sealy Lookout一處懸崖邊,畏高的人行出去可能會有少少腳軟……資料顯示這「天空碼頭」木橋向外伸延逾20米,基爾這日Christmas Day來到正好遇上好天氣,眼前270度的科夫斯港全景和南太平洋海岸線清晰可見。



可能由於聖誕長假期關係,唔少遊客都專程駕車上來看風景順便picnic玩大半天(當然無太平山山頂廣場咁墟陷)。看看橋躉上的告示才知這座觀景台於2011年12月才開幕,由當時的NSW州長剪綵。



看森林公園的地圖leaflet介紹話:「On a clear day you can see 100 kilometres to the south and might even spot a whale passing by out at sea.」咁基爾梗係出盡眼力遠望睇睇係咪真的會有鯨魚游過先啦!



可惜繼上次在Muttonbird Island之後,結果也是與鯨魚緣慳一面,夏天可能不是觀鯨的季節吧!時值正午烈日當空,還是先行返入去森林唔駛曝曬咁耐。之前提到Orara East森林公園內其實都有幾條行山郊遊徑(有當地人會來玩mountain bike),基爾揀了最短又難度最低的Garraan-gurr Track來行下就算了。



沿往行山徑行無耐,見越行越少人,為免人生路不熟會在樹林裏蕩失路(其實指示牌算好清楚的),穩陣起見咁就沿路折返,再坐車返落海邊的Jetty碼頭逛多一陣,先再返去resort游水吧!



不說不知原來這條位於海邊沙灘旁的碼頭木橋也有很悠久歷史,它始建於1892年,19世紀時Coffs Harbour的伐木業相當繁榮昌盛,這個長碼頭昔日就是運送木材乘貨輪出口的港口碼頭,看老照片才知以前橋上還鋪設了路軌,方便運送巨木杉落船。



今時今日橋上當然早已沒有木材的運輸車,反而更多的是消閒的遊人來釣魚,也有小朋友來玩跳水。橋邊的空地還有個小型遊樂場,但聖誕假期竟也沒開,場內的機動遊戲機只靜靜地懸在半空沒有開動。



不過中午時份實在太曬了,即使遊樂場有開也不願去曝曬吧!幸而留在長橋也算清風送爽,澳洲天氣就是勝在熱得來也不太潮濕,也不會焗出汗,但緊記要多塗防曬否則好容易唔覺意就曬到燶!



另一個不錯的節目就是在沙灘邊睇浪,這裏的沙灘雖然無Bondi那些咁出名和咁多人,但同樣都係咁靚咁一望無際,基爾雖然無落水但齋在沙灘邊行下都夠愜意了(p.s.遠處的小島就是上篇去過的Muttonbird Island)。



行完沙灘又坐車返去resort浸下水休息一陣,這樣就靜靜度過了聖誕節下午。至於晚餐食了什麼?睇返照片先記得食了洋蔥豬扒配薯蓉,平時出街食飯間中會食到薯蓉,但親身見到製作過程還是第一次,雖然不太難但都幾花時間和心機;另外配多碗粟米湯已相當夠飽了。



飯後甜品方面,就是早前在商場超市買回來的蜜瓜,第一次食這隻品種覺得都唔算太甜膩,清清地正合基爾口味,而且只售AUD$3.9價錢算是抵食啦!就這樣吃了非常豐盛的聖誕大餐。



飯後無聊再拎返resort派的天氣報告來看看,原來聖誕長假期連續幾天都有大大個太陽照住,攝氏16至26度左右的氣溫也是最舒服最perfect的了,就似老家的秋冬天般清爽,明天的Boxing Day要好好plan下去邊度戶外活動先得,唔好浪費了好天氣嘛!

52 則留言:

  1. 希望場山火快D救熄 🤞

    回覆刪除
    回覆
    1. 我諗都算係一場生態大災難了!!
      當地差不多每年都有大山火,有識之士真係要想想到底有乜好的有效的減災方法先得!

      刪除
    2. 聽說最近下了幾天雨,山火情況好似有點紓緩了

      刪除
  2. 咁好天仲以為好熱添,原來只係16至26度.

    回覆刪除
    回覆
    1. 係呀這裏雖然比較近Brisbane但可能地方大有海風又夠空曠,所以感覺比Sydney要涼快,尤其夜晚仲清爽涼快過HK冬天...XXD

      刪除
    2. 香港其實最近的天氣也不錯呀!
      可惜要避疫不能經常外出吧!

      刪除
  3. 一年後的澳洲,發生了這場大火,你係咪更加心痛?

    回覆刪除
    回覆
    1. 唔知依家這些一年前走過的森林區會變成點呢?

      刪除
    2. 聽說下了幾天大雨情況已有改善,希望盡快撲熄啦

      刪除
  4. 澳洲嘅風景真係好靚,難怪你每日都想親親大自然,今次嘅山火真係好可惜。

    回覆刪除
    回覆
    1. 去澳洲都係首選去看看大自然風景,城市就一定無HK咁多人咁熱鬧了
      可能今年特別乾旱加劇了山火,記得舊年去果半個月都只係兩三日有落雨,同埋有一天傍晚落雹!

      刪除
    2. 而且澳洲始終地方大人口又較少,絕對有大把親親大自然的機會^^

      刪除
  5. 陽光與海灘!咁靚地方,有山火真可惜!

    回覆刪除
    回覆
    1. 希望雨季快點來可以減輕一點災情

      刪除
  6. 希望澳洲的山林大火快些撲熄滅...
    太可怕了。。。

    回覆刪除
    回覆
    1. 所以真係要小心火種
      同埋大家的生活方式都要盡量環保啲
      大家都生活在同一個地球吧!

      刪除
    2. 全球暖化可能會令極端天氣增加

      刪除
    3. 最近天氣也不錯
      有没有出外走走呢?

      刪除
  7. 為澳洲祈禱,今年真係燒到咁可怕,好傷心

    回覆刪除
  8. 澳洲的山林大火太可怕了。。 希望山林大火快些撲滅
    親友說因山火, 現在非常炎熱, 成30C多度

    回覆刪除
    回覆
    1. 希望雨季提早來可幫助撲滅山火
      睇電視新聞都係咁講,有時會熱到40度
      生態受影響可能氣候溫差會變化更大

      刪除
  9. 澳洲的山林大火,5億生物逃不脫是不幸。
    一萬匹野生駱駝逃過山林大火,逃不脫政府射殺!

    回覆刪除
    回覆
    1. 生態災難不知要等幾多個十年才可恢復呢:P

      刪除
  10. 無太平山山頂廣場咁墟陷---->這是好事都未定呢﹗

    回覆刪除
    回覆
    1. 墟陷啲可以帶動核心經濟刺激消費GDP飇升....XXD

      刪除
  11. 澳洲而家真係慘,我住悉尼的朋友叫苦連天。

    回覆刪除
    回覆
    1. 就來國慶,唔知今年仲有冇心情燒煙花呢:P

      刪除
  12. 這麼美的藍天白雲...要好好珍惜

    回覆刪除
  13. 天氣咁好~~~真係出去就咁行下都舒服~~何況有靚景~~~
    你錯了~你老家的秋天才不會這樣~到冬天還是熱辣辣的~~~~

    回覆刪除
    回覆
    1. 係呀話哂畀咗咁多機票錢點都要出去行下嘅係咪XXD
      日日廿幾度完全唔洗買冬天衫wakakaka...

      刪除
  14. 好慘呀, 咁靚既風景毀於一旦
    聽話澳洲好熱, 成40幾度, 好易引起山火

    回覆刪除
    回覆
    1. 希望佢地可以好快恢復...
      雨季如早點來可能可以減輕山火情況
      內陸會比較乾和熱,好易會引起山火

      刪除
  15. 我而家日日都無出街虛渡光陰呢~😝
    睇鯨魚去留尼旺啦,我係岸邊都見到呀!
    西人咁注重聖誕,無人開工了

    回覆刪除
    回覆
    1. 係咪仲住城堡果度?
      馬爾他其實本身風景都靚,可以走走大街小巷本身也是樂事^^
      係呀通常聖誕連接新年休得轉長,節日其間好多時不開門或者只要半天,要早一點去超市入定少少糧食先得:P
      銀哥有冇寫過留尼旺?一陣去你blog找找看.....
      今次會唔會有plan再去印度洋啲島國巡一巡才回HK?

      刪除
    2. 難怪昵期寫得咁快,我地有眼福🤣

      刪除
    3. 非常有眼福,可以靠銀哥網誌瞬間看地球^^

      刪除
    4. 唔知佢依家去到中亞未呢?

      刪除
    5. 希望佢冇受疫情影響吧!

      刪除
  16. 去到澳洲gael兄有冇抱住樹熊影張打卡相呢??呢個差唔多指定動作...

    回覆刪除
    回覆
    1. 咁又無喎....
      如果真的要抱,其實HK果個主題公園都有得抱係咪??
      動物我始終比較喜歡遠觀就可以了:P

      刪除
    2. 森兄以前除了龜之外仲有冇養过咩寵物呢?

      刪除
  17. 回覆
    1. 剛好去的這幾天也陽光普照不錯呢^^

      刪除
    2. 最近香港天氣其實也挺好呀!
      可惜遇上疫情好多人要留在家避免外出去人多地方

      刪除