2013年1月7日 星期一

皇氣Vs藝術:下@灣仔警署

無悶死到的survivor而又想繼續挑戰一下自己忍耐力的話,就跟基爾行埋下集大結局吧!



轉返入後面的謝斐道,主要係想去睇埋佢個露天展區,圍牆上喱個「灣仔地圖」牌匾又整得幾靚喎!



喱個Crying in Public的圍牆裝飾其實就是一塊大黑板,上面寫滿了參觀者的留言,遠睇又有少少似柏林圍牆,算是一種集體塗鴉創作。



露天展區最矚目就係喱個恍如大蜘蛛網的Shell Star Pavilion,行入去真係有少少似高迪的作品風格。藝術家Andrew Kudless和Riyad Joucka以香港洋紫荊區徽作藍本,打造出一款可供小朋友們嬉戲的涼亭,配合公共空間的主題。



左上圖喱棵枯樹上掛滿吊燈和西瓜波,唔知又代表咩呢?右上圖喱個就叫做「靈蛇手推車」,靈感來自「灣仔車水馬龍的人文景觀,令作者聯想起名為貪食蛇的手機遊戲,於是打造出這款互動式雕塑,並可推到灣仔街頭,融入於這個城市」云云。



同場仲有喱個單車區,藝術家製作出來的單車當然又係不同凡響,有些可以趟在上面踩,都幾舒服的,而且唔收車租。



上圖左是一個名為Hong Kong Fountain House的作品,木製的涼亭上有個小噴水池,幾趣緻可愛。水源不足是不少城市面對的問題,外國團體Raumlabor把屋頂打造成器皿狀,除了收集雨水外,更是噴水池,外觀美麗之餘,一點也不浪費水源,做到自給自足的效果。



至於上面喱座木製的太陽椅又係另一焦點展品,好多人去試坐,望落又好似幾舒服,坐上去可以慢慢欣賞灣仔喱一小片藍天。



喱邊直情連太陽椅都唔駛裝,就咁就可以攤在人造草地上訓陣,絕對唔會畀人搞,最多係畀基爾偷影唧!



上面喱個就有少少眼花,因為地上的字全部係反方向寫,要認真睇佢寫乜,就要靠中間果條金屬柱反射,不過基爾老人家就唔係好夠眼去仔細睇了。



最後喱一part叫做「排檔藝術嘉年華」,排檔是香港的獨有文化,一班藝術家與小販合作,創作出獨特有趣的「檔口」,展現港式街市文化。



上圖左係一個即席示範整街頭小食的檔口,唔記得係咪整砵仔糕定咩?其實每個攤檔都好細,印象中仲有賣小麥草汁飲品和幫人寫符咒。



去開灣仔咁遠,順便行埋去睇睇D老地方吧!星期日來到舊灣仔街市喱邊似乎唔算太多人,喱幢有百年歷史的街市正進行所謂的活化工程,最後裏面會變成咩就未知,不過上面就多了一大座豪宅,感覺其實都幾突兀,完全都唔match的。



相比起藍屋喱邊就幸運得多,至少整幢唐樓除了可以原原本本咁保留下來,上面亦唔會加建D咩時尚玻璃幕牆商場酒店豪宅,否則就實在太搞笑了!



上圖左是藍屋其中一條樓梯,仍保留20年代初建時的木板建築設計;右上圖是位於藍屋底層的「灣仔民間生活館」,原址是「聯興酒莊」,約在80年代結業。由於藍屋樓上仍有人居住並不對外開放,只有喱這間展覽館可供參觀。



另外樓下仲有一間「林鎮顯醫館」,翻查維基原來昔日喱度係華佗廟,50年代黃飛鴻徒弟林世榮姪兒林祖在這裏開設武館,60年代武館再改為林氏兒子林鎮顯的醫館。至於藍屋為何會是藍色?話說90年代當時政府物料庫只剩下水務署常用的藍色油漆,修葺藍屋時就索性整座唐樓髹成藍色,巧合的東西有時就是這樣簡單,沒有什麼奇詭的理由。

沒有留言:

張貼留言