2013年1月5日 星期六

皇氣Vs藝術:上@灣仔警署

在東涌Novotel食完lunch buffet兼行一陣街,再搭地鐵出返港島灣仔其實都已經4點幾,不過好彩喱個Detour﹕Maker's Fair開放時間比較長,所以都可以慢慢參觀一下。



基爾都唔係太識欣賞藝術,喱次最主要係想入去參觀下有逾80年歷史的舊灣仔警署,印象中以前好似無試過開放畀公眾參觀,所以山長水遠都要去睇睇。



上圖右是從側門入去見到的卡通雕塑,有點「娛樂金魚眼」feel,幾可愛﹗左圖是地下一層其中兩間展廳展出的藝術品,喱D大房相信以前都係警察的辦公室吧!



講返喱間古老警署,原來佢落成於1932年,當時灣仔剛完成填海工程,警署就坐落在告士打道海邊,睇返D老照片,當時馬路外就是維港了,很有趣!上圖是警署後門的停車場,以前應泊滿警車,依家當然早已去晒新警署那邊啦!



上圖是停車場旁的上彈及退彈區,令人想起了無間道等警匪片,到底陳永仁和劉健明當年有無在喱度為警槍上過子彈呢?



上彈及退彈區有個很大的警隊徽號,可惜只有97年回歸後的紫荊章,如果有埋以前有英國皇冠果個徽號展出就更佳了。右上圖那個小窗口就係警察領槍和還槍的地方,即使現在仍能感受到昔日嚴密的保安氣氛。



再行返入警署參觀,喱間房有好多掛了編號的掛勾,忘記了係咪就係槍房,今次展覽就擺放了不少前衛的裝置藝術品,明唔明就要考考觀眾的藝術觸覺了。



跟住再去睇下D監倉,警署的ground floor有5間拘留室,每間拘留室的入住人數由3至5人不等,入面除了廁所和石床之外就咩都無,相信以前如果有囚犯時,衛生環境也不會太好……



依家改晒做展覽廳,當然就早已清潔乾淨晒啦,絕對不會有臭味,至於展出的藝術品就……唔係太識欣賞!



上面喱一set家具又幾特別,全部髹上了紅漆,掛在牆上的囚衣都一樣淋了紅油,搞到成間房都紅卜卜,有少少鬼秘。



隔籬喱間囚室就好黑鼆鼆,因為要播放幻燈片,主題係「公眾的懺悔」,無詳細睇係咩。



行喱幾間囚倉除了有點監獄風雲feel之外,亦有少少似睇示範單位咁款,除左睇3人倉之外,當然要去睇埋5人倉,原來真係闊偌好多架喎!不過都係得一個好open的廁所,同埋一張長石床。



離開囚室區域,再行返入警署其他部份繼續遊逛下。喱條走廊都幾特別,貼滿晒七彩繽紛的memo紙,全部都係參觀者的留言,睇下有無人寫粗口先……

2 則留言:

  1. 全房佈置都係紅色好怪 , 主辦單位有冇解釋為何要咁呢 ?

    回覆刪除
    回覆
    1. AK:無解釋呀,通常喱啲都係藝術家的獨特意念XD

      刪除