2013年1月6日 星期日

皇氣Vs藝術:中@灣仔警署

由於喱次參觀舊灣仔警署影的相比較多,就分作上中下3篇post,希望唔會悶死大家!



唔講咁多立即再返去警署睇野,上次睇完ground floor,今次上埋2樓參觀,首先喱間房擺滿晒紅色人形公仔,至於代表咩就無去深究了,唯一好奇係:唔知會唔會有人側側膊拎走一兩個人仔留念呢?



上圖左喱個象徵城市的模型,基爾就覺得整得幾靚幾醒目,一幢幢高樓有唔同顏色,就好似彩虹一樣;右面喱間房正在搞workshop,如果有時間都可以入去參與集體藝術創作。



喱一間房就擺滿了灣仔警署的模型,好多都做得好精巧,主要用硬卡紙整,手工幾靚,主題係如何活化警署,大部份都保留了舊警署的古老外貌,再在後面加建了設計新穎的新大樓,感覺幾前衛,唔知當中有無得獎作品呢?



上圖左喱間又係黑鼆鼆的房,裏面用了紫外光燈照射出一個人體彩繪圖像,有點「人體奧妙展feel」;右圖是由其中一扇古老的木窗框往外望。



至於喱間佈置成醬油莊的展廳亦幾有趣,除了有「醬」字門簾之外,仲有盞似是街市照雞蛋用的吊燈,很有點懷舊味道……



窗前仲擺了好多哈哈笑玻璃樽,不過基爾最鍾意小圓台上的這列電動玩具小火車,好有童年回憶!



盞小吊燈本身其實都幾有懷舊feel,依家已經唔係咁易搵到喱類用鎢絲電燈膽的吊燈吧!右圖是展廳裏掛在天花的豬籠草,有好多肥大的「豬籠」吊下來,唔影點得!



喱間房的陳設就最簡單,全間房的牆上都貼滿了寶麗萊照片,相中全是灣仔區拍的景象,遠睇就如一個個小窗,組成一大幅「浮世繪」。



近睇D相其實都影得幾特別幾靚架!間房仲有個鐵窗,望出去可以睇到謝斐道後街那邊的露天展區,一陣行完警署後,都要落埋去睇先得!



露天展區果邊望落去都幾多人同幾多野睇,喱幅黃金地段將來可能又成為高樓大廈;依家未起樓,望出去感覺較開揚,空地後面那幢建築物就是駱克道街市了。



喱個「三語設計」都幾過癮,參觀者只要吹響喇叭,國旗就會自動飄起,完全唔駛用風扇吹。



喱間就主要講廢物利用,全部展品都係用被人廢棄的物品製作,好環保喎!



上圖左喱間房貼滿五顏六色的蜂巢紙雕,全部都係由參觀者摺出來,鋪滿成幅牆仲靚過鋪牆紙;右圖側是CID房,但房門無開,只能由門上的小窗望入去睇下,不過其實房入面早就搬空晒,無咩特別野睇。



整間差館基爾覺得最正的就係2樓喱個大露台,平時在街外就望得多,今次都係第一次在露台上望返去告士打道那邊,從喱個角度望出去,感覺又幾特別。



從外面睇都唔知原來個露台都幾大的,展覽期間仲鋪滿晒乾草,增添了一點田園味,最特別係擺了幾張紅白藍帆布床,行得累了可以來這裏坐下歇歇腳!



喱個帆布床概念唔知係咪來自外國呢?如果在公園擺幾張帆布床畀人坐下訓下都幾唔錯,不過有可能最後會變左做露宿者之家吧!



帆布床原來仲有好多花款,唔知依家仲有無得賣喱種帆布床架呢?基爾記得細個時家中都有一張,那時夏天行出來仲可以變成迷你sir滑梯,好正!右圖是落返去ground floor的古老樓梯。



落返去警署正門的長廊,喱度應該好多人去灣仔時都有行過吧!

沒有留言:

張貼留言